އަމަނަށް ވަކާލާތު ކުރުމުގެ ބަދަލުގައި އިރާނުގެ ހަމަލާތައް ވަރުގަދަ ކުރަން މުއިއްޒު ގޮވާލެއްވުމުން ފަތުރުވެރިކަމަށް އަސަރުކޮށްފި

Mar 25, 2026, 8:04 AM
ރައީސް މުއިއްޒު އިވެންޓެއްގައި ވާހަކަ ދައްކަވަނީ.

ރައީސް މުއިއްޒު އިވެންޓެއްގައި ވާހަކަ ދައްކަވަނީ.

މެދުއިރުމަތީގައި ކުރަމުންދާ ހަނގުރާމަ ހުއްޓާލައި، އަަމަން ގާއިމް ކުރަން ވަކާލާތު ކުރެއްވުމުގެ ބަދަލުގައި އިރާނުން އިޒްރޭލާއި އެމެރިކާއަށް ދެމުންދާ ހަމަލާތައް ވަރުގަދަ ކުރަން ރައީސް މުހައްމަދު މުއިއްޒު ގޮވާލެއްވުމުން ދިވެހި ފަތުރުވެރިކަމަށް އޭގެ ނޭދެވޭ އަސަރުކޮށްފި އެވެ.

މިދިޔަ ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި އަރަބި ގައުމުތަކުގައި އެމެރިކާއިން ގާއިމްކޮށްފައިވާ އަސްކަރީ މަރުކަޒުތަކަށް ހަމަލާދޭން ހިތްވަރުދެއްވައިފަ އެވެ. އަދި އެމަނިކުފާނު ބޭނުންވެވަޑައިގަންނަވަނީ އިރާނުން އިޒްރޭލަށް "ރެއާއި ދުވާލު" ހަމަލާދޭން ކަމަށް ވެސް އެމަނިކުފާނު ވިދާޅުވި އެވެ.

އެ މައްސަލައިގައި ކަންބޮޑުވެގެން ދެ ރިސޯޓެއްގެ މެނޭޖާ ލެވެލްގެ މުވައްޒަފުން އަދަދު އާ ވަނީ ވާހަކަ ދައްކައިފަ އެވެ. ވަޒީފާގެ ގޮތުން މަސްލަހަތު ހިމާޔަތް ކުރުމަށްޓަކައި ނަން ނުޖެހުމަށް ޝަރުތުކޮށް ވާހަކަ ދެއްކި އެ މީހުން ބުނީ، އެންމެ ބޮޑު ކަންބޮޑުވުމަކީ ރާއްޖެއާމެދު ފަތުރުވެރިން ދެކޭ ގޮތް ބަދަލުވުން ކަމަށެވެ.

"ރައީސްގެ ވާހަކަތަކުން ގެސްޓުންނަށް ހީވަނީ ދިވެހިރާއްޖެ ސްޓޭބަލްއެއް ނޫނޭ. މިވަގުތު ތިބި ގެސްޓުންގެ ފަރާތުން ވެސް އިއްޔެ ވަރަށް ސުވާލު އައި. ތެދެއްހެއްޔޭ، ރައީސް ހަމަ އެހެން ވިދާޅުވިހޭ. ދެން ބަޓްލަރުން މި ޖެހެނީ ކޮންމެވެސް އެއްޗެކޭ ކިޔައިގެން އެކަން ހަމަޖައްސާލަން،" ފަސް ތަރީގެ ރިސޯޓަކުން ވާހަކަ ދެއްކި ސީނިއާ މުވައްޒަފަކު ބުންޏެވެ.

ރާއްޖޭގައި މިވަގުތު 171 ރިސޯޓާއި 849 ގެސްޓްހައުސް އޮޕަރޭޓު ކުރާ ކަމަށް ޓޫރިޒަމް މިނިސްޓްރީގެ ވެބްސައިޓުން ދައްކަ އެވެ. ފަތުރުވެރިކަމުގެ އިންޑަސްޓްރީއަކީ ރާއްޖޭގެ ޖީޑީޕީއަށް 28 ޕަސެންޓެވެ. އަދި ރާއްޖެއަށް ވަންނަ ބޭރު ފައިސާގެ 62 ޕަސެންޓު ވަންނަނީ ވެސް ފަތުރުވެރިކަމުގެ ދާއިރާއިންނެވެ.

