މާލެ ސަރަހައްދުގައި 350 ކިލޯއަށްވުރެ ބަރު އުޅަނދުތަކަށް ނުދުއްވޭ ގަޑިތަކެއް އިކޮނޮމިކް އެންޑް ޓްރާންސްޕޯޓް މިނިސްޓްރީން މިއަދު ކަނޑައަޅައިފި އެވެ.
މިނިސްޓްރީން ކުރި އިއުލާނެއްގައި ބުނީ 350 ކިލޯއަށްވުރެ ބަރު އުޅަނދުތަކާއި ފޯކްލިފްޓް، ޓްރަކް، ކްރޭން، ޓްރެއިލާފަދަ ބަރު އުޅަނދުފަހަރަށް ބޮޑުތަކުރުފާނު މަގު ފިޔަވައި މާލޭގެ އެހެނިހެން މަގުތަކާއި، ހުޅުމާލޭގެ މަގުތައް އަދި ބްރިޖާއި ހައިވޭގައި ހެނދުނު 06:00 އިން ހެނދުނު 08:30 އަށް ނުދުއްވޭނެ ކަމަށެވެ.
350 ކިލޯއަށްވުރެ ބަރު އުޅަނދުތަކާއި ފޯކްލިފްޓް، ޓްރަކް، ކްރޭން، ޓްރެއިލާފަދަ ބަރު އުޅަނދުފަހަރަށް ބޮޑުތަކުރުފާނު މަގު ފިޔަވައި މާލޭގެ އެހެނިހެން މަގުތައް އަދި ބްރިޖް ހައިވޭގައި ހެނދުނު 11:30 އިން މެންދުރު 01:30 އަށް ނުދުއްވޭނެ ކަމަށް ވެސް ވަނީ ކަނޑައަޅާފަ އެވެ.
މިގޮތަށް ނިންމީ މާލެ ސަރަހައްދުގެ މަގުތަކަކީ ހިނގާބިގާވެ އުޅޭ ފަރާތްތަކަށާއި އުޅަނދުތައް ދުއްވާ ފަރާތްތަކަށް ފަސޭހަ އަދި ރައްކާތެރި ތަނަކަށް ހެދުމަށްޓަކައި ހާއްސަކޮށް ދަރިވަރުންނަށާއި ބެލެނިވެރިންގެ ސަލާމަތާއި ރައްކާތެރިކަމަށްޓަކައި ކަމަށް މިނިސްޓްރީން ބުންޏެވެ.
މީގެއިތުރުން ސްކޫލް އޮންނަ ދުވަސްތަކުގައި ސްކޫލްތައް އާއްމުކޮށް ފެށޭ ގަޑިއާއި ނިމޭ ގަޑީގައި ސްކޫލްތަކުގެ ސަރަހައްދުގައި 350 ކިލޯއަށްވުރެ އެއްވެސް އުޅަނދެއް ދުއްވުމާއި، އެފަދަ އުޅަނދުތަކުގައި މުދާ އުފުންވެސް ވަނީ މަނާކޮށްފަ އެވެ.
މިނިސްޓްރީން ބުނީ އުޅަނދުތައް ދުއްވުން މަނާ ގަޑިތަކަށް އިހުތިރާމް ކުރުމަށް އެދޭ ކަމަށާއި އިއުލާނާ ހިލާފުވާ މީހުންނާމެދު އެއްގަމު ދަތުރުފަތުރުގެ ގާނޫނުގެ ދަށުން ފިޔަވަޅު އަޅާނެ ކަމަށެވެ.
އިކޮނޮމިކް މިނިސްޓްރީން ކުރިން ބުނެފައިވަނީ ބަރު އުޅަނދުތައް ދުއްވާ ގަޑި އާއި މުދާ އުފުލުން މަނާ ގަޑިތަކެއް ކަނޑައަޅަން ވިޔަފާރިވެރިންނާއެކު މަޝްވަރާތައް ކުރަމުންދާތާ ގިނަ ދުވަސްތަކެއްވެފައިވާ ކަމަށެވެ.
