މި ސަރުކާރުން ކުރިއަށްގެންދާ "ބޯހިޔާވަހިކަން އެންމެނަށް" ހައުސިން ސްކީމުގެ ދަށުން ދޫކުރާ ގޯއްޗާއި ފްލެޓު ލިބޭ މީހުން މި އަހަރު ތެރޭގައި އިއުލާނު ކުރައްވާނެ ކަމަށް ރައީސް މުހައްމަދު މުއިއްޒު މިއަދު ވިދާޅުވެއްޖެ އެވެ.
ބޯހިޔާވަހިކަމުގެ ސްކީމުގެ ދަށުން 15،000 ގޯތި ދޫކުރާނެ ކަމަށް ސަރުކާރުން ބުނެ އެވެ. ގޯތި ދޫކުރަން ހަމަޖެހިފައި ވަނީ ރަސްމާލެއިންނެވެ. ފްލެޓު ދޫކުރަނީ ގްރޭޓާ މާލެ ސަރަހައްދުންނެވެ. އެ ސްކީމުގެ ދަށުން 7900 ފްލެޓު ދޫކުރާނެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން މުއިއްޒު ވިދާޅުވީ ގޯއްޗާއި ފްލެޓު ލިބޭ މީހުންގެ ލިސްޓު ވެސް މި އަހަރު ނިމުމުގެ ކުރިން ސަރުކާރުން އިއުލާނު ކުރާނެ ކަމަށެވެ.
"މި އަހަރު ތެރޭގައި ގޯތި ލިބޭ ހުރިހާ އެންމެންގެ ލިސްޓު ވެރިފައިކޮށް ނިންމައި އެ ފަރާތްތަކަށް ލިބޭކަން އެނގިގެންދާނެ،" ރައީސް ވިދާޅުވި އެވެ. "ފްލެޓަށް ކުރިމަތިލީ މީހުންނަށް އެ ފްލެޓުތައް ލިބޭކަން ވެސް އިރާދުކުރެއްވިއްޔާ ހަމަ މި އަހަރުގެ ތެރޭގައި، ކުރިއަށް އޮތް ދުވަސްތަކުގައި އަޅުގަނޑުމެން ޑޭޓު އިއުލާން ކުރާނަން."
މުއިއްޒު ވިދާޅުވީ ގޯއްޗާއި ފްލެޓު ލިސްޓު ވެސް އިއުލާނު ކުރައްވާނީ "ބަލަންޖެހޭ ހުރިހާ" ކަމެއް ބެލުމަށްފަހު ކަމަށެވެ. ފްލެޓު ލިބޭ މީހާއަށް ލިބެނީ ކޮން ޕްރޮޖެކްޓެއްގެ ފްލެޓުކަން ވެސް އިއުލާނާއެކު އެނގޭނެ ކަމަށް ރައީސް ވިދާޅުވި އެވެ.
ބަލަން ޖެހޭ ހުރިހާ ކަމެއް ބަލައި ނިންމައި އެ ލިސްޓު ވެސް އަޅުގަނޑުމެން ނެރޭނަން. ލިސްޓު ނެރޭއިރު ތަފްސީލުކޮށް ކަނޑައަޅާނަން، ތަރުތީބަކާއެކީ ކޮން ފަރާތަކަށް ކަން، ކޮން ޕްރޮޖެކްޓުތަކެއްގެ ތެރެއިން ލިބޭ ފްލެޓުތަކެއްތޯ ލިބޭނީ، އެ ލެވެލްއަށް އަޅުގަނޑުމެން ބޭނުންވޭ ތަފްސީލުތައް އިއުލާން ކުރަން.
މިއަދުގެ ނޫސްވެރިންގެ ބައްދަލުވުމުގައި، މިއަހަރުގެ ނިޔަލަށް ރަސްމާލެ ނުވަތަ ފުށިދިއްގަރުފަޅު ހިއްކާ ނިންމާނެ ކަމަށް ވެސް މުއިއްޒު ވިދާޅުވި އެވެ. އަދި 2028 މެދު ތެރެއަށް ހުރިހާ ފްލެޓުތަކެއް ވެސް ނިމޭނެކަން އެމަނިކުފާނު އިއުލާނު ކުރެއްވި އެވެ.
"އަޅުގަނޑުމެން އަމާޒަކީ އިރާދުކުރެއްވިއްޔާ މި އަހަރު ނިމެންވާއިރަށް އެންމެ ލަސްވެގެން [ރަސްމާލެ ހިއްކާ] ނިންމާލުން. އަދިވެސް ހައެއްކަ މަސްތެރޭ ނިންމާލެވިދާނެ ކަމަށް މި ބަލަނީ،" އެމަނިކުފާނު ވިދާޅުވި އެވެ.
"އެހެންވީމާ 2028 ގެ މެއި، ޖޫން، ޖުލައި ހިސާބަށް އިރާދުކުރެއްވިއްޔާ މާލެ ސަރަހައްދުގައި މި އެޅޭ ހުރިހާ ފްލެޓެއް ނިންމޭނެ. އެ ޔަގީންކަން، ފުރިހަމަ ޔަގީންކަން އަދިވެސް އެބަ އޮތް."
