ރިސޯޓު އާމްދަނީގެ 40 ޕަސެންޓު މާރުކުރަންޖެހޭ މައްސަލައިގައި، ބޭރުގެ އިންވެސްޓަރުންނާއި ދިވެހި ރިސޯޓު އޯނަރުން ވެސް ހިމެނޭހެން ކަންބޮޑުވުންތައް ބަންޑުންކޮށްލުމުން މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގެ ބައްދަލުވުމެއް ހޫނު ވެއްޖެ އެވެ.
އަދަދު ނޫހަށް މައުލޫމާތު ލިބިފައިވާ ގޮތުގައި އިއްޔެ ބޭއްވި މި ބައްދަލުވުމުގައި މަޓީގެ މެންބަރުންގެ ތެރެއިން 150 މަންދޫބުން ބައިވެރިވި އެވެ.
އޭގެ ތެރޭގައި ކްރައުން އެންޑް ޗަމްޕާގެ ޗަމްޕާ ހުސެއިން އަފީފާއި ޔުނިވާސަލް އާއިލާ އާއި ޕަލްސް ރިސޯޓްސްގެ މުހައްމަދު ހަލީލުގެ އިތުރުން ސަން ސިޔާމް ގްރޫޕު އަދި، ބޭރުގެ އޯނަރުންގެ ތެރެއިން ސޮނޭވާ އާއި އެމެރަލްޑް ރިސޯޓްސް އާއި ބަގްލިއޯނީގެ މަންދޫބުން ހިމެނެ އެވެ.
މަޓީގެ ބައްދަލުވުމުގައި ބައިވެރި 80 ޕަސެންޓަށް ވުރެ ގިނަ މީހުން ވަނީ މިހާރު މާރުކުރަން ކަނޑައަޅާފައިވާ މިންވަރާ މެދު ކަންބޮޑުވުން ފާޅުކޮށްފަ އެވެ. އަދި ބޭރުގެ އިންވެސްޓަރުން ވެސް ވަނީ މި ވަރަށް މާރުކޮށްގެން އެ މީހުންގެ ވިޔަފާރިތަކަށް ކެތް ނުވާނެ ކަމަށް ބުނެފަ އެވެ.
މި ބައްދަލުވުމުގެ ގިނަ ބައިވެރިން ވަނީ އެ މީހުންގެ ހައްގުގައި މަޓީން މަސައްކަތްކޮށްދޭން އެދިފަ އެވެ. ބައެއް އިންވެސްޓަރުން ވަނީ މި ބަދަލުތައް ގާނޫނު އަސާސީއާ ހިލާފު ކަމަށް ބުނެފަ އެވެ.
"ޓެކްސް ދައްކަފައި ދެން ހުންނަ ފައިސާއަކީ މުދާ. އެއެއް ދައުލަތަކަށް ނުނެގޭނެ. ނެގޭނީ ކޯޓަކުން ނިންމައި، އަދުލުވެރި ބަދަލެއް ދީފައި." އެކަކު ބުންޏެވެ.
ޑޮލަރު މާރުކުރުން ގާނޫނާ ހިލާފު ކަމަށް އިންވެސްޓަރުން ބުނީ، ގާނޫނު އަސާސީގެ 40 ވަނަ މާއްދާއާ ހަވާލާދީ އެވެ. މިއީ މުދާ ހޯދުމާއި ގެންގުޅުމުގެ ހައްގު ބަޔާންކުރާ މާއްދާ އެވެ.
އެ މާއްދާގެ (ށ) ގައި އޮންނަނީ މީސްމީހުންގެ މުދަލަކީ ނިގުޅައިގަނެގެންވާނޭ ތަކެއްޗެއް ނޫން ކަމަށެވެ. އާންމުވެގެންވާ މަންފާއަކަށްޓަކައި، ގާނޫނުގައި ކަނޑައެޅި ބަޔާންކޮށްފައިވާ ގޮތެއްގެމަތީން، އަދި އެކަމަށްޓަކައި ކޯޓަކުން ކުރާ ހުކުމަކުން މެނުވީ އެއްވެސް މީހެއްގެ މުދަލެއް އެ މީހެއްގެ ރުހުންނެތި ދައުލަތަށް ނަގައިގެނެއް ނުވެ އެވެ. އަދި މީހެއްގެ މުދަލެއް ދައުލަތަށް ނަގާންވާނީ ކޯޓުން ކަނޑައަޅާ އަދުލުވެރި ބަދަލެއް އެ މުދަލެއްގެ ވެރިފަރާތަށް ދިނުމަށްފަހުގައި ކަމަށް ވެސް ލިޔެފައި އޮވެ އެވެ.
މި ބައްދަލުވުމުގެ ތެރެއިން ހޫނު ބަހުސެއް ހިނގީ އަފީފާއި ހަލީލާ ދެމެދުގަ އެވެ. މި ދެ މީހުން އެކަކު އަނެކަކާ ބަހުގެ ހަމަލާތައް ބަދަލުކޮށްފައިވާއިރު، އަފީފު ވަނީ ޓޫރިޒަމް އެޑްވައިޒަރަކަށް ހުންނަވައިގެން ހަލީލު މި ކަންކަމާ ދެކޮޅަށް ނުތެދުވީ ކީއްވެގެންތޯ ސުވާލު ކުރައްވާފަ އެވެ. ރައްދުގައި ހަލީލު ވިދާޅުވީ އޭނާ އިސްތިއުފާ ދިނީ ސަރުކާރުން އޭނާގެ އަޑުނޭހީމަ ކަމަށެވެ.
ޑޮލަރު މާރުކުރަން ޖެހޭ މިންވަރު އިތުރުކުރުމާ ގުޅިގެން ޓޫރިޒަމް އިންވެސްޓަރުންގެ ކަންބޮޑުވުން ހުއްޓަސް، ސަރުކާރުން ބުނަނީ މި މިންވަރަށް ފައިސާ މާރުކޮށްގެން އެއްވެސް ދައްޗެއް ނުވާނެ ކަމަށެވެ. އަދި މި ގޮތަށް ނިންމީ ކުރަން ޖެހޭ ދިރާސާތައްކޮށް، ބަލަން ޖެހޭ ކަންކަން ބަލާފައި ކަމަށް ރައީސް މުހައްމަދު މުއިއްޒު ވެސް ވަނީ ވިދާޅުވެފަ އެވެ.