ފަތުރުވެރިކަމުގެ ދާއިރާއަކީ ރާއްޖޭގައި އެންމެ ގިނަ ވަޒީފާ އުފައްދާ ދާއިރާ އެވެ. ރާއްޖޭގެ ރިސޯޓުތަކުގައި އެކަނި ވެސް 52،218 މުވައްޒަފުން މަސައްކަތް ކުރެ އެވެ. އޭގެ ތެރެއިން 15،041 މީހުންނަކީ ދިވެހިންނެވެ.

މި ނޫހާ ވާހަކަ ދެއްކި އެހެން ރިސޯޓެއްގެ މެނޭޖަރަކު ބުނީ، ހަނގުރާމައިގެ ސަބަބުން ފަތުރުވެރިކަން އަޑިއަޅާލާފައި އޮތް ދަނޑިވަޅެއްގައި ރައީސް މުއިއްޒު އެ ވާހަކަތައް ދެއްކެވުމެވެ. ފަތުރުވެރިކަން ކޮޅަށް ޖަހަން އޭގެ ސަބަބުން އިތުރު ގޮންޖެހުންތަކެއް ކުރިމަތިވާނެ ކަމަށް އޭނާ ދެކެ އެވެ.

"ގެސްޓުންނަށް ފެންނާނީ މީޑިއާގައި އޮންނަ އެއްޗެއް. އޭގެން އެ މީހުން ނިންމާނީ ރާއްޖެއާމެދު ދެކޭ ގޮތެއް. ކޮންމެ މީހަކު ވެސް މިހާރު ގައުމަކަށް ފުރުމުގެ ކުރިން ފޯނުން ހަބަރުތައް ބަލައިލާނެ. އިއްޔެ މީޑިއާގައި ރައީސް ގޮވާލެއްވީ ޕީސްއަކަށް [ސުލްހައަކަށް] ނޫން. އަހަރުމެންގެ ސްޓާފުންނާ ގުޅުން ބަދަހިވެފަ ތިބި ވަކިވަކި ގެސްޓުންނާ ގުޅައިގެން މި ރާއްޖެއަކަށް ނުރައްކަލެއް ނެތޭ، ގައުމު ސްޓޭބަލްއޭ ކިޔައިގެން ވެސް ގެސްޓުން ގެނެވޭތޯ މި މަސައްކަތް ކުރަނީ،" އެހެން ރިސޯޓަކުން ވާހަކަ ދެއްކި މުވައްޒަފަކު ބުންޏެވެ.

ހޯމަ ދުވަހު ބޭއްވި ނޫސްވެރިންގެ ބައްދަލުވުމުގައި ރައީސް މުއިއްޒު ވިދާޅުވީ، ރާއްޖޭގެ ސިޔާސަތީ އިރާނުން އެމެރިކާ އާއި އިޒްރޭލުގެ އަސްކަރީ މަރުކަޒުތަކަށް ހަމަލާދިނުން ކަމަށެވެ.

"މި ހަނގުރާމަ ކުރާ ދެ ފަރާތަށް، އިރާނަށް ހަމަލާ ދޭ އެމެރިކާ އާއި އިޒްރޭލުގެ ތަންތަނަށް [އަސްކަރީ ބޭސްތަކަށް] އެ ސަރަހައްދުގެ މުސްލިމުންނަށް ގެއްލުން ނުވާ ގޮތަށް އެކަން ހިނގުމަކީ ކަން ނޭނގެ މިކަން ވާން ޖެހޭނެ ގޮތަކީ. އެއީ ދިވެހި ސަރުކާރުގެ ސިޔާސަތަކީ،" ރައީސް މުއިއްޒު ވިދާޅުވި އެވެ.

އިޒްރޭލަށް ވަރުގަދަ ހަމަލާތަކެއް ދިނުމަށް ވެސް އެ ބައްދަލުވުމުގައި ރައީސް ގޮވާލެއްވި އެވެ.

"އެ ހަނގުރާމަ ޖެހޭނީ މިހާރުން މިހާރަށް ހުއްޓެން. އެ ހަނގުރާމައިގައި ހަމަލާދޭ އެއްވެސް ފަރާތަކުން ދެމުން އެ ދަނީ ދީގެންވާނެ ހަމަލާއެއް ނޫން. އިރާނުން ހަމަލާ ދެންޏާ ދޭން ޖެހޭނީ ސީދާ އިޒްރޭލަށް. އެއީ އަޅުގަނޑުމެން ގަބޫލުކުރާ ގޮތް. އިޒްރޭލަށް ހަމަ ހަމަލާ ދޭންވީ ހަމަ ރެއާއި ދުވާލު. އަޅުގަނޑުމެން ވަރަށް ބޭނުން އެކަން އެގޮތަށް ދާން،" މުއިއްޒު ވިދާޅުވި އެވެ.

