އިޒްރޭލްގެ ޕާސްޕޯޓުގައި ރާއްޖެއަށް އެތެރެވުން މަނާކުރުމަށް ގާނޫނުތައް ބަދަލުކުރުމަށް ރައީސް ޑރ. މުހައްމަދު މުއިއްޒުގެ ސަރުކާރުން ނިންމި ނިންމުމަށް ބަދަލެއް ނާންނަ ކަމަށާއި އެކަން ލަސްވަނީ ރައްޔިތުންގެ މަޖިލިސް މިވަގުތު ޗުއްޓީގައި އޮތުމުން ކަމަށް ސަރުކާރުން ބުނެފި އެވެ.
އިޒްރޭލް ޕާސްޕޯޓު މަނާކުރުމަށްޓަކައި ގާނޫނަށް ގެންނަންޖެހޭ ބަދަލުތައް ގެނައުމަށް ކެބިނެޓުން ޖޫން 2، 2024، ގައި ނިންމީ ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ގަތުލްއާންމާ ގުޅިގެން ގިނަ ބަޔަކު އެކަމަށް ގޮވާލަމުން ދަނިކޮށެވެ. ނަމަވެސް އެ ނިންމުމަށް ގާނޫނީ ބާރުވެރިކަމެއް އަދި ގެނެވިފައެއް ނުވެ އެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން އެ އޮފީހުގެ އިސް ތަރުޖަމާނު ހީނާ ވަލީދު ވިދާޅުވީ، މި ސަރުކާރަކީ ފަލަސްތީނުގެ މިނަވަންކަމަށް އެންމެ ބޮޑަށް އަޑުއުފުލާ އެއް ސަރުކާރު ކަމަށެވެ.
"ފަލަސްތީނާ ދޭތެރޭގަ އަޅުގަނޑުމެންގެ އޮތް ސްޓޭންޑެއް ބަދަލެއް ނުވޭ. މިހާރު ރައްޔިތުންގެ މަޖިލިސް އޮތީ ޗުއްޓީގަ. އިރާދަކުރެއްވިއްޔާ ޗުއްޓީއަށްފަހު މަޖިލިސް ފެށިގެންދާއިރުގަ މި މަސައްކަތްތައް ވަރަށް ބާރަށް ކުރިއަށްދާނެ،" ހީނާ ވިދާޅުވި އެވެ.
އޭނާ މިހެން ވިދާޅުވި ނަމަވެސް މަޖިލީހުން ޗުއްޓީއަށް ދިޔައީ ވަޒީރުންގެ މަޖިލީހުގެ ނިންމުމަށް 88 ދުވަސް ފަހުން އޮގަސްޓު 22، ގަ އެވެ. ކެބިނެޓުގެ ނިންމަށްފަހު އޮގަސްޓު މަހުގެ ނިޔަލަށް އިޒްރޭލުގެ 313 ފަތުރުވެރިޔަކު ރާއްޖެއަށް އައިސްފައިވެ އެވެ.
މަޖިލީހުން ޗުއްޓީއަށް ދިޔައިރު ސަރުކާރުގެ ނިންމުން ތަންފީޒުކުރެވޭނެހެން އިދިކޮޅުން ބިލެއް ވެސް ހުށަހަޅާފައިވެ އެވެ. ސަރުކާރުގެ މެންބަރުންގެ ވޯޓާއެކު ޖޫން މަހު ބަލައިގަތް އެ ބިލު ބަލައިގަނެ 241 ކޮމިޓީއަށް ފޮނުވި ނަމަވެސް، ބިލުގެ މަސައްކަތް ވަނީ މަޑުޖެހިފަ އެވެ. އެ ބިލާމެދު އިތުރު އެއްވެސް މަސައްކަތެއް މިހާތަނަށް ކޮށްފައެއް ނުވެ އެވެ.
ސަރުކާރުގެ ނިންމުމަށް ފަހު، އިޒްރޭލު ޕާސްޕޯޓް އޮންނަ އެއްވެސް މީހަކަށް ރާއްޖެއަށް ދަތުރު ނުކުރެވޭ ގޮތަށް "ބްލޭންކެޓްކޮށް" ޕާސްޕޯޓް މަނާކުރުމަކީ ވިސްނާލަން ޖެހޭ ކަމެއް ކަމަށް އެޓާނީ ޖެނެރަލް އަހުމަދު އުޝާމް ވަނީ ވިދާޅުވެފަ އެވެ. އެކަމާ ގުޅިގެން ގިނަ ބަޔަކު ދަނީ ތަކުރާރުކޮށް ސަރުކާރަށް ފާޑުކިޔަމުންނެވެ.
