ދިވެހި ފުލުހުން މިހާރު ހިދުމަތްދެމުންދާ ނިޒާމަށް މުހިއްމު ބަދަލުތަކެއް ގެނެސް, މިހާރު ގާއިމްކުރެވިފައިވާ ހަތް ޑިވިޝަންގެ ބަދަލުގައި ފަސް ސަރަހައްދު ކަނޑައަޅާ އެ ސަރަހައްދުތަކަށް ކޮމާންޑަރުން ލާނެ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ.
މާފަރު ޕޮލިސް ސްޓޭޝަން ހުޅުވުމަށް ރޭ ބޭއްވި ރަސްމިއްޔާތުގައި އިމްރާން ވިދާޅުވީ ސަރަހައްދުތަކަށް ކަނޑައަޅާ ކޮމާންޑަރުންނަކީ އިތުރު ބާރާއި, ވަސީލަތްތަކާއި, ހިދުމަތް ދިނުމަށް ފަހިކުރެވިފައިވާ އިސްބޭފުޅުންކަމުގައި ހަމަޖެހިގެންދާނެ ކަމަށެވެ.
އެކަމުގެ ނަތީޖާއަކަށް ވެގެންދާނީ ރައްޔިތުންނާ ގާތުން ފުލުހުން ހިދުމަތް ދިނުމުގައި ފަސޭހަކަމާއި, އަވަސްކަމާއެކުގައި ނިންމަންޖެހޭ މުހިއްމު ނިންމުންތައް ނިންމުން ކަމަށް އިމްރާން ވިދާޅުވި އެވެ. އަދި އެކަމުން ކުރިއަށްގެންދަންޖެހޭ މުހިއްމު މަސައްކަތްތަކުގައި ހުނަރުވެރިކަމާއި, ގާބިލްކަމާއެކު ކުރިއަށްދިއުމުގެ މަގު ތަނަވަސްވެގެންދާނެ ކަމަށް ވެސް ވިދާޅުވި އެވެ.
"ހުރިހާކަމެއްގައި މައި އިދާރާގެ މައްޗަށް ބަރޯސާވެގެން ތިބުމުގެ ބަދަލުގައި ކަންކަން އަވަހަށް ނިންމުމުގައި ފަސޭހަތަކެއް ލިބިގެން ދާނެ (މީގެ ސަބަބުން). މީގެ ހަގީގީ ނަތީޖާއަކަށް ވާނީ ފުލުހުންގެ ފަރާތުން ރައްޔިތުން އުއްމީދުކުރާ ހަގީގީ ހިދުމަތް ރައްޔިތުންނަށް ލިބިގެންދިއުން،" އިމްރާން ވިދާޅުވި އެވެ.
މީގެ އިތުރުން މިނިސްޓަރު ވަނީ ކުރިއަށް އޮތް ތިން އަހަރު ދުވަހުގެ ތެރޭގައި ރާއްޖޭގެ ހުރިހާ ރަށެއްގައި ފުލުހުންގެ ހިދުމަތް ގާއިމްކުރާނެ ކަމަށް ރައީސް އިބްރާހީމް މުހައްމަދު ސޯލިހް ވިދާޅުވި ވާހަކަތަކަށް ވެސް އަލިއަޅުއްވާލައިފަ އެވެ.
"ވަރަށް ވެސް ބޮޑުކަމެއް (އެކަމަކީ). އެކަމަށްޓަކައި ވަރަށްބޮޑު ހޭދައެއް ދައުލަތުން ކުރަންޖެހޭ ކަމެއް (އެއީ) އެހެންނަމަވެސް ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް މިއަދުގެ ހާލަތުގައި ކޮންމެހެން ބޭނުންވާތީވެ, އެކަން ކުރުމުގެ މަސައްކަތް އަޅުގަނޑުމެން މިދަނީ ކުރަމުން،" މިނިސްޓަރު ވިދާޅުވި އެވެ.
