ބޭންކް އޮފް މޯލްޑިވްސް (ބީއެމްއެލް) ގެ ކާޑުތަކުގެ ލިމިޓަށް ބަދަލު ގެންނަން އެ ބޭންކުގެ ބޯޑުން ނިންމި ޕްރޮފެޝަނަލް ނިންމުމަކީ "މާލީ ބަގާވާތެއް" ކަމަށް ރައީސް ޑރ. މުހައްމަދު މުއިއްޒު ހަދައި، އެކަމުގެ ތަހުގީގު ފުލުހުން ފަށާފައިވަނިކޮށް ބޭންކުގެ މެނޭޖިން ޑިރެކްޓަރު ކަމާއި ސީއީއޯގެ މަގާމުގައި ހުންނެވި ކާލް ސްޓުމަކް ރާއްޖޭން ބޭރަށް ފުރުން މަނާ ކުރުމަށް އަމުރަކަށް އެދިފައި ނުވާ ކަމަށް ފުލުހުން މިއަދު ބުނެފި އެވެ.
ރާއްޖޭގެ އެންމެ ބޮޑު ބޭންކާ މެދު މިފަދަ ތުހުމަތެއްކޮށް ޖިނާއީ ތަހުގީގެއް ފަށާފައިވާއިރު ކާލް ވަނީ ރާއްޖޭން ބޭރުގައި ހުންނަވައި ބީއެމްއެލްގައި އޭނާ އަދާކުރަމުންދިޔަ މަގާމުތަކުން އިސްތިއުފާ ދެއްވާފަ އެވެ.
އެކަމާ ގުޅޭ އިތުރު މައުލޫމާތެއް ފުލުހުން ހާމަކޮށްފައި ނުވާތީ ކޮންމެ ދުވަހަކުހެން "އަދަދު" ނޫހުން ދަނީ ތަހުގީގު އަދާހަމަ ހޯދުމަށް ފުލުހުންނާ ސުވާލު ކުރަމުންނެވެ.
"ބަގާވާތުގެ މައްސަލައާ ގުޅޭގޮތުން ޕްރެސްގައި މިނިސްޓަރު ދެއްވި މައުލޫމާތުގެ އިތުރަށް އަޕްޑޭޓެއް ނެތް. ބީއެމްއެލްގެ ސީއީއޯ ފުރުން މަނާކުރުމުގެ އަމުރަކަށް އެދިފައި ނުވޭ," ފުލުހުން ފޮނުވި ޖަވާބުގައި ބުނެފައިވެ އެވެ.
ތަހުގީގު ކުރިއަށް ދަނިކޮށް ކާލް ވަނީ ދުބާއީއަށް ގޮސްފަ އެވެ. ތަހުގީގަށް ކާލްގެ ބަޔާނެއް ނެގިކަން މިހާތަނަށް އެނގިފައި ނުވެ އެވެ.
ބީއެމްއެލް އާއި އެމްޑީޕީ ގުޅިގެން އޯގަސްޓު 25 ގައި ބަގާވާތަކުން ސަރުކާރު ވައްޓާލަން އުޅުނު ކަމަށް ތުހުމަތުކޮށް އެ މައްސަލަ ތަހުގީގުކުރާކަން ފުލުހުން ހާމަކުރީ އޯގަސްޓު 26, ގެ ރޭ ގަ އެވެ.
ބީއެމްއެލްގެ ސީއީއޯގެ މަގާމަށް ކާލް އައްޔަނުކުރީ އޮކްޓޯބަރު 11, 2022 ގަ އެވެ. އަދި ބޭންކްގެ މެނޭޖިން ޑިރެކްޓަރަކަށް އޭނާ އައްޔަނުކުރީ ޑިސެމްބަރު 22, 2022 ގަ އެވެ.
