ޕޮލިސް ބޯޑުން ވަކި ކުރަން ނިންމާފަައިވާ ފުލުހުންގެ އިދާރާގެ އިސް ދެ އޮފިސަރަކު މަގާމުން ދުރުކުރަން ކޮމިޝަނާ އޮފް ޕޮލިސް މުހައްމަދު ހަމީދު ނިންމަވައި, އެ ބޭފުޅުންނަށް ނޯޓިސް ފޮނުވައިފި އެވެ.
"އަދަދު" އަށް އެނގިފައިވާ ގޮތުގައި މާގަމުން ދުރުކުރަން ކޮމިޝަނަރު ނިންމަވައި, ނޯޓިސް ފޮނުވާފައިވަނީ އެސިސްޓެންޓް ޕޮލިސް ކޮމިޝަނަރު މުހައްމަދު ޖަމްޝީދާއި އެސިސްޓެންޓް ކޮމިޝަނާ އަހުމަދު މުހައްމަދު (ޓޫފޯ) އަށެވެ.
އެ ދެ ބޭފުޅުންނަށް ފޮނުވާފައިވަނީ އެނގިފައިވާ ގޮތުގައި މި ފެށޭ މަހުގެ 10 ދުވަހު މަގާމުން ވަކި ކުރުމަށް އެކަމުގެ އިޖުރާއަތްތައް ފެށުމުގެ ނޯޓިސް އެވެ.
ކޮމިޝަނަަރު އޮފް ޕޮލިސް ހަމީދު މި ނިންމެވުމުން ނިންމަވާފައިމިވަނީ ޕޮލިސް ބޯޑުން ހަތް އިސް އޮފިސަރަކު ވަކި ކުރަން ނިންމައި, އެކަން ތަންފީޒުކުރުމަށް ފޮނުވިތާ ގިނަ ދުވަސްތަކެއް ފަހު އެވެ.
މިދިޔަ މަހުގެ ނުވަވަނަ ދުވަހު ޕޮލިސް ބޯޑުން ނިންމާފައިވަނީ ޖަމްޝީދާއި އަހުމަދު މުހައްމަދުގެ އިތުރުން އެސިސްޓެންޓް ކޮމިޝަނާ ފަރުހާދު ފިކުރީ އާއި ޗީފް ސުޕްރިންޓެންޑެންޓް އަހްމަދު ޝުހާދާއި ޗީފް ސުޕްރިންޓެންޑެންޓް އަބްދުﷲ ޝަރީފާއި ސުޕްރިންޓެންޑެންޓް މުހައްމަދު ދާއޫދު އަދި ސުޕްރިންޓެންޑެންޓް އިސްމާއިލް ޝަމީމް ވަކިކުރުމަށެވެ.
މީ ގެތެރެއިން އަހުމަދު ޝުހާދާއި މުހައްމަދު ދާއޫދުއަކީ އެމްއެމްޕީއާރްސީގެ ކޮރަޕްޝަން މައްސަލާގައި ސަސްޕެންޑްކުރި ދެ ބޭފުޅުންނެވެ.
ގާނޫނުގައިވާ ގޮތުން ޕޮލިސް ބޯޑުގެ ނިންމެވުން ތަންފީޒުކުރައްވަން ޖެހެނީ ޕޮލިސް ކޮމިޝަނަރެވެ. ފުލުހުންގެ ބޯޑުގެ ނިންމުމުގައި ރިއާޔަތް ކުރަން ޖެހޭނެ ކަމަށް ގާނޫނުގައި ގިނަ ކަންތައްތަކެއް ބަޔާންކޮށްފައިވާއިރު, ހަމީދު މީގެ ކުރިން މި ނޫހަށް ވިދާޅުވި ގޮތުގައި, އޮފިސަރުން މަގާމުން ވަކި ކުރާނީ އެ ކަންކަމަށް ބަލައި ދިރާސާކުރުމަށްފަހު އެވެ.
