ގިނަ ދަރިވަރުން އެއްތަންވާ ދަނޑިވަޅެއް ބަލައި، ތ. ތިމަރަފުށީ މަދުރުސާގެ ލެބޯޓަރީ ގޮއްވާލަން މަސައްކަތް ކުރި ކަމަށް ތުހުމަތު ކުރެވޭ މައްސަލައިގައި ދައުލަތުން ދައުވާ އުފުލި މީހުންގެ ތެރެއިން ކުށް ސާބިތުނުވި ތިން މީހަކަށް ރައްދުވާ ގޮތަށް މޮނިޓާކޮށް ކޮންޓްރޯލްކުރުމުގެ(މޮނިކޮން) އަމުރެއް މިދިޔަ އަންގާރަ ދުވަހު ނެރެފި އެވެ.
އަދަދު އަށް އެނގިފައިވާ ގޮތުގައި ހޯމް މިނިސްޓްރީން ހައި ކޯޓުގައި އެދުމުން މޮނިކޮން އަމުރު ނެރެފައިވަނީ މަދުރަސާ ގޮއްވާލަން އުޅުނު މައްސަލައިގައި ހިމެނޭ ތ. ތިމަރަފުށި، އަސުރުމާގެ، މުހައްމަދު އާސިރު އާއި ތ. ތިމަރަފުށި، އަސްރަފީވިލާ، އަހްސަން މުހައްމަދު އަދި ތ. ތިމަރަފުށި، ފެހިވިދުވަރުގެ، އަބްދުﷲ ޝަރީފްގެ މައްޗަށެވެ.
މި މައްސަލައިގައި ހިމެނޭ މީހުންގެ މައްޗަށް އުފުލި ދައުވާތަކުގެ ތެރޭގައި ޓެރަރިޒަމްގެ އަމަލެއް ކުރުމަށް ރޭވުމާއި، ޓެރަރިޒަމްގެ އަމަލެއް ކުރުމަށް ހިތްވަރު ދިނުމާއި، ޓެރަރިސްޓު ޖަމާއާތަކަށް ތާއީދުކުރާ މީހެއްކަން ދޭހަވާފަދަ ލިޔުމެއް ގެންގުޅުމާއި، ހަނގުރާމައަށް ދާން އުޅުމާއި، ޓެރަރިޒަމްގެ އަމަލެއް ކުރުމަށް ބޭނުންވާ އުކުޅުތައް ދަސްކުރުން އަދި އަދުލު އިންސާފު ގާއިމުކުރުމަށް ހުރަސްއެޅުން ހިމެނެ އެވެ.
ދައުވާ އުފުލި އަށް މީހުން:
- ތ. ތިމަރަފުށި، ކެނެރީގެ، އަލީ މުނީޒު
- ތ. ތިމަރަފުށި، އަސުރުމާގެ، މުހައްމަދު އާސިރު
- ތ. ތިމަރަފުށި، ފެހިވިދުވަރުގެ، އަބްދުﷲ ޝަރީފް
- ތ. ތިމަރަފުށި، އަސްރަފީވިލާ، އަހްސަން މުހައްމަދު
- ރ. މަޑުއްވަރި، ބީޗްހައުސް، އަބްދުﷲ އިމާދު
- ތ. ތިމަރަފުށި، ސައިމާ، ޝަމާހު ޝަރީފް
- ނ. ކުޑަފަރި، ރޯޒްމީޑު، ޢިބްރާހިމް ލޫތު
- ރ. ކަނދޮޅުދޫ، އަލީ އަރުހަމް މުހައްމަދު
އެ މީހުންގެ ތެރެއިން އަރުހަމް ފިޔަވައި އެންމެން ވަނީ މިނިވަންވެފަ އެވެ. އެއީ ބަންދުގެ މުއްދަތުގައި ޖަލު ހުކުމަށްވުރެ ގިނަ ދުވަސް ހޭދަކޮށްފައިވާތީ އެވެ.
މި މީހުން ވަނީ، ދައުލަތުން ތުހުމަތު ކުރާ ގޮތުގައި، ޓެރަރިސްޓް ޖަމާއަތެއް ކަމަށްވާ އައިއެސްގެ އިރުޝާދުގެ ދަށުން ރާއްޖޭގައި ޓެރަރިޒަމްގެ އަމަލުތައްކުރުމަށް ރާވައި އެކަމަށް އައީޑީއެއް ތައްޔަރުކޮށް ރާއްޖޭގެ އެކި ސަރަހައްދުތަކުގައި ގޮއްވާލަން އުޅެފަ އެވެ. ފުލުހުން ކުރިން ބުނެފައިވަނީ، ގޮއްވާލަން އުޅުނު އެއް ތަނަކީ ތިމަރަފުށީގެ ސްކޫލުގެ ލެބޯޓްރީ ކަމަށެވެ.
ތިމަރަފުށި މައްސަލައިގައި ހިމެނޭ މީހުން ތިބީ ހައްޔަރުކުރި ދުވަހުން ފެށިގެން ޝަރީއަތް ނިމެންދެން ބަންދުކޮށްފަ އެވެ. މި މީހުން ބަންދުގައި ތިބި މުއްދަތު ދިގުލައިގެން ދިޔުމުން "އެންޑް ވާނުވާ" އެއްވުންތަކުގައި އާއިލާތަކުން ބައިވެރިވެ އަޑު އުފުލާފައިވެ އެވެ.
