ސަރުކާރުން ކަނޑައަޅާ މަޝްރޫއުތަކެއް ހިންގުމުން ކްރޮސް ސަބްސިޑީގެ ގޮތުގައި ޓޫރިސްޓް ރިސޯޓެއް ނުވަތަ އިންޓަގްރޭޓަޑް ޓޫރިސްޓް ރިސޯޓެއް ހިންގުމަށް ރަށް، ފަޅު އަދި ބިން ދޭ ގަވާއިދު ގެޒެޓްކޮށް އަމަލު ކުރަން ފަށައިފި އެވެ.
މިދިޔަ ބުރާސްފަތި ދުވަހު ގެޒެޓް ކޮށްފައިވާ ގަވާއިދުގައި ބުނެފައިވަނީ ކްރޮސް ސަބްސިޑީގެ ގޮތުގައި ރަށް ދޫކުރެވޭނީ ކުރިއާލާ އިއުލާން ކުރާ މަޝްރޫއުތައް ހަވާލު ކުރާ ފަރާތްތަކަށް ކަމަށެވެ. ގަވާއިދު ބުނާ ގޮތުން އެފަދަ މަޝްރޫތައް ކުރިއާލާ ރައީސްގެ ގަރާރަރަކުން ކަނޑައަޅައި ގެޒެޓް ކުރަން ޖެހެ އެވެ.
އެގޮތަށް ދޫ ކުރެވޭނީ ފަތުރުވެރިކަމުގެ ބޭނުމަށް ރައީސް ކަނޑައަޅައި ޓޫރިޒަމާ ބެހޭ މިނިސްޓްރީން ޝާއިއު ކުރާ ލިސްޓެއްގައި ހިމެނޭ ރަށެއް، ފަޅެއް، ނުވަތަ ބިމެއް ކަމަށް ވެސް ގަވާއިދުގައި ބުނެ އެވެ. ތަންތަން ދޫކުރުމުގެ ބާރުވެސް ގަވާއިދުން ދީފައިވަނީ ރައީސަށެވެ.
އާއްމު ކުރާ ލިސްޓްގައި ނުހިމެނޭ ތަނެއް ކްރޮސް ސަބަބްސިޑީގެ ގޮތުގައި ހޯދުމަށް މަޝްރޫއު ހިންގާ ފަރާތުން އެދޭނަމަ އެކަން ބަލައިގަނެ ލިސްޓަށް އުނިއިތުރު ގެނައުމުގެ އިހުތިޔާރު ގަވާއިދުން ވަނީ ޓޫރިޒަމް މިނިސްޓްރީއަށް ދީފަ އެވެ.
ގަވާއިދުގައި ބުނެފައިވަނީ ކްރޮސް ސަބްސިޑީގެ ގޮތުގައި ތަނެއް ކުއްޔަށް ދޫކުރާއިރު އެ ތަނެއްގެ ކުލީީގެ އެއްބަސްވުމުގައި އެތަން ހިންގުމުގެ ހުއްދަ ދޫކުރެވޭނީ މަޝްރޫއު ނިމުމުން ނުވަތަ މަޝްރޫއު އެއްކޮށް ނިންމަން ޖުމުލަ ފައިސާ ދައުލަތާ ހަވާލު ކުރުމުން ކަމަށެވެ.
ރައީސް މުހައްމަދު ނަޝީދުގެ ވެރިކަމުގައި ވެސް ވަނީ ފެރީގެ ހިދުމަތް ދިނުމުގެ ބަދަލުގައި ރިސޯޓް ހިންގަން ރަށް ތަކެއް ދޫކޮށްފަ އެވެ. ގިނަ ކުންފުނިތަކުން ވަނީ ފެރީގެ ހިދުމަތް ނުދީ ރިސޯޓް ހިންގައިފަ އެވެ.
