ދިވެހި ސަރުކާރުގެ 100 ޕަސެންޓު ހިއްސާވާ ޑިވެލޮޕްމަންޓް ބޭންކް އޮފް މޯލްޑިވްސް (ޑީބީއެމް) ގެ ހިއްސާ ބޭރުގެ ބޮޑު ބޭންކެއް ކަމުގައިވާ ޖޭޕީ މޯގަންއަށް ވިއްކާލަން އުޅޭ ކަމަށް ދެކެވޭ ވާހަކަަތައް ރައީސް މުހައްމަދު މުއިއްޒު މިއަދު ދޮގުކުރައްވައިފި އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މުއިއްޒު މިހެން ވިދާޅުވީ ސަރުކާރުން މި ބޭންކުގެ ހިއްސާ ވިއްކާލާފައިވާ ކަމަށް ދައުރުވަމުންދާ ވާހަކަތާ ގުޅިގެން ނޫސްވެރިޔަކު ސުވާލުކުރުމުންނެވެ. އެމަނިކުފާނު ދެއްވި ޖަވާބުގައި މިއީ "ގޮސިޕް" ކަމަށް ވިދާޅުވެ، އެ ވާހަކަތަކުގައި އެއްވެސް ހަގީގަތެއް ނެތް ކަމުގެ ޔަގީންކަން ދެއްވި އެވެ.
"ޑިވެލޮޕްމަންޓް ބޭންކް އޮފް މޯލްޑިވްސްގެ ކަންތައްތަކުގައި އެއީ ވެސް ތެދު ވާހަކައެއް ނޫން. ޖޭޕީ މޯގަންއާ ގުޅުވައިގެން ތި ވިދާޅުވި ވާހަކައަކީ ވެސް ހަގީގަތެއް ނޫން. އެހެންވީމަ، ވަރަށް ބޮޑަށް މި ހުންނަނީ ގޮސިޕް ވަރަށް ބޮޑަށް ފެެތުރިފަ،" މުއިއްޒު ވިދާޅުވި އެވެ.
ޑީބީއެމްއަކީ ތަރައްގީގެ މަޝްރޫއުތަކާއި ފެހި މަޝްރޫއުތަކަށް ސިންޑިކޭޓަޑް ފައިނޭންސިން މޮޑެލްގެ ދަށުން ފައިސާ ހޯދައިގެން، ރާއްޖޭގެ ބޭންކިން ނިޒާމުގެ ތެރެއިން ބޭރުވާ ބޭރު ފައިސާގެ މިންވަރު މަދުކުރުމުގެ މަގުސަދުގައި މުއިއްޒު އުފެއްދެވި ބޭންކެކެވެ.
ސަރުކާރުން ފަންޑުކޮށްގެން ހިންގާ ގޮތަށް އުފެއްދި މި ބޭންކަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ބޭންކިން ލައިސަންސް ލިބުނީ އޮކްޓޫބަރު 2024 ގައި އެވެ. ޖެހިގެން އައި މަހު މުއިއްޒު ވަނީ މިތަން ރަސްމީކޮށް ހުޅުވާފަ އެވެ. އޭރު ހުޅުވި ނަމަވެސް ރަސްމީކޮށް ވިޔަފާރި ފެށުމުގެ ހުއްދަ އެމްއެމްއޭއިން އެ ބޭންކަށް ލިބުނީ މި އަހަރު ޖެނުއަރީ 26، ގައި އެވެ.
ޑީބީއެމްއަކީ މުއިއްޒުގެ އިގުތިސޯދީ އެޖެންޑާގެ މުހިންމު ވައުދެކެވެ. ނަމަވެސް މިއަދާ ހަމައަށް އައިއިރު ބޭންކުގެ އޮޕަރޭޝަންތައް ރަނގަޅަށް ނުފެށޭތީ ގިނަ ބަޔެއްގެ ފާޑުކިޔުން ވަނީ އަމާޒުވެފަ އެވެ.
ރާއްޖޭގައި ހުރި އެހެން ބޭންކުތަކާ ހިލާފަށް ޑީބީއެމްއަކީ ބޮޑެތި ވިޔަފާރިތަކަށް ހިދުމަތްދޭން އުފައްދާފައިވާ ބޭންކެކެވެ. އެ ބޭންކުގެ ވެބްސައިޓުގައި ހުރި މައުލޫމާތުތަކުގައިވާ ގޮތުގައި އެ ބޭންކުގައި އެކައުންޓު ހުޅުވަން ބޭނުންވާ ކުންފުނިތަކާއި ޕާޓްނާޝިޕްތަކަށް ވަނީ އެ ފުރުސަތު ހުޅުވިފަ އެވެ.
ޑީބީއެމްެގެ ހިދުމަތްތަކުގެ ތެރޭގައި ބޭރުގެ އިންވެސްޓަރުންނަށް އޮންލައިންކޮށް އެކައުންޓު ހުޅުވޭ ރިމޯޓް އޮންބޯޑިން އާއި މަލްޓި ކަރަންސީ އެކައުންޓުތަކުން އަވަހަށް ފައިސާ ދެއްކޭ ކްރޮސް ބޯޑާ އޮޕްޓިމައިޒޭޝަން ހިމެނެ އެވެ.
ދާދި ފަހުން މި ބޭންކުން ވަނީ ގިނަ މުވައްޒަފުންތަކެއް ހޯދަން އިއުލާންކޮށްފަ އެވެ.
