ވަޒީރުން މެދުވެރިކޮށް އެކި ގައުމުތަކުގެ ލީޑަރުންނަށް ރައީސް ޑރ. މުހައްމަދު މުއިއްޒު ފޮނުއްވާ ސިޓީތަކުގެ ތަފުސީލަށް އެދުމުން ރައީސް އޮފީހުން ޖަވާބު ދޭން ދެކޮޅު ހަދައިފި އެވެ.
މިފަހުން ރައީސް މުއިއްޒު ވަނީ ޗައިނާގެ ރައީސް، ބަހުރެއިންގެ ރަސްގެފާނު އަދި ސައުދީ ވަލީ އަހުދަށް ސިޓީތަކެއް ފޮނުއްވާފަ އެވެ.
މި ސިޓީތަކުގައި ވަނީ ކޮން ވާހަކަތަކެއްތޯ އަދި ސިޓީތަކުގެ ތަފުސީލަށް އެދި ރައީސް އޮފީހުގެ އިސް ތަރުޖަމާނު ހީނާ ވަލީދާ މި ނޫހުން ތަކުރާރުކޮށް ސުވާލުކުރުމުން ވެސް ޖަވާބެއް ނުދެއްވި އެވެ.
ރައީސްގެ ފަރާތުން ބޭރުގެ ލީޑަރަކަށް ފޮނުވި ފުރަތަމަ ދެ ސިޓީ އެރުވީ ޗައިނާގެ ރައީސް ޝީ ޖިންޕިން އަށެވެ. ޖުލައި 22، ގައި އެ ސީޓީ ޗައިނާގެ ފޮރިން މިނިސްޓަރު ވަންގް ޔީ ހަވާލުކުރެއްވީ އެ ގައުމަށް ވަޑައިގެންނެވި ދިވެހި ވަޒީރުންގެ ވަފުދަކުންނެވެ.
އެ ވަފުދުގައި ހިމެނެނީ ފޮރިން މިނިސްޓަރު މޫސާ ޒަމީރާއި ފިނޭންސް މިނިސްޓަރު ޑރ. މުހައްމަދު ޝަފީގު އަދި އިންފްރާސްޓްރަކްޗާ މިނިސްޓަރު ޑރ. އަބްދުالله މުއްތަލިބު އެވެ.
ޗައިނާއަށްފަހު ބަހުރެއިންގެ ރަސްގެފާނު ހަމަދު ބިން އިސާ އަލް-ހަލީފާއަށް ރައީސް މުއިއްޒު ފޮނުއްވި ސިޓީ އެ ގައުމުގެ ސަރުކާރާ ފޮރިން މިނިސްޓަރު މޫސާ ޒަމީރު ހަވާލުކުރެއްވީ އޮގަސްޓު 12، ގަ އެވެ. ރައީސްގެ ސިޓީއާ ބަހުރެއިންގެ ފަރާތުން ހަވާލުވީ އެ ގައުމުގެ ރަސްގެފާނުގެ ދޮށީ ދަރިކަލުން އަދި ގައުމުގެ ބޮޑުވަޒީރު ވަލީއަހުދު ސަލްމާން ބިން ހަމަދު އަލް-ހަލީފާ އެވެ.
ސައުދީގެ ވަލީ އަހުދު މުހައްމަދު ބިން ސަލްމާން އަށް ރައީސް ފޮނުއްވި ސިޓީ ހިއްޕަވައިގެން ފޮރިން މިނިސްޓަރު ޒަމީރު މިހާރު ހުންނެވީ އެ ގައުމުގަ އެވެ. މި ދަތުރުގައި ބައިވެރިވުމަށް އެމްއެމްއޭގެ ގަވަރުނަރު އަހުމަދު މުނައްވަރު ވެސް އެ ގައުމަށް ވަޑައިގަންނަވާ ގޮތަށް ހަމަޖެހިފަ އެވެ.
ރައީސްގެ ހާއްސަ ސިޓީތަކެއް ގައުމުތަކުގެ ވެރިންނަށް ފޮނުއްވާފައި މިވަނީ ރާއްޖޭ މާލީ ހާލަތު ވަރަށް ބޮޑަށް ގޯސްވެފައިވަނިކޮށެވެ. އެގޮތުން މި ހިނގާ އޯގަސްޓު މަސް ނިމުމުގެ ކުރިން ބޭނުންކުރެވޭ ޑޮލަރު ރިޒާވުގައި ހުރި ފައިސާ އެއްކޮށް ހުސްވެދާނެ ކަމަށް އެމްއެމްއޭ އިން ފިނޭންސް މިނިސްޓްރީއަށް ވަނީ އަންގާފަ އެވެ.
ސިޓީތައް ފޮނުވި ގައުމުތަކުގެ ތެރެއިން ޗައިނާއަކީ މިވަގުތު ރާއްޖެއިން އެންމެ ބޮޑަށް ދަރާފައިވާ ގައުމެވެ. އެގޮތުން އެ ގައުމުން ނަގާފައިވާ ލޯނުތައް ދެއްކުމުގައި ލުއިގޮތްތަކެއް ހޯދުމަށް ސަރުކާރުން ދަނީ މަސައްކަތް ކުރަމުންނެވެ. މިކަމުގައި ޗައިނާއިން "ފެހި ސިގްނަލް" ލިބިފައިވާ ކަމަށް ރައީސް ވިދާޅުވި ނަމަވެސް އަމަލީ ގޮތުން އެ މަންޒަރެއް ނުފެނެ އެވެ.
ދެން ސިޓީ ފޮނުއްވި ސައުދީ އަދި ބަހުރެއިން އަކީ ރާއްޖޭގެ ތަރައްގީގެ އެކި މަޝްރޫއުތަކަށް ހިލޭ އެހީގެ ގޮތުގައި މީގެކުރިން ގިނަ އަދަދުތަކުން ފައިސާ ދީފައިވާ ދެ ގައުމެވެ.