އޭގެ އިތުރުން، ރައީސްގެ ވާހަކަތަކުގެ ސަބަބުން ޑިޕްލޮމެޓިކް މައްސަލަތަކެއް ކުރިމަތިވާނެ ކަމަށް ވެސް ބެލެވެ އެވެ. އެމެރިކާއަށް ހަމަލާދޭން ރައީސް ހިތްވަރު ދެއްވީ އެ ގައުމުގެ ރައީސް ޑޮނަލްޑް ޓްރަމްޕު ރާއްޖެއަސް ފޮނުއްވި މަންދޫބަކު ރާއްޖޭގައި ހުންނަވަނިކޮށެވެ. އެންމެ ފަހުން އޭނާ ފުރީ މުއިއްޒާއެކު ބައްދަލުވުމެއް ހަމަޖެއްސުމަށްފަހު އެޕޮއިންޓްމަންޓް ކެންސަލްކޮށްފަ އެވެ.

ކޮމެންޓް

ފަހުގެ ޚަބަރު

ރަސްމާލެ ޑީލު ހުއްޓުވަން އިންޑިއިން އުޅޭ ކަމަށް ތުހުމަތުކޮށްފި

ރަސްމާލެ މަޝްރޫއުގެ ބައެއް ޔޫއޭއީގެ ކުންފުންޏަކަށް ދޫކޮށްލުމަށް ކުރި މަސައްކަތް ހުއްޓުވުމުގައި އިންޑިއާ ސަރުކާރާއި ރާއްޖޭގެ ޓޫރިޒަމް ދާއިރާގެ ބޭފުޅުންގެ އަތެއްވާ ކަމަށް ސްޓޭޓް މިނިސްޓަރު ނާޒިމް ތުހުމަތުކުރައްވައިފި. ލީކުވި އޯޑިއޯއެއްގައި ނާޒިމް ވިދާޅުވެފައިވަނީ އިންޑިއާއަށް ދައްކަންޖެހޭ ދަރަނި ފަސްކޮށްނުދީ ހިފެހެއްޓި ކަމަށް.

އަލައްބާރާއި ޒަޔަނިސްޓުންނާ މިހާރު ގުޅުމެއް ނެތް: މުއްތަލިބު

ޔޫއޭއީގެ އީގަލް ހިލްސްގެ ވެރިޔާ މުހައްމަދު އަލައްބާރަކީ ޒަޔަނިސްޓުންނާ ގުޅުން އޮތް މީހެއް ނޫން ކަމަށް ވިދާޅުވެ، މިނިސްޓަރު މުއްތޮލިބު އޭނާގެ ދިފާއުގައި ވާހަކަދައްކަވައިފިއެވެ. ލީކުވި އޯޑިއޯއެއްގައި މުއްތޮލިބު ވިދާޅުވީ، އަލައްބާރުގެ ކުރީގެ ގުޅުންތަކާ ބެހޭގޮތުން ސުވާލުކުރެއްވި ކަމަށާއި، އޭނާއަކީ މިހާރު ފަލަސްތީނަށް އެހީތެރިވަމުންދާ މީހެއް ކަމަށެވެ. އަދި ރަސްމާލެ މަޝްރޫއުގެ ތެރެއިން ޒަޔަނިސްޓުން ވަޒަންވެރިވެދާނެ ކަމުގެ ބިރު އޮތް ކަމަށް ގަބޫލުނުކުރައްވާ ކަމަށްވެސް މިނިސްޓަރު ވިދާޅުވިއެވެ.

ރަސްމާލޭގައި ކްރިސްމަސްވެސް ފާހަގައެއް ނުކުރެވޭނެ: މުއްތޮލިބު

ރަސްމާލެ ތަރައްޤީކުރާ ފަރާތާއެކު ވެވޭ އެއްބަސްވުމުގައި، އެތަނުގައި ކްރިސްމަސް ފަދަ އެހެން ދީންތަކުގެ ޝިއާރުތައް ފާހަގަކުރުން މަނާކުރާ މާއްދާއެއް ހިމަނާނެ ކަމަށް މިނިސްޓަރު މުއްތޮލިބު ވިދާޅުވެއްޖެއެވެ. މިނިސްޓަރު މިހެން ވިދާޅުވީ ދީނީ އިލްމުވެރިންނާއެކު ބޭއްވި ބައްދަލުވުމެއްގައި، ރާއްޖޭގެ ގާނޫނުތަކާއި އިސްލާމީ އުސޫލުތަކާ ހިލާފު ކަންކަމަށް ފުރުސަތު ނުދޭނެކަން ކަށަވަރުކޮށްދެއްވުމުގެ ގޮތުންނެވެ.

