އަންނަ އަހަރަށް ފުލުހުންގެ މުއައްސަސާއަށް ހާއްސަކޮށްފައިވާ ބަޖެޓުން ވެސް ފުލުހުންގެ މުއައްސަސާ ކުރިއަރުވަން ސަރުކާރުން ހާއްސަ ސަމާލުކަމެއް ދޭކަން ހާމަވާ ކަމަށް ހޯމް މިނިސްޓަރި އިމްރާން އަބްދުﷲ ވިދާޅުވެއްޖެ އެވެ.
އަންނަ އަހަރުގެ ބަޖެޓުގައި އިތުރު މުވައްޒަފުން ނަގަން ހުއްދަ ދިން ތަންފީޒީ އިދާރާތަކުގެ ތެރެއިން ބޮޑު ބައެއް ކަނޑައެޅީ ފުލުހުންނަށެވެ. އެގޮތުން އިތުރު 235 ފުލުހުންނާއި އިދާރީ މުވައްޒަފުން ނަގަން 34.8 މިލިއަން ރުފިޔާ ވަނީ ފުލުހުންގެ އިދާރާއަށް ބަޖެޓުކޮށްފަ އެވެ.
ރޭންކާއި ގްރޭޑްގެ ކުރިއެރުން ދިނުމަށް އިސްކަންދަރުކޮށީގައި މިއަދު ބޭއްވި ރަސްމިއްޔާތެއްގައި ފުލުހުންނާ މުހާތަބުކުރައްވާ ވާހަކަދައްކަވަމުން މިނިސްޓަރު އިމްރާން ވިދާޅުވީ ޒަމާނީ ގޮންޖެހުންތަކާ ފައިހަމަކުރެވޭވަރުގެ މުއައްސަސާއަކަށް ފުލުހުންގެ މުއައްސަސާ ހެދުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަރަށް ބޮޑު އިސްކަމެއް ދެއްވާ ކަމަށެވެ.
ޒަމާނީ ގޮންޖެހުންތަކާ ފައިހަމަކުރެވޭވަރުގެ މުއައްސަސާއަކަށް ފުލުހުންގެ މުއައްސަސާ ހެދުމަކީ އެންމެންގެ ޒިންމާއެއްކަމަށާއި ިއެމަނިކުފާނު ވެސް ލިބިފައިވާ ފުރުސަތާއި ވަސީލަތްތައް ބޭނުންކޮށްގެން އެކަމަށް މަސައްކަތް ކުރައްވަމުންދާ ކަމަށް އިމްރާން ވިދާޅުވި އެވެ.
ދައުލަތުގެ ތެރެއިން ފުލުހުންގެ މުއައްސަސާއަށް ލިބިދޭންޖެހޭ ކަރާމަތާއި ޝަރަފު ހޯދައިދިނުމަށް ވަރަށް ގިނަ މަސައްކަތްތަކެއް ކުރެވިއްޖެކަން ފާހަގަކުރައްވައި ދައުލަތުގެ އާމްދަނީއަށް ބޮޑެތި ގޮންޖެހުންތަކެއް ކުރިމަތިވެފައިވާ ދުވަސްވަރެއްގައި 2022 އަށް ފުލުހުންގެ މުއައްސަސާއަށް ކަނޑައެޅި ބަޖެޓަކީ އޭގެ ހެއްކެއް ކަމަށް މިނިސްޓަރު ވިދާޅުވި އެވެ.
ބަޖެޓް ކޯޑުކޮށް ތަރުތީބުކޮށްފައިވާ ގޮތުން ފުލުހުންގެ މުއައްސަސާ ހަރުދަނާކުރުމުގެ ތެރެއިން ތަމްރީނާއި ހުނަރަށް ހޭދަކުރެވޭ މިންވަރުވެ މިނިސްޓަރު ފާހަގަކުރެއްވި އެވެ.
މީގެ އިތުރުން މުޖުތަމައު އަމާން ސުލުހަވެރި ވެއްޓަކަށް ހެދުމަށް ކުށްކުރުމުގެ މުޅި މާހައުލަށް އަންނަ ބަދަލުތަކާ އެއްވަރަށް ފުލުހުން ފައިހަމަކޮށްގެން ނޫނީ ރާއްޖެއަށް ސުލުހަވެރި އަމާން ވެއްޓެއް ނުގެނެވޭނެ ކަމަށް ވެސް މިނިސްޓަރު ވަނީ ވިދާޅުވެފަ އެވެ.
