ރައްޔިތުން މަޖިލީހުގެ ރައީސް މުހައްމަދު ނަޝީދު އަވަހާރަ ކޮށްލަން ދިން ހަމަލާއާ ގުޅިގެން ފުލުހުންނާއި ސިފައިންގެ އިންޓެލިޖެންސްގެ އޮޑިޓެއް ހަދަން ރައީސް އިބްރާހިމް މުހައްމަދު ސޯލިހް އަންގަވައިފި އެވެ.
ނަޝީދުގެ ހާލުބެއްލެވުމަށް އޭޑީކޭއަށް ވަޑައިގަތުމަށްފަހު ނޫސްވެރިންނާ ވާހަކަ ދައްކަވަމުން ރައީސް ވިދާޅުވީ ނެޝަނަލް ސެކިއުރިޓީ ކައުންސިލާ ރޭ ބައްދަލުކޮށް އިންޓެލިޖެންސްގެ އޮޑިޓެއް ހަދަން އަންގަވާފައިވާނެ ކަމަށެވެ.
"އޭގައި ރަނގަޅު ކުރަން ހުރީ ކޮންކަންތައްތަކެއްތޯ އާއި އަދި މިވަރު ކަމެއް ވެގެން ދިޔައިރުގައި އިންޓެލިޖެންސްއާ ހިސާބަށް މިކަން ތިލަވެގެން ނައި ސަބަބާއި ނޭންގުނީ ކީއްވެގެންތޯ މިހުރިހާއެއްޗެއް ބަލާފައި،" އޭޑީކޭގެ ގޯތިތެރޭގައި ހުންނަވައި ރައީސް ވިދާޅުވި އެވެ.
މިހަމަލާ ދޭން އުޅޭކަމުގެ އިންޓެލިޖެންސް މައުލޫމާތު ދުރާލައި ލިބިފައި ނުވާ ކަމަށް ސިފައިންނާއި ފުލުހުން ވެސް ވަނީ ބުނެފަ އެވެ. އެހެންވެ އެ ދެ މުއައްސަސާއިން ވެސް އަންނަނީ އިންޓާނަލް ތަހުގީގުތައް ކުރަމުންނެވެ.
ރައީސް ވިދާޅުވީ އެމަނިކުފާނަށް ގަބޫލު ކުރެއްވޭ ގޮތުގައި އިންޓެލިޖެންސް މިހާރަށް ވުރެ ރަނގަޅު ކުރަން ޖެހޭ ކަމަށެވެ. އަދި ސަލާމަތީ ކަންކަން ވެސް މިހާރަށް ވުރެ ރަނގަޅުވާން ޖެހޭ ކަމަށް ވިދާޅުވި އެވެ.
ރައީސް ވިދާޅުވީ ސެކިއުރިޓީ ބެހޭ ގޮތުން ދިރާސާއެއް ހެދުމަށް ވެސް ސިފައިންނާ ހަވާލު ކުރައްވާފައިވާ ކަމަށެވެ. މިއަދުގެ ވަގުތެއްގައި އެމްއެންޑީއެފުން ރައީސް ނަޝީދުގެ ސެކިއުރިޓީއާ ބަލަހައްޓަމުން ގެންދިޔަ ގޮތާ ގުޅޭ ތަފްސީލީ ރިޕޯޓެއް އެމަނިކުފާނަށް ލިބޭނެ ކަމަށް ވެސް ރައީސް ވިދާޅުވި އެވެ.
މައްސަލައިގެ ތަހުގީގާ ގުޅޭގޮތުން ރައީސް ވިދާޅުވީ ތަހުގީގު ވަރަށް ބާރަށް ކުރިއަށްދާ ކަމަށެވެ. އެ މައްސަލާގެ ތުހުމަތުގައި ތިން މީހަކު ހައްޔަރު ކޮށްފައިވާއިރު ވަރަށް އަވަހަށް ތަހުގީގު ނިންމައި ދައުވާ ކުރަން ޕްރޮސިކިއުޓާ ޖެނެރަލްއަށް ފޮނުވޭނެ ކަމަށް ވެސް ރައީސް ވިދާޅުވި އެވެ.
"މީގެ ފަހަތުގައި އެތައް ބަޔަކު ހިމެނުމަކީ ވެސް އެކަށީގެންވާ ކަމެއް. ތަހުގީގު ވަރަށް ފުޅާކޮށް އެބަ ކުރިއަށް ގެންދޭ،" ރައީސް ވިދާޅުވި އެވެ.
ނަޝީދާ ބައްދަލު ކުރެއްވުމާ ގުޅޭގޮތުން ރައީސް ވިދާޅުވީ ނަޝީދުގެ ހާލު ވަރަށް ރަނގަޅަށް "ރިކަވާ" ވަމުން އަންނަ ކަމަށެވެ.
"ވަރަށް ގިނަ ވާހަކަ ދެއްކެވި އަޅުގަނޑާ. ރައްޓެއްސެއްގެ ހައިސިއްޔަތުން ދެއްކެވި ވާހަކައާއި އާއިލާއާއި ސަރުކާރާއި އެހެންގޮސް ވަރަށް ގިނަ ވާހަކަތަކެއް ދެއްކެވި. އަޅުގަނޑަށް ފެނުނީ ވަރަށް ހިތްވަރު ގަދަ ކޮށް އޮންނެވިތަން،" ރައީސް ވިދާޅުވި އެވެ.
ރައީސް ވަނީ ނަޝީދުގެ ހުރިހާ ސަޕޯޓަރުން ވެސް ހިތްވަރު ގަދަ ކުރެއްވުމަށް އެދިވަޑައިގެންފަ އެވެ. ދެން މިފަދަ ކަމެއް ވިޔަ ނުދިނުމަށްޓަކައި ކުރަން ޖެހޭ ހުރިހާ ކަމެއް ކުރައްވާނެ ކަމަށް ރައީސް ވިދާޅުވި އެވެ.
