ރައްޔިތުންގެ ޒާތީ ދިރިއުޅުމުގެ ތެރެއަށް ރައީސް މުހައްމަދު މުއިއްޒުގެ ސަރުކާރުން ވަންނަމުން ދަނީ އެއްވެސް ހައްދެއް، ހުދޫދެއް ނެތި ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
މި ސަރުކާރު އައުމަށް ފަހު ރައްޔިތުންގެ ޒާތީ ދިރިއުޅުން ކޮންޓްރޯލް ކުރުމަށް ގިނަ މަސައްކަތްތަކެއް ކުރަމުންދާ ކަމަށް ބުނެ އާންމުން އަންނަނީ ނުރުހުން ފާޅުކުރަމުންނެވެ. ވަކިން ހާއްސަކޮށް އެއްވެސް ދިރާސާއެއް ހެދުމެއް ނެތި އެތައް ކަމެއް މަނާކުރަން ސަރުކާރުން އުޅޭތީ އާންމުންގެ ކަންބޮޑުވުން އެބައޮތެވެ.
އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ޗެއާޕާސަންގެ މަގާމަށް ވެސް ވާދަކުރައްވަމުން އަންނަ ނަޝީދު މިއަދު ކުރެއްވި ޓްވީޓެއްގައި ވަނީ ސަރުކާރުން ކުރަމުންދާ ބައެއް ކަންކަމަށް ފާޑުވިދާޅުވެފަ އެވެ. މުއިއްޒުގެ ސަރުކާރުން މަސައްކަތް ކުރަނީ ރައްޔިތުންނަށް ތަނަވަސްކަން ހޯދައިދިނުމަށް ނޫން ކަމަށް ނަޝީދު ވިދާޅުވި އެވެ.
"ހިލާފު ހުރި ކަންކަން މަނާކޮށް، ހެޑްލައިން ހައްދަވާ ސަރުކާރެއްގެ ގޮތުގައި. ސިނގިރޭޓު ނުބޮވޭ ވަރަށް އަގުބޮޑު ކޮށްފި، ވޭޕަކީ ބްލެކް މާކެޓުގައި އެކަނިނ ލިބޭ އެއްޗަކަށް ހަދައިފި، ޝީޝާ މަނާކުރައްވަން މަޝްވަރާ ކުރައްވަނީ، ސްމާޓް ފޯން ބޭނުންކުރުން މަދުކުރަން ވަކާލާތު ކުރައްވަނީ،" ނަޝީދު ވިދާޅުވި އެވެ.
ސަރުކާރުން ވަނީ ސިނގިރޭޓު ޑިއުޓީ ދެގުނަކޮށްފަ އެވެ. ނަމަވެސް އެ ޑިއުޓީ ކުޑަކުރަން ދަނީ މަޝްވަރާ ކުރަމުންނެވެ. ވޭޕް މަނާކުރި ނަމަވެސް އަދިވެސް ކަޅު ބާޒާރުގައި ބަރާބަރަށް ވޭޕާއި އެއާ ގުޅޭ ސާމާނު ދަނީ ވިއްކަމުންނެވެ. ޝީޝާ މަނާކުރުމުގެ ވިސްނުމެއް ނެތް ކަމަށް ސަރުކާރުން ބުނެ އެވެ.
އިއްޔެގެ ވަގުތެއްގައި ސަރުކާރުން ވަނީ 16 އަހަރުން ދަށުގެ ކުދިންނަށް ސޯޝަލް މީޑިއާ ބޭންކުރާނެކަން ހާމަކޮށްފަ އެވެ.
"ޒާތީ ދިރިއުޅުމުގެ ތެރެއަށް ވަންނަވަނީ ހައްދެއް ހުދޫދެއް ނެތި. ދެން ހައްދަވާ ގޮތަކީ ލުއި ދެއްވާނެ ކަމަށް ދައްކަވަން، ކުރިން މަނާކުރެއްވި ކަންކަން ބަދަލުކުރައްވަނީ،" ނަޝީދު ވިދާޅުވި އެވެ.
ބޮޑެތި މީހުންނަށް ވެސް ހިޔާލު ފާޅުކުރުމާއި ބަސް ބުނުމަށް އެތަކެއް ހުރަސްތަކެއް މި ސަރުކާރުން ދަނީ ކުރިމަތިކުރުވަމުންނެވެ. ރައްޔިތުންގެ ޒާތީ ދިރިއުޅުމަކީ ހުރުމަތްތެރިވެގެންވާ ކަންކަން ކަމަށް ގާނޫނުއަސާސީގެ 24 ވަނަ މާއްދާގައި ބަޔާންކޮށްފައިވެ އެވެ.
