ކަތަމަންޑޫ (އޮކްޓޯބަރު 3) - ދެ އަހަރުގެ މެދުކެނޑުމަކަށް ފަހު ނޭޕާލް ސުޕަ ލީގުގެ އަލުން ފަށަން ތައްޔާރުވެއްޖެ އެވެ.
ނޭޕާލް ސުޕަ ލީގަކީ 2021 ވަނަ އަހަރު އެ ގައުމުން ތައާރަފްކުރި ލީގެކެވެ. އެ ގޮތުން ބޮޑެތި ސްޕޮންސަރުންނާ އެކު ކުޅުންތެރިންނަށް ބޮޑު މުސާރަ ލިބޭ ގޮތަށް "ފްރެންޗައިޒް" މޮޑެލް އަކަށް 2021ގައި ލީގު ފެށީ ހަތް ޓީމާ އެކުގަ އެވެ. އެ ފަހަރުގެ ލީގަށް ފަހު ނޭޕާލް އެފްއޭ އަށް މާލީގޮތުން ގިނަ ގޮންޖެހުންތަކެއް ދިމާވެ ލީގު އަލުން ބޭއްވޭ ގޮތް ނުވީ އެވެ.
ބަދަލުތަކަކާ އެކު މިފަހަރު ލީގު ފަށަން ތައްޔާރުވެފައިވަނީ ނުވަ ޓީމާ އެކުގަ އެވެ. މި ފަހަރުގެ ލީގުގައި ވެސް ކޮންމެ ޓީމަކަށް ގައުމުން ބޭރުގައި ކުޅޭ "އައިކޮނިކް" އެއް ކުޅުންތެރިއަކު ޓީމުގައި ހިމެނޭއިރު، "މާކިއުއީ" ޕްލޭޔަރުގެ ގޮތުގައި ޓީމް ލީޑު ކުރާނީ އެ ގައުމުގެ ގައުމީ ޓީމްގެ މުހިންމު ކުޅުންތެރިންނެވެ. މީގެ އިތުރުން ކޮންމެ ޓީމެއްގައި ބިދޭސީ ހަ ކުޅުންތެރިން ހިމެނިދާނެ އެވެ. އޭގެ ތެރެއިން އެއްފަހަރާ ކުޅެން އެރޭނީ ފަސް ކުޅުންތެރިންނަށެވެ.
ޖުމްލަ އެކު، 246 ކުޅުންތެރިންނާއިއެކު ނޭޕާލް ސުޕަ ލީގުގެ "އޯކްޝަން" ނުވަތަ ނީލަން ކުރިއަށް ގެންގޮސްފައިވަނީ މިދިޔަ ހޮނިހިރު ދުވަހު އެވެ. ގައުމުން ބޭރުގައި ކުޅޭ ނޭޕާލްގެ ކުޅުންތެރިން މި ނީލަމުގައި ނުހިމެނެ އެވެ.
ނެޕާލްގެ ގައުމީ ޓީމްގެ ކުޅުންތެރިންގެ ތެރެއިން ރޯހިތު ޗާންދު، ކީޕަރު ކިރަން ކުމާރު ލިމްބޫ، މަނީޝް ޑަންގީ އަދި ބިމަލް ގަރްތި މަގަރު ހިމެނެނި ގައުމުން ބޭރުގައި ކުޅޭ ކުޅުންތެރިންގެ ލިސްޓުގަ އެވެ.
މިހާތަނަށް ނޭޕާލް ސުޕަ ލީގަށް އެންމެ ވަރުގަދައަށް ތައްޔާރުވަމުން އަންނަ އެއް ޓީމުކަމަށްވާ އެފްސީ ޗިތުވާނުން ވަނީ އެ ޓީމަށް ބިމާލް ސޮއިކޮށްފަ އެވެ. މީގެ އިތުރުން އެގައުމުގެ ފުޓްބޯޅަ އަށް ފަރިތަ ދެ ބިދޭސީ ކުޅުންތެރިންކަމަށްވާ ގާނާގެ ރަފީގު އަމިނޫ އަދި ގާނާގެ ޓޮރިކް ޖެބްރިން ސޮއިކޮށްފަ އެވެ.
ޖެބްރިން އަކީ 2022ގެ ރާއްޖޭގެ ދެ ވަނަ ޑިވިޝަންގައި ނިއުރޭޑިއަންޓް ސްޕޯޓްސް ކްލަބަށް ކުޅުނު ކުޅުންތެރިއެކެވެ. ޗިތުވާން ޓީމްގެ ކޯޗަކީ އިންޑިއާގެ ގިނަ ޓީމުތަކަށް ކޯޗުކޮށްދީފައިވާ ހާލިދު ޖާމިލް އެވެ.
ފުޓްބޯޅަ ކުޅެގެން އެކަށީގެންވާ އާމްދަނީ ނުލިބޭތީ ނޭޕާލްގެ ގިނަ ކުޅުންތެރިންތަކެއްވަނީ ގައުމު ދޫކޮށް އޮސްޓްރޭލިއާގެ ދަށް ފަންތީގެ ލީގުތަކަށް ބަދަލުވެފަ އެވެ. މިކަމުގެ ސަބަބުން އެގައުމުގެ ފުޓްބޯޅައަށް ނޭދެވޭ އަސަރުކުރަމުން އަންނަތީ ނޭޕާލް އެފްއޭގެ އުއްމީދަކީ ސުޕަ ލީގު އަލުން ފެށުމާ އެކު ކުޅުންތެރިންގެ ޝަކުވާތަކަށް ހައްލެއް ލިބުމެވެ.
