އިޒްރޭލު ޕާސްޕޯޓު މަނާ ކުރަން ސަރުކާރުން ނިންމިތާ ތިން މަސް ދުވަހަށް ވުރެ ގިނަ ދުވަސް ފާއިތުވީ ނަމަވެސް، އެކަން ލަސްވި ކަމަށް ގަބޫލު ނުކުރައްވާ ކަމަށް އިސްލާމިކް މިނިސްޓަރު، މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
އިޒްރޭލު ޕާސްޕޯޓު މަނާ ކުރަން ސަރުކާރުން ނިންމިތާ އެތައް ދުވަހެއް ފާއިތުވެގެން ދިޔައިރު ވެސް އެކަން ވެފައި ނުވާތީ ރައީސް އޮފީހުގައި މިއަދު ކުރިއަށް ދިޔަ ނޫސްވެރިންގެ ބައްދަލުވުމުގައި "އަދަދު" ގެ ނޫސްވެރިޔާ ކުރި ސުވާލަށް ޖަވާބުދެއްވަމުން ޝަހީމް ވިދާޅުވީ މަޖިލީހުގެ މަސައްކަތާ ގުޅޭގޮތުން އޭނާ ވާހަކަދެއްކެވުމަކީ އެހައި "މުނާސަބު ކަމަކަށް ނުވެދާނެ،" ކަމަށެވެ.
ނަމަވެސް, އިޒްރޭލު ޕާސްޕޯޓު މަނާކުރުމުގެ މަސައްކަތް ލަސްވެފައިވާ ކަމަށް ގަބޫލު ނުކުރައްވާ ކަމަށް ޝަހީމް ވިދާޅުވި އެވެ.
"އެކަން ލަސްވެފައިވާ ކަމަކަށް އަޅުގަނޑު ގަބޫލެއް ނުކުރަން، އެއީ ރައްޔިތުންގެ މަޖިލީހުގައި އޮތް އިޖުރާއަތުގެ ތެރެއިން ރައްޔިތުންގެ މަޖިލީހަށް ހުށަހެޅޭ ކަންތައްތައް ކުރިއަށް ދާނީ، އެހެން ނޫންތޯ؟" ޝަހީމް ވިދާޅުވި އެވެ.
އިޒްރޭލް ޕާސްޕޯޓު މަނާކުރުމަށްޓަކައި ގާނޫނަށް ގެންނަންޖެހޭ ބަދަލުތައް ގެނައުމަށް ކެބިނެޓުން ޖޫން 2، 2024، ގައި ނިންމީ ފަލަސްތީނުގެ ރައްޔިތުންނާ ދެކޮޅަށް އިޒްރޭލުން ހިންގަމުންދާ ގަތުލްއާންމާ ގުޅިގެން ގިނަ ބަޔަކު އެކަމަށް ގޮވާލަމުން ދަނިކޮށެވެ. ނަމަވެސް އޯގަސްޓު 22، ގައި މަޖިލިސް ޗުއްޓީއަށް ދިޔައީ އެ ނިންމުމަށް ގާނޫނީ ބާރުވެރިކަމެއް ނުގެނެހެވެ.
ކެބިނެޓުގެ ނިންމަށްފަހު އޮގަސްޓު މަހުގެ ނިޔަލަށް އިޒްރޭލުގެ 313 ފަތުރުވެރިޔަކު ރާއްޖެއަށް އައިސްފައިވެ އެވެ.
މިއަދު އޮތް ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޝަހީމް ވިދާޅުވީ މިދިޔަ 10 ވަރަކަށް މަސްދުވަހުގެ ތެރޭގައި ފަލަސްތީނުގެ ހައްގުގައި ރައީސް ކުރެއްވި މަސައްކަތްތަކާ މެދު އިސްލާމިކް މިނިސްޓަރުގެ ހައިސިއްޔަތުން ހިތްހަމަޖެހިވަޑައިގަންނަވާ ކަމަށާއި އެ ކަންކަމުގެ އަގު ވެސް ވަޒަން ކުރައްވާ ކަމަށެވެ.
އެގޮތުން, އިޒްރޭލުގެ ގަތުލްއާއްމާ ދެކޮޅަށް ދެކުނު އެފްރިކާއިން އައިސީޖޭއަށް ހުށަހެޅި މައްސަލައަށް ވެސް އެންމެ ފުރަތަމަ ތަދައްހުލުވި އެއް ގައުމަކީ ރާއްޖެ ކަމަށާއި އދ. ގައި ވެސް ފަލަސްތީނުގެ ދިފާއުގައި ރާއްޖެއިން އަޑު އުފުލާފައިވާކަން ޝަހީމް ފާހަގަކުރެއްވި އެވެ.
"ރައީސް ޑރ. މުހައްމަދު މުއިއްޒުގެ ވެރިކަމުގައި އެކަން ވަރަށް ވަރުގަދައަށް ހަމަ އެމަނިކުފާނު ދިފާއީ އަޑު އުފުއްލަމުން ގެންދަވާކަން އެއީ ދިވެހިރާއްޖޭގެ ހުރިހާ ރައްޔިތުން ވެސް އެކަމަށް ހަމަ އުފާވާ ކަމެއް، އަޅުގަނޑުމެން އިސްލާމީ ދައިރާގައި މަސައްކަތް ކުރާ ވަރަށް ގިނަ ފަރާތްތަކުން ހަމަ އެކަމުގެ އަގު އަޅުގަނޑުމެން ވަޒަން ކުރަން."
އިޒްރޭލު ޕާސްޕޯޓު މަނާ ކުރަން ސަރުކާރުން ނިންމިތަ އެތައް ދުވަހެއް ފާއިތުވިއިރު، ވެސް އެކަން ކޮށްފައި ނުވާތީ ގިނަ ބައެއްގެ ފާޑުކިޔުން ސަރުކާރަށް ވަނީ އަމާޒުވެފަ އެވެ.
