ރައީސް އިބްރާހީމް މުހައްމަދު ސޯލިހު މިއަދު އިއްވެވި ރިޔާސީ ބަޔާނަކީ ރިޔާސީ ބަޔާނެއްގެ ޝަތުރު ހަމަނުވާ "ކެމްޕޭން ބަޔާނެއް" ކަމަށް މަޖިލީހުގެ އިދިކޮޅު ބައެއް މެމްބަރުން ސިފަކުރައްވައިފި އެވެ.
ރައްޔިތުންގެ މަޖިލީހުގެ ނައިފަރު ދާއިރާގެ ޕީޕީއެމް މެމްބަރު އަހުމަދު ޝިޔާމް "އަދަދު"އަށް މިއަދު ވިދާޅުވީ ރައީސް މިއަދު އިއްވެވި ރިޔާސީ ބަޔާނުން ގައުމުގެ އަދުގެ ހާލަތު ރަނގަޅަށް ސާފުނުވާ ކަމަށެވެ. އެއީ އޭނާ ވިދާޅުވި ގޮތުގައި ރާއްޖޭގެ މާލީ ހާލަތުގެ ތަފްސީިލު އެ ބަޔާނުގައި ނެތީމަ އެވެ.
"ރިޔާސީ ބަޔާނެެއްގެ ޝަރުތެއް ހަމައެއް ނުވޭ. ގާނޫނު އަސާސީ ބުނާ ގޮތުން ރިޔާސީ ބަޔާނުގައި ގައުމުގެ ހާލަތު ރަނގަޅަށް ބަޔާންކޮށްދެއްވަން ޖެހޭނެ. އެކަމަކު ރާއްޖޭގެ މާލީ ހާލަތު މިހާރު އޮތް ގޮތެއް އެ ބަޔާނުގައި ސާފުކޮށް ބަޔާންކުރައްވައިފައެއް ނެތް، ހަމަ އެކަނި ކޮވިޑްގެ ބޫސްޓާ ޑޯޒް ޖެހި އަދަދު ވިދާޅުވުމަކުން ނުފުދޭ. ގައުމުގެ މާލީ ހާލަތު އެއީ ރައްޔިތުންގެ ހާލަތު އަންގައިދޭ ކަމަކީ،" ޝިޔާމް ވިދާޅުވި އެވެ.
އޭނާ ވިދާޅުވީ ރިޔާސީ ބަޔާނުން ސާފުވާން ޖެހޭ އަނެއް ކަމަކީ މީގެ ކުރިން އިއްވެވި ރިޔާސީ ބަޔާންތަކުގައި ރައީސް ވެވަޑައިގެންފައިވާ ވައުދުތައް ފުއްދުމުގެ ކަންތައް މިހާރު ގޮސްފައިވާ ހިސާބެކެވެ. އެކަން ވެސް އޭނާ ދެކެވަޑައިގަންނަވާ ގޮތުގައި މިއަދުގެ ބަޔާނުުން ސާފެއް ނުވެ އެވެ. އޭގެ މިސާލަކަށް އޭނާ ބޯހިޔާވަހިކަމުގެ ދަތިކަމުގެ މައްސަލަ ހައްލުކުރަން ސަރުކާރުން ވެފައިވާ ވައުދެވެ.
"މިސާލަކަށް 5000 ހައުސިން ޔުނިޓްގެ ކަންތައް މިހާރު ގޮސްފައިވާ ހިސާބު، ޗައިނާގެ ކުންފުންޏަކަަށް އެ މަސައްކަތް އެވޯޑްކޮށްފައި އޮއްވާ އެކުންފުނިން ވަނީ އެ މަސައްކަތް ދޫކޮށްލާފައި. އެހެންވީމާ އެކަން އެބަ ކުރިއަށް ދެޔޭ ހަމަ އެކަނި ވިދާޅުވިޔަސް، އެކަން މިހާރު ގޮސްފައިވާ ހިސާބެއް ސާފެއް ނުވޭ،" އޭނާ ވިދާޅުވި އެވެ.
ރިޔާސީ ބަޔާން އޭނާ ސިފަކުރެއްވީ ޝަރުތު ހަމަނުވާ ބަޔާނެއްގެ ގޮތުގަ އެވެ.
