ރަސްމާލެ މަޝްރޫއަކީ ރައީސް މުހައްމަދު މުއިއްޒުގެ އަމިއްލަ މަޝްރޫއެއް ނޫން ކަމަށާއި، އެއީ 18 އަހަރުން މަތީގެ ކޮންމެ ދިވެހި ރައްޔިތަކަށް ބޯހިޔާވަހިކަން ކަށަވަރުކޮށްދިނުމަށްޓަކައި އެމަނިކުފާނުގެ މެނިފެސްޓޯގައި ހިމެނުއްވި މަޝްރޫޢެއް ކަމަށް ކުރީގެ ރައީސް އަބްދުއްﷲ ޔާމީން ވިދާޅުވެއްޖެ އެވެ.
ޕީޕަލްސް ނޭޝަނަލް ފްރަންޓް (ޕީއެންއެފް) އިން ބޭއްވި ޖަލްސާއެއްގައި ޔާމީން ވިދާޅުވީ، ރަސްމާލެ ތަރައްގީކުރުމުގެ މައިގަނޑު މަގުސަދަކީ އެ ތަން ބޭރުގެ ފަރާތްތަކަށް ވިއްކާލުން ނުވަތަ ފޮރިން އިންވެސްޓްމަންޓްތަކަށް އެކަނި ހާއްސަކުރުން ނޫން ކަމަށެވެ. އަދި އެއީ މާލެ ސަރަހައްދުގައި އުޅޭ ދިވެހި ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމަށް ރޭވި އާ ޓައުންޝިޕެއް ކަމަށް އެމަނިކުފާނު ވިދާޅުވިއެވެ.
އެ މަޝްރޫއުގެ މައިގަނޑު ބޭނުމަކީ ބޯހިޔާވަހިކަން ފޯރުކޮށްދިނުންކަން ފާހަގަކުރައްވަމުން ރައީސް ޔާމީން ވިދާޅުވީ، 18 އަހަރުން މަތީގެ ހަމަ ކޮންމެ ކުއްޖަކަށް ބޯހިޔާވަހިކަމެއް ހޯދައިދިނުމަށްޓަކައި ޕްލޭންކުރި މަޝްރޫއެއް ކަމަށެވެ. އެމަނިކުފާނު އިތުރަށް ވިދާޅުވީ، ބޯހިޔާވަހިކަމުގެ ސަހަރެއް ބިނާވެގެންދާއިރު ވިޔަފާރީގެ މުއާމަލާތްތަކާއި، ބޭންކުތަކާއި، ކޮންމެވެސް ވަރަކަށް ފޮރިން އިންވެސްޓްމަންޓްތައް އައުމަކީ އެކަން ހިނގާނެ ތަބީއީ ގޮތް ކަމަށެވެ.
"މައިގަނޑު ބޭނުމަކަށް އޭރު އަޅުގަނޑު ބުނެފައި އޮންނާނެ 2030 އަންނައިރު، އަށާރަ އަހަރުން މަތީ ހަމަ ކޮންމެ ކުއްޖަކަށް ބޯހިޔާވަހިކަމެއް ހޯދައިދިނުމަށްޓަކައި ޕްލޭންކުރި މަޝްރޫއެއް މި މަޝްރޫއަކީ،'"ޔާމީން ވިދާޅުވި އެވެ.
ނަމަވެސް، ރިއަލް އެސްޓޭޓް މެދުވެރިކޮށް ބޭރުގެ ފަރާތްތަކަށް ނުވަތަ ޔަހޫދީންނަށް ރެސިޑެންސީ ރައިޓްސް ނުވަތަ އާބާދީވުމުގެ ހައްގު ދިނުމުގެ އެއްވެސް ވިސްނުމެއް އެމަނިކުފާނުގެ ޕްލޭންގައި ނޯންނާނެ ކަމަށް ރައީސް ޔާމީން ތަކުރާރުކޮށް ވިދާޅުވި އެވެ. އަދި ބޭރު ދީންތަކުގެ މީހުން އެތަނުގައި ވަޒަންވެރިކުރުވުމުގެ އެއްވެސް ވިސްނުމެއް ނެތް ކަމަށާއި، ގާނޫނަށް ބަދަލުުގެނެސްގެން ބޭރު މީހުންނަށް އެފަދަ ފުރުސަތުތަކެއް ދިނުމަކީ އެމަނިކުފާނު ގަބޫލުކުރައްވާ ކަމެއް ނޫން ކަމަށްވެސް ވިދާޅުވި އެވެ.
އެމަނިކުފާނުގެ ވެރިކަމުގައި ޤާނޫނަށް ގެނައި ހަމައެކަނި ބަދަލަކީ 99 އަހަރަށް ބިން ދޫކުރުން ކަމަށާއި، އެއީ ސްޕެޝަލް އެކޮނޮމިކް ޒޯން (އެސްއީޒެޑް) ގެ ދަށުން ބޮޑެތި އިގުތިސާދީ މަޝްރޫއުތައް ރާއްޖެއަށް ގެނައުމަށްޓަކައި ކުރެވުނު ކަމެއް ކަމަށް ރައީސް ޔާމީން ފާހަގަކުރެއްވިއެވެ.
ރަސްމާލެ މަޝްރޫއުއާ ގުޅޭ ގޮތުން ޔާމީން ވާހަކަ ދެއްކެވީ، އެތަނުގެ 500 ހެކްޓަރު އީގަލް ހިލްސް އަށް ދޫކޮށްލަން އެއްބަސްވެފައިވާ މައްސަލައިގަ އެވެ.