ރަސްމާލޭގެ ޕްރޮޕަޓީ ދެނީ ހުސްނުވާ 99 އަހަރަށް ކަމަށް!

ރަސްމާލޭގެ ރިއަލް އެސްޓޭޓް މަޝްރޫއުގެ ދަށުން ބިން ދޫކުރަނީ 99 އަހަރުގެ މުއްދަތު ހަމަނުވާނެ ފަދަ މެކޭނިޒަމެއްގެ ދަށުން ކަމަށް ހައުސިން މިނިސްޓަރު މުއްޠަލިބު އެއްބަސްވެވަޑައިގެންފިއެވެ. މި އުސޫލުގެ ދަށުން ޕްރޮޕަޓީ ވިއްކާލާ ކޮންމެ ފަހަރަކު ސަރުކާރުން ފީއެއް ނެގުމަށްފަހު، އަލުން 99 އަހަރުގެ އާ ލީސްއެއް ދޫކޮށް މުއްދަތު އައުކޮށްދޭނެއެވެ.

ހުޅުމާލޭ ފޭސް 3 ހިއްކުމުގެ އަގަކަށް އެމްއޭސީއެލްއަށް ވެސް ބިން

ހުޅުމާލެ ފޭސް ތިނަކާއި ތިލަފުށީގެ ބިން ހިއްކުމުގެ މަސައްކަތް އެމްއޭސީއެލްގެ ސަބްސިޑަރީ ކުންފުންޏަކާ ހަވާލުކުރީ، މަސައްކަތުގެ އަގުގެ ގޮތުގައި ފައިސާގެ ބަދަލުގައި ލިބެނީ ބިން. މިއީ ކުރިން ސީއެމްސީއާ ވެސް އެއްބަސްވީ ގޮތް. އަދި މި މަޝްރޫއުގެ އަމަލީ މަސައްކަތް ސަބް ކޮންޓްރެކްޓް އުސޫލުން ކުރަނީ މިހާރު ވެސް ސީއެމްސީއިން.

ކުޅުދުއްފުށީ އިންޑަސްޓްރިއަލް ޒޯން ކައުންސިލް އަތުން ނަގައިފި

ކުޅުދުއްފުށީ ސީޕޯޓް ފުޅާކުރުމުގެ މަޝްރޫއަށް ބޭނުންވާތީ، އެ ރަށުގެ އިންޑަސްޓްރިއަލް ޒޯން ސިޓީ ކައުންސިލްގެ އިހުތިސާސުން ވަކިކޮށް ސަރުކާރަށް ވަނީ ނަގާފައި. ލާމަރުކަޒީ ގާނޫނަށް ގެނައި ބަދަލުގެ ދަށުން ނެގި މި ބިމުގައި ޕޯޓުގެ ޚިދުމަތްތަކާއި ވެއާހައުސިން ފަދަ ވަސީލަތްތައް ގާއިމުކުރުމަށް ވަނީ ހަމަޖެހިފައި.

އޭސީސީން ގާބިލު އިންވެސްޓިގޭޓަރުން ބިނާކުރުމަށް ކޯހެއް ފަށަނީ

ކޮރަޕްޝަންގެ މައްސަލަތައް ތަހުގީގުކުރާނެ ގާބިލު މީހުން ބިނާކުރުމަށްޓަކައި، "ޑިޕްލޮމާ އިން ކޮރަޕްޝަން އިންވެސްޓިގޭޝަން" ކޯސް 2027 ވަނަ އަހަރު ފެށުމަށް އެންޓި-ކޮރަޕްޝަން އެކަޑަމީން ވަނީ ނިންމާފައެވެ. މި ކޯހުގެ މަގްސަދަކީ މި ދާއިރާއަށް ބޭނުންވާ ފަންނީ މުވައްޒަފުންގެ ދަތިކަން ހައްލުކޮށް، ޒަމާނީ ވަސީލަތްތަކާއެކު ތަހުގީގީ ދާއިރާ ހަރުދަނާކުރުމެވެ.

Newsletter

Get the latest news delivered straight to your inbox