ރ. އަލިފުށި ފަޅުން ބިން ހިއްކައިގެން އެ ރަށުގައި އެއާޕޯޓެއް ތަރައްގީކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ މިއަދު ހަވާލުކޮށްފި އެވެ.
ޕްލޭނިން މިނިސްޓްރީން މި މަސައްކަތް އެމްޓީސީސީއާ ހަވާލުކުރީ 451 މިލިއަން ރުފިޔާއަށެވެ. އަދި އެއްބަސްވުމުގެ ދަށުން 750 ދުވަހުގެ (ގާތްގަނޑަކަށް ދެ އަހަރު) ތެރޭގައި އެ މަސައްކަތް ނިންމަން ޖެހެ އެވެ.
މިހާރު ވެސް ރ. އިފުރުގައި އެއާޕޯޓެއް އޮތް ނަމަވެސް އެ އަތޮޅުގެ ބައެއް ރަށްރަށާ މި އެއާޕޯޓު މާދުރުކަމަށް އެ ރަށްރަށުގެ ރައްޔިތުން އައީ ބުނަމުންނެވެ. އަދި އިތުރު އެއާޕޯޓެއް އަޅާނެ ކަމަށް ސަރުކާރުން ވައުދުވީ ވެސް ރައްޔިތުންގެ އެ ކަންބޮޑުވުންތަކާ ގުޅިގެންނެވެ.
އެގޮތުން މި އަހަރު ކުރީކޮޅު ބޭއްވި ލޯކަލް ކައުންސިލް އިންތިހާބުގެ ކެމްޕެއިނުގައި އެ އަތޮޅަށް އިތުރު އެއާޕޯޓެއް ގާއިމުކުރާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވި އެވެ. ނަމަވެސް އޭރު މި މަޝްރޫއު ހިންގާނެ ސީދާ ރަށެއް ހާމަކޮށްފައެއް ނުވެ އެވެ.
އަތޮޅުތެރޭގައި އެއާޕޯޓުތައް އެޅުމުގެ ސިޔާސަތަކީ ރައީސް ޔާމީންގެ ސަރުކާރުން ފެށިގެން ތަންފީޒުކުރަމުން އަންނަ، އަދި މި ސަރުކާރުން ވެސް ދަމަހައްޓަމުން އަންނަ ސިޔާސަތެކެވެ.
މި ސިޔާސަތުގެ ދަށުން އަމާޒަކީ ރާއްޖޭގައި މީހުން ދިރިއުޅޭ ކޮންމެ ރަށަކުން ވެސް އެންމެ ގިނަ އިރުވެގެން 20 މިނިޓު ތެރޭގައި ދަތުރުކުރެވޭ ދުރުމިނުގައި އެއާޕޯޓެއް އޮތުމެވެ.
