އިޒްރޭލްގެ ޕާސްޕޯޓުގައި ރާއްޖެއަށް އެތެރެވުން މަނާކުރަން އިދިކޮޅު އެމްޑީޕީން މިހާރު މަޖިލީހަށް ހުށަހަޅާފައިވާ ބިލަށް ބަދަލުތަކެއް ގެންނަ ޖެހޭ ކަމަށް އެޓާނީ ޖެނެރަލް އަހުމަދު އުޝާމް ވިދާޅުވެއްޖެ އެވެ.
އިޒްރޭލް ޕާސްޕޯޓު މަނާކުރުމަށްޓަކައި ގާނޫނަށް ގެންނަންޖެހޭ ބަދަލުތައް ގެނައުމަށް ކެބިނެޓުން ޖޫން 2، 2024، ގައި ނިންމީ ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ގަތުލްއާންމާ ގުޅިގެން ގިނަ ބަޔަކު އެކަމަށް ގޮވާލަމުން ދަނިކޮށެވެ. އޭގެ ތިން ދުވަސް ކުރިން އެގޮތަށް ގާނޫނު އިސްލާހުކުރުމަށް އިދިކޮޅު އެމްޑީޕީގެ ފަރާތުން ގަލޮޅު ދެކުނު ދާއިރާގެ މެމްބަރު މީކާއިލް ނަސީމް ވަނީ މަޖިލީހަށް ބިލެއް ހުށަހާޅާފަ އެވެ.
އިމިގްރޭޝަން ގާނޫނަށް ހުށަހެޅި އިސްލާހުގައި ބުނެފައި ވަނީ ރާއްޖެ އެތެރެ ނުވެވޭނެ މީހުންގެ ތެރޭގައި އިޒްރޭލު ޕާސްޕޯޓު ގެންގުޅޭ މީހުން (މީގެ ތެރޭގައި އިޒްރޭލުގެ ޕާސްޕޯޓުގެ އިތުރުން، އެހެން ގައުމެއްގެ ޕާސްޕޯޓު ގެންގުޅޭ މީހުން ވެސް) ހިމެނޭނެ ކަމަށެވެ. އެ ބިލު މިހާރު އޮތީ ކޮމިޓީއަށް ފޮނުވި ގޮތަށް މަސައްކަތް ނުފެށި މަޑުޖެހިފަ އެވެ.
އެކަމާ ގުޅޭގޮތުން އަދާހަމައެއް ހޯދުމަށް އެދުމުން އޭޖީ އުޝާމް "އަދަދު" އާ ފޯނުން ވާހަކަ ދައްކަވަމުން ވިދާޅުވީ، ސަރުކާރުގެ ނިންމުމާއެކު އާ ބިލެއް ހުށަނޭޅީ މަޖިލީހުގެ ގަވާއިދުން އެކަމަށް ޖާގަ ނުދޭތީ ކަމަށެވެ. ނަމަވެސް މިހާރު އޮތް ބިލުގެ މަސައްކަތުގައި އޭޖީ އޮފީހުން އެއްބާރުލުން ދޭނެ ކަމަށް އޭނާ ވިދާޅުވި އެވެ.
"މިހާރު ހުށަހަޅާފަ އޮތް ބިލަށް ކޮންމެވެސް ވަރެއްގެ ބަދަލެއް ގެންނަންޖެހޭ. ދެން ކެބިނެޓުގަ ނިންމާފަ އޮތް ނިންމުންތަކާ އެއްގޮތަށް ބިލު އިސްލާހުކޮށްގެން މަޖިލީހުން ކުރިއަށް ގެންދަން ޖެހޭނީ،" އުޝާމް ވިދާޅުވި އެވެ.
ކެބިނެޓުގެ ނިންމުމުގައި ވަނީ އިޒްރޭލު ޕާސްޕޯޓު މަނާކުރުން ނަމަވެސް، އޭގެ 10 ދުވަސް ފަހުން އުޝާމް ވަނީ އިޒްރޭލު ޕާސްޕޯޓު އޮންނަ އެއްވެސް މީހަކަށް ރާއްޖެއަށް ދަތުރު ނުކުރެވޭ ގޮތަށް "ބްލޭންކެޓްކޮށް" ޕާސްޕޯޓް މަނާކުރުމަކީ ވިސްނައިލަން ޖެހޭ ކަމެއް ކަމަށް ވިދާޅުވެފަ އެވެ. އެކަމާ ގުޅިގެން ގިނަ ބަޔަކު ސަރުކާރާއި އުޝާމަށް ފާޑުކިޔެވެ.
އިޒްރޭލު ޕާސްޕޯޓު މަނާކުރަން ސަރުކާރުން ނިންމިތާ މިއަދަށް 126 ވެފައިވާއިރު އެކަން ލަސްވެގެން ދަނީ މަޖިލިސް ޗުއްޓީގައި އޮތުމުން ކަމަށް މީގެ ކުރިން ރައީސް އޮފީހުގެ ތަރުޖަމާނު ހީނާ ވަލީދު ވިދާޅުވި އެވެ. އޭނާ މިހެން ވިދާޅުވި ނަމަވެސް މަޖިލީހުން ޗުއްޓީއަށް ދިޔައީ ވަޒީރުންގެ މަޖިލީހުގެ ނިންމުމަށް 88 ދުވަސް ފަހުން އޮގަސްޓު 22، ގަ އެވެ. ޗުއްޓީ ތެރޭ ވެސް މަޖިލީހުން ބައެއް މަސައްކަތް ކުރިއިރު، ދެވަނަ ދައުރުގެ މަސައްކަތް މާދަމާ ފަށާނެ އެވެ.
މަޖިލީހުގައި މި މައްސަލަ ތާށިވެ ތިން މަސް ދުވަހަށް ވުރެ ގިނަ ދުވަސް ފާއިތުވީ ނަމަވެސް، އެކަން ލަސްވި ކަމަށް ގަބޫލު ނުކުރައްވާ ކަމަށް އިސްލާމިކް މިނިސްޓަރު، މުހައްމަދު ޝަހީމް އަލީ ސައީދު ވެސް މީގެ ކުރިން ވަނީ ވިދާޅުވެފަ އެވެ.
އިދިކޮޅުން ތުހުމަތުކުރާ ގޮތުގައި މި ނިންމުން ލަސްވަނީ ރައީސް މުއިއްޒުގެ ސަރުކާރަށް ހުޅަނގުގެ ބާރުތަކުން ކުރިމަތިކުރަމުންދާ ޕްރެޝަރުތަކުގެ ސަބަބުންނެވެ. އެގޮތުން މި ސަރުކާރުން އިޒްރޭލުގެ ގަތުލުއާންމަށް އެންމެ ބޮޑަށް ތާއީދުކޮށް އެހީވާ އެމެރިކާއާއެކު ބާއްވަމުންދާ ގާތް ގުޅުން އެ ފަރާތްތަކުން ފާހަގަކުރެ އެވެ.
