ވެރިކަންކުރާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ) ގެ މެންބަރުންގެ އަދަދު އެއް ލައްކައަށް ހަމަކުރުމަށްޓަކައި، ސަރުކާރު ހިއްސާވާ ކުންފުނިތަކުގެ (އެސްއޯއީ) މުވައްޒަފުންނަށް މަޖުބޫރުކޮށް، ވަޒީފާގެ ބިރު ދައްކަމުންދާ ކަމަށް އެ ކުންފުނިތަކުގެ ބައެއް ވެރިންނާއި މުވައްޒަފުން ބުނެފި އެވެ.
ރައީސް މުހައްމަދު މުއިއްޒުގެ ސަރުކާރަށް ތިން އަހަރު ފުރުން ފާހަގަކުރުމަށް މިރޭ ބާއްވާ ހާއްސަ ޖަލްސާގައި، ރާއްޖޭގެ ތާރީހުގައި އެއް ލައްކަ މެންބަރުން ހަމަކުރި ފުރަތަމަ ސިޔާސީ ޕާޓީއަކީ ޕީއެންސީކަން އިއުލާނު ކުރުމަށް އެ ޕާޓީން ދަނީ މަސައްކަތް ކުރަމުންނެވެ.
މިކަމާ ގުޅޭގޮތުން މައުލޫމާތު ދިން ސަރުކާރު ކުންފުންޏެއްގެ އިސް ވެރިޔަކު ވިދާޅުވި ގޮތުގައި، ޕާޓީގެ އަމާޒަށް ވާސިލުވުމަށްޓަކައި ކުންފުނިތަކުގައި މަސައްކަތްކުރާ އެހެން ސިޔާސީ ޕާޓީތަކުގެ މެންބަރުންނަށާއި، އެއްވެސް ޕާޓީއެއްގައި ނެތް މުވައްޒަފުންނަށް ވެސް ޕީއެންސީއަށް ވަނުމަށް ދަނީ އަންގަމުންނެވެ.
"ކޮންމެ ގޮތަކުން ވިޔަސް މިރޭ 8:00 ގެ ކުރިން 100،000 މެންބަރުން ހަމަކުރަން ހިފާފައި ހުރީ. އެހެންވެ ކުންފުނިތަކުގެ މުވައްޒަފުންނަށް ދަނީ އަންގަމުން ވަންނަން،" އޭނާ ވިދާޅުވި އެވެ.
ސަރުކާރު ކުންފުންޏެއްގައި މަސައްކަތްކުރާ އިދިކޮޅު އެމްޑީޕީގެ މެންބަރަކު ބުނީ، ޑިޕާޓްމެންޓުތަކުގެ ވެރިން މަޖުބޫރު ކުރުމުގެ ސަބަބުން ވަޒީފާގެ ދިފާއުގައި ޕީއެންސީއަށް ސޮއިކުރަން ޖެހިފައިވާ ކަމަށެވެ.
"ވެރިން އަންނަނީ އެހެން ޕާޓީތަކުގެ މެންބަރުންގެ ލިސްޓު ހިފައިގެން. ވަޒީފާގައި ހުރުމަށްޓަކައި ޕީއެންސީއަށް ވަނުމަށް ކުރަނީ މަޖުބޫރު،" އެ މުވައްޒަފު ބުންޏެވެ.
މީގެ އިތުރުން، ޕީއެންސީއަށް މެންބަރުން އިތުރުކުރުމަށް ފައިސާ ބަހަމުންދާ ކަމުގެ ތުހުމަތުތައް ވެސް ބައެއް މަސްދަރުތަކުން ވަނީ ކޮށްފަ އެވެ.
އިލެކްޝަންސް ކޮމިޝަން (އީސީ) ގެ ދަފްތަރުން ދައްކާ ގޮތުގައި މިއަދު ހަވީރު 4:57 އާ ހަމައަށް ޕީއެންސީގައި ތިބީ 97،251 މެންބަރުންނެވެ. އެހެންކަމުން، އެއް ލައްކަ މެންބަރުންގެ އަމާޒަށް ވާސިލުވުމަށް އެ ޕާޓީއަށް ބާކީ ބޭނުންވަނީ 2،749 މެންބަރުން ނެވެ.
މި އަހަރު ނިމުމުގެ ކުރިން ޕީއެންސީގެ މެންބަރުންގެ އަދަދު އެއް ލައްކައަށް އިތުރުކުރުމަށް އަމާޒު ހިފާފައިވާކަން އެ ޕާޓީން މިދިޔަ ސެޕްޓެމްބަރު މަހު އިއުލާނު ކުރި އެވެ. ޕީއެންސީގެ މަތީ މަޖިލިސް ހުޅުވުމަށް ބޭއްވި ޖަލްސާގައި ވާހަކަދައްކަވަމުން އެ ޕާޓީގެ ޕާލިމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު އޭރު ވިދާޅުވެފައިވަނީ، މުއިއްޒު ވެރިކަމާ ހަވާލުވެވަޑައިގެންނެވިއިރު ޕާޓީގައި ތިބީ އެންމެ 3،000 އެއްހައި މެންބަރުން ކަމަށާއި، ނަމަވެސް އޭރު އެ އަދަދު 79،364 އަށް އަރާފައިވާ ކަމަށެވެ.







