އަންނަ އަހަރުން ފެށިގެން ޑިޕާޗާ ޓެކްސްތަކާއި ޓޫރިޒަމް ދާއިރާގެ އެހެން ޓެކްސްތައް ބޮޑުވެ، ރާއްޖެ އަންނަން ބޭނުންވާ ޓޫރިސްޓުން ކުރަން ޖެހޭ ހަރަދުތައް އިތުރަށް ބޮޑުވާ ވާހަކަ ބައިނަލްއަގުވާމީ މީޑިއާތަކުން ރިޕޯޓުކުރަން ފަށައިފި އެވެ.
ދުނިޔޭގެ އެންމެ ބޮޑެތި މީޑިއާތަކުގެ ތެރޭގައި ހިމެނޭ އެމެރިކާގެ ސީއެންއެންގެ ޓްރެވަލް އެޑިޝަންގައި މިއަދު ޝާއިއުކޮށްފައިވާ ހަބަރެއްގައި މިކަމަށް އަލިއަޅުވާލާ ހަބަރެއް ލިޔެފައިވެ އެވެ. އެ ހަބަރުގައި މައިގަނޑު ގޮތެއްގައި އަންނަ މަހުގެ 1 އިން ފެށިގެން ޑިޕާޗާ ޓެކްސްއާ އެކީ ރާއްޖެ ދަތުރުކުރުމުގެ އަގު ބޮޑުވާ ވާހަކަ އެވެ.
ދެން މި ކަހަލަ ހަބަރެއް އޮތީ، އޭޝިއާ ޕެސިފިކް ސަރަހައްދުގެ ޓޫރިޒަމް ދާއިރާގެ ހަބަރުތައް ގެނެސްދޭ ޓީޓީޖީ އޭޝިއާގަ އެވެ. އެ ނޫހުގައި އޮތީ ޓެކްސްތައް ބޮޑުކުރުމާ ގުޅިގެން ރާއްޖޭގެ ޓޫރިޒަމަށް އޭގެ ނުރަނގަޅު އަސާރު ކުރާނެ ކަމަށެވެ. ޓީޓީޖީގެ ހަބަރުގައި ޑޮލަރު މާރުކުރުމާ ގުޅޭގޮތުން ރިސޯޓު ވިޔަފާރިތަކުގެ ހުރި ކަންބޮޑުވުންތަކުގެ ވާހަކަ ވެސް ހިމަނާފައި ވެ އެވެ.
ދުނިޔޭގެ މީޑިއާތަކުން ޓެކްސްތަކާ ހެދި ރާއްޖެ އިހުނަށް ވުރެ އަގު ބޮޑުވާ ހަބަރުތައް ގެނެސްދެމުން އަންނައިރު، ރާއްޖޭގައި ހަރަކާތްތެރިވާ ޓޫރިޒަމް ވިޔަފާރިތަކާއި އެ ވިޔަފާރިތަކާ ގުޅުން ހުރި ޖަމިއްޔާތަކުން ވެސް އަންނަނީ މިކަމުގެ ކަންބޮޑުވުން ފާޅުކޮށްފަ އެވެ.
އެ ގޮތުން ޓްރެވަލް އެޖެންސީތަކާއި ޓުވާ އޮޕަރޭޓަރުންގެ ޖަމިއްޔާ، މަޓާޓޯއިން މި ފަހުން ނެރުނު ބަޔާނެއްގައި ވަނީ އެއާޕޯޓުން ނަގާ ޓެކުހާއި ޑިވެލޮޕްމެންޓު ފީތައް ބޮޑު ކުރުމާ ގުޅިގެން ބަޖެޓު އެއާލައިންތަކަކުން ކަންބޮޑުވުން ފާޅުކޮށްފައިވާ ކަމަށް ބުނެ ޓްރާންސްޕޯޓު މިނިސްޓަރު މުހައްމަދު އަމީންއަށް ސިޓީއެއް ފޮނުވާފަ އެވެ. އެ ޖަމިއްޔާއިން ވަނީ މަޝްވަރާގެ މޭޒަށް އައުމަށް ވެސް ސަރުކާރަށް ގޮވާލާފަ އެވެ.
ޓެކްސްތަކަށް އަންނަ ބަދަލުތަކަށް ބަލާއިރު އަންނަ އަހަރު ޓީޖީއެސްޓީ އަންނަނީ އެއް ޕަސެންޓުގެ އިތުރުވުމެކެވެ. އޭރުން ދެން ނަގާނީ މިހާރު ނަގާ 16 ޕަސެންޓުގެ ބަދަލުގައި 17 ޕަސެންޓެވެ. މި އަދަދަށް ޓެކްސް ނަގަން ފަށާނީ އަންނަ އަހަރުގެ ޖޫން މަހުން ފެށިގެންނެވެ.
ނަމަވެސް ގްރީން ޓެކްސް ޖެނުއަރީން ފެށިގެން ބޮޑުވާނެ އެވެ. އެއީ ރިސޯޓުތަކާއި ސަފާރީތަކާއި ބޮޑެތި ހޮޓާތަކަށް އަންނަ ޓޫރިސްޓުންގެ އަތުން މިހާރު ނަގާ ހަ ޑޮލަރު 12 ޑޮލަރަށެވެ. އަދި ގެސްޓުހައުސްތަކަށް އަންނަ ޓޫރިސްޓުންގެ ނަގާ ތިން ޑޮލަރު ހަ ޑޮލަރަށެވެ.
އެއާޕޯޓު ޓެކްސްއަށް އަންނަ ބަދަލަކީ އިކޮނޮމީ ކްލާހުން ދަތުރުކުރާ ޓޫރިސްޓުންގެ އަތުން މިހާރު ނަގާ 30 ޑޮލަރު 50 ޑޮލަރަށް ބޮޑުވުމެވެ. ބިޒްނަސް ކްލާހުން ދަތުރުކުރާ ޓޫރިސްޓުންގެ ޓެކްސް ދެ ގުނަ ބޮޑުވެ މިހާރު ނަގާ 60 ޑޮލަރުގެ ބަދަލުގައި 120 ޑޮލަރު ނަގާނަ އެވެ. އަދި ފަސްޓް ކްލާހުގައި ދަތުރުކުރާ މީހުންގެ އަތުން ނަގާ ޓެކްސް 90 ޑޮލަރުން 240 ޑޮލަރަށް ބަދަލުވާނެ އެވެ.
ސަރުކާރުން ޓެކްސްތައް ބޮޑުކުރަން ނިންމީ ޑޮލަރު ތާށިކަމާ ހުރެ އަޅާ ފިޔަވަޅުތަކުގެ ތެރެއިންނެވެ. މިހެން ނަމަވެސް އެންމެ ފަހުން ވެސް ޓެކްސްތައް ބޮޑުކުރި އަހަރު ޓޫރިޒަމް ސިނާއަތަށް ބޮޑު ލޮޅުމެއް އައިކަން ފާހަގަކޮށްލެވެ އެވެ. އެ ފަހަރު އެންމެ ބޮޑު އަސަރެއް ކުރީ ޓީޖީއެސްޓި 12 ޕަސެންޓުން 16 ޕަސެންޓަށް ބޮޑުކުރުމުންނެވެ.
