އިރާން ހަނގުރާމައާ ގުޅިގެން ދުނިޔޭގެ ހަކަތައިގެ ބާޒާރުގެ ސަޕްލައި ބުރޫއަރައި، ތެލާއި ތެލުގެ އުފެއްދުންތަކުން އަގު ބޮޑުވަމުންދާ ދަނޑިވަޅެއްގައި، މޯލްޑިލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވިއްކާ ޖެޓް ފިއުލްގެ އަގު އަނެއްކާވެސް ބޮޑުކޮށްފި އެވެ.
އެމްއޭސީއެލްއިން މިއަދުން ފެށިގެން ގެނައި މި ބަދަލާއެކު، ޖެޓް ފިއުލް ލީޓަރެއްގެ އަގު ވަނީ 1.99 ޑޮލަރަށް އުފުލިފަ އެވެ.
މިއީ ފެބްރުއަރީ 28، ގައި އިރާނު ހަނގުރާމަ ފެށުނު ފަހުން މިއީ ޖެޓް ފިއުލްގެ އަގަށް ބަދަލު ގެނައި ތިން ވަނަ ފަހަރެވެ. އެ ހަނގުރާމަ ފެށުމުގެ ކުރިން ޖެޓް ފިއުލް ލީޓަރެއް ވިއްކަމުން ދިޔައީ 1.19197 ޑޮލަރަށެވެ.
ނަމަވެސް، ފާއިތުވި ކުރު މުއްދަތުގެ ތެރޭގައި އަގުތައް އުފުލިފައިވަނީ ތިރީގައިވާ ތަރުތީބުންނެވެ؛
- މާޗު 9: 1.69 ޑޮލަރަށް
- މާޗު 28: 1.85 ޑޮލަރަށް
- އޭޕްރީލް 3 (މިއަދު): 1.99 ޑޮލަރަށް
މި ބަދަލުތަކާއެކު، ހަނގުރާމަ ފެށުނު ފަހުން މިހާތަނަށް ޖެޓް ފިއުލްގެ އަގަށް ވަނީ ގާތްގަނޑަކަށް 67 ޕަސެންޓުގެ ބޮޑުވުމެއް އައިސްފަ އެވެ.
ޖެޓް ފިއުލްގެ އަގު އުފުލުމަކީ ރާއްޖޭގެ އޭވިއޭޝަން ސިނާއަތަށާއި ޓޫރިޒަމަށް އޭގެ ނޭދެވޭ އަސަރު ވަރަށް ބޮޑަށް ކުރާނެ ކަމެއް ކަމަށް ދާއިރާގެ ތަޖުރިބާކާރުން ބުނެ އެވެ.
އޭނާ އިތުރަށް ފާހަގަކުރެއްވި ގޮތުގައި، އެއާލައިންތަކުގެ ހިންގުމުގެ ހަރަދުގެ ބޮޑު ބައެއް ތެލަށް ހޭދަވާތީ، ތެލުގެ އަގު އުފުލުމަކީ އެއާލައިންތަކުން ފިއުލް ސާޗާޖް ބޮޑުކޮށް، ޓިކެޓުގެ އަގު އުފުލަން މަޖުބޫރުވާނެ ކަމެކެވެ. މީގެ ސަބަބުން ރާއްޖެއަށް އަންނަ ފަތުރުވެރިންގެ އަދަދަށް އަސަރުކޮށް، މުޅި އިގްތިސާދަށް އޭގެ އަސަރު ކުރާނެ އެވެ.
"މިއީ އިންޑަސްޓްރީ އަށް އަދި ރާއްޖޭގެ ޓޫރިޒަމަށް ވެސް ގެއްލުން ލިބޭނެ ކަމެއް. ޖެޓް ފިއުލުގެ އަގަށް އަންނަ ކޮންމެ ބަދަލެއް ޓިކެޓުގެ އަގަށް އަންނާނެ،" އޭވިއޭޝަން ދާއިރާގެ ތަޖުރިބާކާރަކު ވިދާޅުވިއެވެ.
ޖެޓް ފިއުލްގެ އަގު ބޮޑުކުރުމާ ގުޅޭ ގޮތުން އެމްއޭސީއެލްގެ ބަހެއް ނުލިބުނެވެ. މީގެ ކުރިން ފިނޭންސް މިނިސްޓަރު މޫސާ ޒަމީރު ވިދާޅުވެފައި ވަނީ، ފައިދާ ލާފައި ނޫނީ ޖެޓް ފިއުލް ނުވިއްކަން އެމްއޭސީއެލްއަށް އިރުޝާދު ދީފައިވާ ކަމަށެވެ.
