ދިވެހި ސިފައިންނަށް ބޯހިޔާވަހިކަން ކަށަވަރުކޮށްދިނުމަކީ ސަރުކާރުގެ މުހިއްމު އަމާޒެއް ކަމަށާއި، ބަނޑޭރިކޮށީގައި ބޮޑު ހައުސިން މަޝްރޫއުއެއް ތަރައްގީކުރުމުގެ އިތުރުން، މިހާރު ހުޅުވާލެވިފައިވާ ސަރުކާރުގެ ހައުސިން ސްކީމްތަކުގެ ތެރެއިން ވެސް ސިފައިންނަށް ހާއްސަ ކޯޓާއެއް ކަނޑައަޅާފައިވާނެ ރައީސް މުހައްމަދު މުއިއްޒު ރޭ ވިދާޅުވެއްޖެ އެވެ.
ސިފައިންގެ ދުވަސް ފާހަގަކުރަން ކަޅުތުއްކަލާކޮށީގައި ބޭއްވި ޖަލްސާގައި މުއިއްޒު ވިދާޅުވީ ސަރުކާރުން މިހާރު އިއުލާނުކޮށްފައިވާ ހައުސިން ސްކީމުން ސިފައިންނަށް ކަނޑައަޅާފައިވާ ކޯޓާއަކީ އެންމެ އެދެވޭ އަދަދު ކަމަށް ނުވީ ނަމަވެސް، ކުރިއަށް އޮތް ތަނުގައި އެ އަދަދު ވެސް އިތުރުކުރައްވާނެ ކަމަށެވެ.
"ސަރުކާރުގެ ބޯހިޔާވަހިކަމުގެ ޕްރޮގްރާމުތަކުގެ ތެރޭގައި، މިހާރު ހުޅުވާލެވިފައިވާ ޕްރޮގްރާމުގައި ވެސް ވަކި ކޯޓާއެއް [ސިފައިންނަށް] ކަނޑައެޅިފައިވާނެ. އެއީ އެންމެ އެދެވޭ އަދަދަށް ހަމަ ގައިމުވެސް ނުވާނެ. އެހެންވީމަ އިރާދަކުރެއްވިއްޔާ ކުރިއަށް އޮތް ތަނުގައި އިރާދަކުރެއްވިއްޔާ ކުރިއަށް އޮތް ތަނުގައި މި އަދަދު އިތުރުކުރާނަން. އިތުރުކޮށް އަސާސީ ބޯހިޔާވަހިކަން ލިބިގެންދާ ސިފައިންގެ އަދަދު ސަރުކާރުގެ ހައުސިން ސްކީމުތަކުގެ ތެރެއިން ކުރިއަށް އޮތްތަނުގައި އިރާދަކުރެއްވިއްޔާ އިތުރުކޮށްދޭނެ ޔަގީންކަން ތިޔަ ލޮބުވެތި ސިފައިންނަށް އަޅުގަނޑު އަރުވަން،" މުއިއްޒު ވިދާޅުވި އެވެ.
ސަރުކާރުން ފަށާފައިވާ ބޯހިޔާވަހިކަމުގެ މަޝްރޫއުތަކުން ސިފައިންނަށް ކަނޑައަޅާފައިވާ ހައުސިން ޔުނިޓުތަކުގެ އަދަދެއް އިއުލާނެއް ނުކުރެ އެވެ.
މާލޭގެ ބަނޑޭރި ކޮށްޓަކީ ކުރީގެ ރައީސް މައުމޫނުގެ ވެރިކަމުގައި ސިފައިންގެ ބޯހިޔާވަހިކަމަށް ހާއްސަކޮށްގެން ތަރައްގީކުރި ސަރަހައްދެކެވެ. އެތަނުގައި ހުރި އިމާރާތްތައް ތަޅާލައި، މިހާރު ރާވާފައިވާ ހައުސިންގެ ބޮޑު މަޝްރޫއުގެ އަމަލީ މަސައްކަތް މިއަހަރުގެ ތެރޭގައި ނުވަތަ އެންމެ ލަސްވެގެން އަންނަ އަހަރުގެ ކުރީކޮޅު ފެށޭނެ ކަމަށް މުއިއްޒު ވިދާޅުވި އެވެ.
އެ މަޝްރޫއު ކުރިއަށްދާއިރު، މިހާރު އެތަނުގައި ދިރިއުޅެމުންދާ އާއިލާތަކަށް ދިމާވެދާނެ ދަތިތަކަށް ހައްލެއް ހޯދުމުގެ ގޮތުން، އެ ފަރާތްތައް ވަގުތީ ގޮތުން އެހެން ތަނަކަށް ބަދަލުކުރާނެ ކަމަށް ވެސް އެމަނިކުފާނު ވިދާޅުވި އެވެ.
ހިދުމަތުގައި ތިބޭ މުއްދަތުގައި ސިފައިންގެ އިތުރުން މި މަޝްރޫއުން ފުލުހުންނަށް ވެސް ފްލެޓު ދޭނެ ކަމަށް މުއިއްޒު ވިދާޅުވި އެވެ.
