މޯލްޑިވިއަންގެ ފްލައިޓެއް ހައިޖެކް ކުރާނެ ކަމުގެ އިންޒާރު ދިން މައްސަލައާ ގުޅިގެން ދިވެހި ފިރިހެނަކު ފުވައްމުލަކުން މިއަދު ހައްޔަރު ކޮށްފި އެވެ.
ފުލުހުންގެ މީޑިއާ އޮފިޝަލް ވިދާޅުވީ ކޯޓު އަމުރެއްގެ ދަށުން ހައްޔަރު ކޮށްފައިވަނީ 34 އަހަރުގެ ފިރިހެނެއް ކަމަށެވެ.
އޭނާ ވަނީ ރޭ ފުވައްމުލަކުން ފުރަން އޮތް ފްލައިޓަކަށް ކާގޯ އަރުވައި ނުދިނުމުން ފްލައިޓް ހައިޖެކް ކުރާނެ ކަމުގެ އިންޒާރު ދީފައި ކަމަށް މޯލްޑިވިއަންއިން ބުނެ އެވެ. އެ އިންޒާރާ ގުޅިގެން ބަލަން ޖެހޭ ކަންކަން ބެލުމަށް ފަހު އެ ފްލައިޓަށް ފުރުނީ ދެ ގަޑިއިރު ފަހުންނެވެ.
އޭވިއޭޝަން ގަވައިދުތައް ބުނާ ގޮތުން ފްލައިޓެއް ހައިޖެކް ކުރާނެ ނުވަތަ ގެއްލުމެއް ދޭނެ ކަމުގެ އިންޒާރު ދީފި ނަމަ އެ ފްލައިޓަކަށް ފުރޭނީ ރަނގަޅަށް ސެކިއުރިޓީގެ ކަންކަން ބެލުމަށް ފަހުގަ އެވެ.