ނިންމުން ތަންފީޒުކުރުމަށް ގާނޫނުގައި ކޮމިޝަނަރަށް ވަކި މުއްދަތެއް ދީފައެއް ނެތެވެ. ދެ އޮފިސަރަކާމެދު ކޮމިޝަނަރު ގޮތް ނިންމަވާފައިވާއިރު, ދެން ތިއްބެވި ފަސް އޮފިސަރުންނާ ގުޅޭ ގޮތެއް އަދި ގޮތެއް ނުނިންމަވަ އެވެ.
ނަމަވެސް, ޕޮލިސް ބޯޑުން ދެކެނީ އެ ބޯޑުގެ ނިންމުން ކޮމިޝަނަރު ތަންފީޒު ކުރާނެ ކަމަށެވެ.
ފުލުހުންގެ ލީޑަޝިޕްގައި ތިއްބަވަނީ ގާބިލް ބައެއްތޯ ކަށަވަރުކުރުމުގެ ޒިންމާ ބޯޑާ މަތިކޮށްފައިވަނީ ފުލުހުންގެ ހިދުމަތުގެ އާ ގާނޫނުންނެވެ. އަމަލުކުރަން ފަށާތާ ހަތަރު މަސް ދުވަހުގެ ތެރޭ ފުލުހުންގެ އިދާރާ އިސްލާހުކުރުމުގެ މަސައްކަތް ނިންމުމަށް ގާނޫނުގައި ބުނެފައިވެ އެވެ.
ގާނޫނުގައިވާ ގޮތުން ކޮމިޝަންޑް އޮފިސަރުންގެ ތެރެއިން ކޮމިޝާނާ އޮފް ޕޮލިސް ފިޔަވައި، ސުޕްރިންޓެންޑެންޓް އޮފް ޕޮލިސްއިން ފެށިގެން މަތީ ރޭންކުގެ ކޮމިޝަންޑް އޮފިސަރުން، ފުލުހަކަށް ވީތީ އެމީހަކަށް ލިބިފައިވާ ގާނޫނީ ބާރާއި އިހްތިޔާރު ނަހަމަ ގޮތުގައި ބޭނުންކޮށް، ލާއިންސާނީ އަނިޔާވެރި އަމަލެއް ނުވަތަ ކޮރަޕްޝަންގެ އަމަލެއް ހިންގާފައިވާ ކަމަށް ތުހުމަތުކުރެވޭތޯ ބޯޑުން ބަލަން ޖެހެ އެވެ.
އާ ގާނޫނުގެ ދަށުން އާއްމު ހަތް މެމްބަރެއްގެ މައްޗަށް އެކުލެވޭ ޕޮލިސް ބޯޑު އައްޔަންކޮށްފައި ވަނީ މިދިޔަ އެޕްރީލް މަހުގެ ތެރޭގަ އެވެ. ވަޒީރަށް ލަފާ ދޭ އެންމެ އިސް ފަރާތެއްގެ ގޮތުގައި ގާނޫނުން ކަނޑައަޅާފައިވާ ބޯޑަށް މަތިކޮށްފައިވާ މުހިއްމު ޒިންމާއަކީ އައްޔަންކުރާ ތާރީހުން ފެށިގެން ހަތަރު މަސް ދުވަހުގެ ތެރޭގައި ފުލުހުންގެ އިސް ސަފަށް ހަރުދަނާ ބަދަލުތައް ގެނައުމެވެ.
ހޯމް މިނިސްޓަރު އިމްރާން އަބްދުﷲ މީގެ ކުރިން ދެއްވި އިންޓަވިއުއެއްގައި ވިދާޅުވި ގޮތުގައި ގާނޫނުގައި ބުނާ މުއްދަތުގައި ފުލުހުންގެ އިސް ސަފަށް ހެޔޮ ބަދަލެއް ގެނައުމަކީ މުއައްސަސާގެ އިތުބާރު ބޮޑުވެގެންދާނެ ކަމެކެވެ.
