ވެރިކަމުގައި ހުންނެވި މުހައްމަދު މުއިއްޒުއަށް 2028 ވަނަ އަހަރު އޮންނަ ރިޔާސީ އިންތިހާބު ކާމިޔާބު ކުރެވޭނެ އެއްވެސް ގޮތެއް ނެތް ކަމަށް މި ސަރުކާރުގައި އެމްޑަބްލިއެސްސީގެ މެނޭޖިން ޑިރެކްޓަރުކަން ކުރެއްވި އަބްދުލް މަތީން ވިދާޅުވެއްޖެ އެވެ.
އަދަދު ނޫހުން ގެނެސްދޭ އެތެރެފުށް ޕްރޮގްރާމުގައި ވާހަކަދައްކަވަމުން މަތީން ވިދާޅުވީ އެހެން ވިދާޅުވަނީ މުއިއްޒު އަމަލުކުރައްވާ ގޮތަށް ބިނާކޮށް ކަމަށެވެ.
"ރައީސް މުއިއްޒު ކަންކަން ކުރައްވާ ގޮތާއި އަމަލުކުރައްވަމުން ގެންދެވި ގޮތަށް ބަލާއިރު، 2028 ﷲ ގެ އިރާދަފުޅުން ރައީސް މުއިއްޒުއަށް ލިބިވަޑައިގަންނަވާނެ އެއްގޮތެއް ވެސް ނެތް،" މަތީން ވިދާޅުވި އެވެ.
ދެން އޮންނަ ރިޔާސީ އިންތިހާބު ކާމިޔާބު ނުކުރެވޭނެކަން ޚުދު މުއިއްޒުއަށް ވެސް އެނގިވަޑައިގަންނަވާނެކަމަށް މަތީން ވިދާޅުވި އެވެ.
އެ ޕްރޮގްރާމުގައި ވާހަކަދައްކަވަމުން މަތީން ވަނީ މި ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުވިދާޅުވެފަ އެވެ. އެއްވެސް ކަމެއްގައި މި ސަރުކާރުގެ ސީދާ މިސްރާބެއް ނެތް ކަމަށް މަތީން ވިދާޅުވި އެވެ. އޭގެ މިސާލެއްގެ ގޮތުން އޭނާ ދެއްކެވީ ރަސްމާލޭގެ ވާހަކަ އެވެ.
"މިހާރު ވެސް އެއްކަލަ ހަމަ އޮޔާ ދާ ބޮނބިގަނޑެއް ދާގޮތަށް މި ދަނީ، މިސާލަކަށް ރަސްމާލެއަށް ބަލާކަމުގައިވަންޏާ ވެސް ފުރަތަމަ ރާޖޫ ކިޔާ މީހަކާ ހަވާލުކުރީ ހަމަ އެއްވެސް ލާރިއެއް ނުދާގޮތަށް، ދެން އޭނަ ވެސް ހެދި އެއްޗެއް ހަދާފައި ދިޔައީ،" މަތީން ވިދާޅުވި އެވެ.
"ދެން އަނެއްކާ ލާރި ހޯދި ގޮތަކަށް ހޯދައިގެން އެތައް ހިއްކީ، ދެން އޭތި ދޭންވީތޯ ވިއްކަންވީތޯ، ހަދާނެ ގޮތެއް ނޭނގިގެން އެއްކަލަ ހޫނު ބޮނޑިބަތް ގުޅައެއް އަތަށް ލައިގެން އުޅޭކަހަލަ ގޮތަކަށް މި އުޅެނީ."
ރަސްމާލެ މަޝްރޫއަކީ ފެށުމުގައި ވެސް ގޯސް މަޝްރޫއުއެއް ކަމަށާއި ގޯހެއްގެ މައްޗަށް ބިނާކޮށް ފެށި މަޝްރޫއުއެއްގައި ހުސްވެސް ހެދޭނީ ގޯސްކަމަށް އޭނާ ވިދާޅުވި އެވެ.
ރަސްމާލެ މަޝްރޫއުއާ ގުޅުވައި ސަރުކާރަށް ފާޑުވިދާޅުވަމުން ދާތީ ސަރުކާރުގެ ބައެއް އިސް މަގާމުތަކުގައި ތިއްބެވި ބޭފުޅުން ދަނީ މަތީންއަށް ސޯޝަލްމީޑިއާގައި ބަހުގެ ހަމަލާތައް ދެމުންނެވެ.
