ރަސްމީ ދަތުރެއްގައި މިހާރު ސައުދީ އަރަބިއާއަށް ވަޑައިގެން އުޅުއްވާ ފޮރިން މިނިސްޓަރު މޫސާ ޒަމީރު އެ ގައުމުގެ ފޮރިން މިނިސްޓަރު، ވަލީއަހުދު ފައިސަލް ބިން ފަރްހާން އަލް-ސައުދާ މިއަދު ބައްދަލުކުރައްވައިފި އެވެ.
ފޮރިން މިނިސްޓްރީން ބުނީ މި ބައްދަލުކުރެއްވުން އޮތީ މިއަދު ހެނދުނު ކަމަށެވެ. އަދި މި ބައްދަލުވުމުގެ ތެރެއިން ސައުދީ ވަލީއަހުދު އަދި ބޮޑު ވަޒީރު މުހައްމަދު ބިން ސަލްމާން ބިން އަބްދުލްއަޒީޒަށް އެޑްރެސްކުރައްވާ ރައީސް ޑރ. މުހައްމަދު މުއިއްޒު ފޮނުއްވެވި ސިޓީ ހަވާލުކުރެއްވި ކަމަށް ވެސް އެ މިިނިސްޓްރީން ބުންޏެވެ.
ދެ ގައުމުގެ ހާރިޖިއްޔާގެ ވެރިންގެ ބައްދަލުވުމުގައި މަޝްވަރާކުރީ، ދެ ގައުމުގެ ގުޅުން އިތުރަށް ބަދަހިކުރުމަށާއި އިގުތިސޯދީ ރޮނގުންނާއި ބައިނަލްއަގުވާމީ މަސްރަހުގައި މި ގުޅުން އިތުރަށް ހަރުދަނާކުރުމާ ގުޅޭ ގޮތުން ކަމަށް ފޮރިން މިނިސްޓްރީން ބުންޏެވެ.
އޭގެ އިތުރުން، ސައުދީން ރާއްޖެއަށް ދެމުން ގެންދާ އެހީތެރިކަމަށް ޝުކުރު އަދާކުރައްވައި، މި ދަތުރަށް ފަހު ދެ ގައުމުގެ ގުޅުން އިތުރަށް ބަދަހިވެގެންދާނެ ކަމުގެ އުއްމީދުކުރައްވާ ކަމަށް ވެސް ޒަމީރާ ހަވާލާދީ އެ މިނިސްޓްރީން ބުނެފައިވެ އެވެ.
މި ބައްދަލުވުމުގައި، މިނިސްޓަރު ޒަމީރުގެ އަރިހުގައި ފޮރިން މިނިސްޓްރީގެ ވަފުދަކާއި ސައުދީގައި ހުންނަ ރާއްޖޭގެ އެމްބަސީ ހިންގެވުމާ ވަގުތީ ގޮތުން ހަވާލުވެ ހުންނެވި އަހުމަދު ފަޒީލް ބައިވެރިވެވަޑައިގެންނެވި އެވެ.
ޒަމީރު ސައުދީއަށް ވަޑައިގެންނެވީ ބަހުރެއިނަށް ވަޑައިގެން، އެ ގައުމުގެ ވެރިންނާއި ދިރާގުގެ މައި ހިއްސާދާރު، ބަޓެލްކޯގެ ވެރިންނާ ބައްދަލުކުރައްވާފަ އެވެ. ބަހުރެއިނަށް ވެސް ޒަމީރު ވަޑައިގެންނެވި ރައީސްގެ ސިޓީއެއް ހިއްޕަވައިގެންނެވެ. އޭގެ ދުވަސްކޮޅެއް ކުރިން ޗައިނާއަށް ވެސް ހަމަ ރައީސްގެ ސިޓީއެއް ހިއްޕަވައިގެން ވަޑައިގެންނެވި އެވެ.
ރައީސްގެ ސިޓީތަކެއް ހިއްޕަވައިގެން ޒަމީރު އެކި ގައުމުތަކަށް ވަޑައިގެންނެވި ނަމަވެސް، މިއީ ކޮން ބޭނުމެއްގައި ފޮނުވާ ސިޓީތަކެއް ކަމެއް ނޭނގެ އެވެ. އެ ސިޓީތަކުގައި ހުރި މައުލޫމާތު ހިއްސާކޮށްދޭން އެދުމުން މިއަދާ ހަމައަށް ރައީސް އޮފީހުގެ އެއްވެސް ޖަވާބެއް ނުލިބެ އެވެ.
