ޓެރަރިޒަމްއާ ގުޅުން ހުރި އިންޓެލިޖެންސް އިދާރާތަކުގެ މެދުގައި މައުލޫމާތު ބަދަލުކުރުމުގެ އޮނިގަނޑު އެކުލަވާލައި މައުލޫމާތު ހިއްސާ ކުރުމުގެ މަސައްކަތް މިއަދު ފަށައިފި އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ބޮމެއް ގޮއްވާލައި ދިން ޓެރަރިސްޓު ހަމަލާއާ ގުޅިގެން ރައްޔިތުންގެ މަޖިލީހުގެ 241 ކޮމިޓީން ހިންގި އިންކުއަރީން ފެންނަން އޮތީ އިންޓެލިޖެންސް އިދާރާތަކުގައި ބޮޑު "ބާގަނޑެއް" އުފެދިފައިވާ ކަމެވެ. ޓެރަރިޒަމް މަނާކުރުމުގެ ގާނޫނުގައި އިންޓެލިޖެންސް އިދާރާތަކުގެ ގޮތުގައި ކަނޑައަޅާފައިވާ ފުލުހުންނާއި އެމްއެންޑީއެފާއި ކަސްޓަމްސް އާއި އިމިގްރޭޝަންގެ އިތުރުން އެމްއެމްއޭ އިން މައުލޫމާތު ހިއްސާކުރާނެ އޮނިގަނޑެއް އެކުލަވާލަން ވެފައި އޮތަސް އެ އޮނިގަނޑެއް ނެތެވެ.
އެ އޮނިގަނޑު އެކުލަވާނުލައި އޮތުމަކީ 241 ކޮމިޓީން ފާހަގަކޮށްފައި އޮތް ގޮތުގައި ހޯމް މިނިސްޓަރު އިމްރާން އަބްދުﷲގެ އިހުމާލެކެވެ. އެއީ އޮނިގަނޑު އެކުލަވާލައި, މައުލޫމާތު ބަދަލުކުރޭތޯ މޮނިޓަކުރުން ވެސް ހޯމް މިނިސްޓަރުގެ ޒިންމާގެ ތެރޭގައި ހިމަނާފައިވާތީ އެވެ.
އިމްރާން ކުރެއްވި ޓުވީޓެއްގައި މިއަދު ވިދާޅުވީ އިންޓެލިޖެންސް އިދާރާތަކުގެ މެދުގައި މައުލޫމާތު ބަދަލު ކުރުމުގެ އަމަލީ މަސައްކަތް މިއަދު ފަށައިފައިވާ ކަމަށެވެ. އެ ނިޒާމު އިތުރަށް ހަރުދަނާކޮށް، ރައްކާތެރިކަމާ އެކު އަވަހަށް މިފަދަ މައުލޫމާތު ހިއްސާކުރުމާއި އެފަދަ މައުލޫމާތު އެނެލައިޒް ކުރުމުގެ ގާބިލުކަން މުއައްސަސާތަކުގައި އިތުރުކުރުމަށް ކުރަންޖޭހޭ އިތުރު މަސައްކަތް ކުރިއަށް އޮތްތަނުގައި ކުރަމުން ދާނެ ކަމަށް ވެސް މިނިސްޓަރު ވިދާޅުވި އެވެ.
"މިކަމަށްޓަކައި އެކުލަވާލަންޖެހޭ އިންތިޒާމް އެކުލަވާލައި މި މަސައްކަތް މިއަދު ފެށިގެން މިދިޔައީ ގާނޫނުގައި ބަޔާންކުރާ އިންޓެލިޖެންސް އިދާރާތަކުގެ ވަރަށް ބޮޑު އެހީތެރިކަމާ އެކު،" މިނިސްޓަރު ވިދާޅުވި އެވެ.
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލަން ދިން ޓެރަރިސްޓު ހަމަލާއާ ގުޅިގެން މަޖިލީހުގެ ސަލާމަތީ ހިދުމަތްތަކާބެހޭ (241) ކޮމިޓީން އެކުލަވާލި އިންކުއަރީ ރިޕޯޓުގައި ބުނެފައިވަނީ 2019 ވަނަ އަހަރު ޓެރަރިޒަމް މަނާ ކުރާ ގާނޫނަށް ގެނއި އިސްލާހަކާއެކު އިންޓެލިޖެންސް އޮނިގަނޑެއް ހަދަން އަންގާފައިވީ ނަމަވެސް މިހާތަނަށް އެކަން ކޮށްފައި ނުވާ ކަމަށެވެ.
އެގޮތުން އެމްއެންޑީއެފް އާއި ފުލުހުންގެ މެދުގައި ވެސް އިންޓެލިޖެންސް މައުލޫމާތު ހިއްސާ ކުރާނެ އުސޫލެއް ލިޔެފައި ނެތް ކަމަށް ރިޕޯޓްގައި ބުނެ އެވެ.
އިންކުއަރީއާ ހަމައަށް ވެސް އޮނިގަނޑު ނުނިމި އޮތީ, މިނިސްޓަރު ކުރިން ވިދާޅުވި ގޮތުގައި, ސަލާމަތީ ހިދުމަތްތަކުގެ މެދުގައި އޮތް ދެބަސްވުންތަކާ ހެދި އެވެ. އެއީ ޒަމާނުއްސުރެން އޮތް ކަމެއް ކަން ފާހަގަކުރައްވައި ވިދާޅުވީ ގާނޫނަށް ބަދަލު ގެނައީ, އެކަން އެހެން އޮތުން އެއީ އެންމެ ރަނގަޅު ގޮތަކަށް ނުވާތީ އެ ގޮންޖެހުންތަކުން އަރައިގަނެ ރައްޔިތުންގެ ސަލާމަތްތެރިކަން ކުރިއަށް ނެރެ, ރައްކާތެރިކަން ކަށަވަރުކުރުމަށްޓަކައި ސަލާމަތީ ހިދުމަތްތަކުގެ މެދުގައި އޮންނަން ޖެހޭ ގުޅުމާއި އެއްބާރުލުމާއި އިންޓެލިޖެންސް މައުލޫމާތު ބަދަލުކުރުމަކީ ކޮންމެހެން އޮންނަން ޖެހޭނެ ކަމެއް ކަމަށް ގަބޫލުކުރެވޭތީ ކަމަށެވެ.