"އަދުލު އިންސާފުގެ ވާހަކަ ނުވެސް ނެތް"
މަޑުއްވަރީ ދާއިރާގެ މެމްބަރު އާދަމް ޝަރީފު އެންމެ ބޮޑަށް ފާޑުވިދާޅުވީ އެމްޑީޕީގެ ޒަމާންވީ ވައުދެއް ކަމަށްވާ އަދުލު އިންސާފުގެ ނިޒާމު ހަރުދަނާ ކުރުމަށް ސަރުކާރުން މިހާރު މަސައްކަތެއް ކުރަމުން އަންނަކަން ނުވަތަ ނޫންކަން ވެސް ރިޔާސީ ބަޔާނުން ނޭނގުމެވެ. އޭނާ ވިދާޅުވީ ރައީސް އިބްރާހީމް މުހައްމަދު ސޯލިހުގެ ސަރުކާރުގެ މޯހިރަށް ބަލައިލީމާ ފެންނަނީ އެއްވެސް މިސްރާބެއް ނެތްކަން ކަމަށެވެ.
"އަދުލު އިންސާފަށް ހުރި ބޮޑެތި ގޮންޖެހުންތަކުގެ ވާހަކަ ނުވެސް ދައްކަވާ. މިސާލަކަށް ޖުޑިޝަލް ސާވިސް ކޮމިޝަނުގެ ކޮމްޕޮޒިޝަން ބަދަލުކޮށް، އެ ކޮމިޝަން މިނިވަން ކުރުން އެއީ އެމީހުން [އެމްޑީޕީން] ދެއްކި ވާހަކައެއް. އަޅުގަނޑުމެން އެކަމަށް މަސައްކަތް ކޮށްފިން އެކަމަކު، މިއަދުގެ ރިޔާސީ ބަޔާނުގައި އެއިން އެއްވެސް ވާހަކައެއް ނެތް،" އާދަމް ޝަރީފު ވިދާޅުވި އެވެ.
ގޮތް ނޭނގޭ ގަތުލުތަކާއި މީހުން ގެއްލުވައިލުމުގެ ޖަރީމާތައް ތަހުގީގުކުރުމަކީ ވެސް ރައީސްގެ ރިޔާސީ ވައުދެކެވެ. އެކަމަށް ޓަކައި އުފައްދާފައިވާ ރިޔާސީ ކޮމިޝަނުން ކުރަމުން އަންނަ މަސައްކަތްތަކުގެ ތަފްސީލު ކޮންމެ ރިޔާސީ ބަޔާނެއްގައި އެމަނިކުފާނު ދެއްވަ އެވެ.
އާދަމް ޝަރީފު ދެކެވަޑައިގަންނަވާ ގޮތުގައި މަރުތަކުގެ ވާހަކަ މިފަހަރުގެ ރިޔާސީ ބަޔާނުގައި ރައީސް ދެއްކެވީ ކަން އޮތް ގޮތަކަށް ނޫނެވެ.
"މަރުތަކުގެ ވާހަކަ ވެސް އެ ދެއްކެވީ ކަން އޮތް ގޮތަކަށް ނޫން. މަރުތަކުގެ ވާހަކަ ދެއްކެވި އިރު ޑރ. އަފްރާޝީމް އަލީގެ މަރަށް އިންސާފު ހޯދުމާ ބެހޭ ވާހަކައެއް ނެތް. ފަހުގެ ތާރީހުގައި އެންމެ އަނިޔާވެރިކޮށް ހިންގި އެއް ކަންތައް އެއީ ޑރ. އަފްރާޝީމް އަވަހާރަކޮށްލުން، އެ ވާހަކަ ނުވެސް ނެތް މި ބަޔާނުގައި،" އާދަމް ޝަރީފު ވިދާޅުވި އެވެ.
ރިޔާސީ ބަޔާނުގައި ހުރި ކަންތައްތަކަކީ ރާއްޖޭގެ ހާލަތަށް ރިއާޔަތް ނުކޮށް، ހަމަ އެކަނި 2023 ވަނަ އަހަރުގެ ރިޔާސީ އިންތިހާބަށް ރައްޔިތުންގެ ލޮލުގައި އަޅުވާ އަނދުނެއްގެ ގޮތުގައި ދެއްކެވި ވާހަކަފުޅުތަކެއް ކަމަށް ވެސް އޭނާ ވިދާޅުވި އެވެ.
