މިލާން (އޭޕްރީލް 3) - އެމެރިކާ، މެކްސިކޯ އަދި ކެނަޑާގައި ޖޫން މަހު ފަށާ ފީފާ ވޯލްޑް ކަޕަށް އިޓަލީ ކޮލިފައިނުވުމުގެ ޒިންމާ ނަގައި އެ ޓީމުގެ ކޯޗުކަމުން ޖެނާރޯ ގަޓޫސޯ އިސްތިއުފާދީފި އެވެ.
އިޓަލީ ޓީމަށް 73 މެޗު ކުޅެދީ، 2006 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރި ޓީމުގައި މުހިންމު ރޯލެއް ކުޅުނު ގަޓޫސޯ، މިދިޔަަ އަހަރުގެ އޮކްޓޫބަރު މަހު ދިން އިންޓަވިއުއެއްގައި ބުނީ، އިޓަލީ ކޮލިފައިނުވެއްޖެނަމަ، އެ ގައުމު ދޫކޮށްދާނެ ކަމަށް ބުނެފަ އެވެ.
ވޯލްޑް ކަޕަށް އިޓަލީ ކޮލިފައިނުވެއްޖެނަމަ ގަޓޫސޯ ގައުމު ދޫކޮށްދާނެ
އަންނަ އަހަރު އެމެރިކާ އާއި މެކްސިކޯ އަދި ކެނަޑާގައި ބާއްވާ ފީފާ ވޯލްޑް ކަޕަށް އިޓަލީ ކޮލިފައިނުވެއްޖެނަމަ، އެ ގައުމު ދޫކޮށްދާނެ ކަމަށް އިޓަލީ ޓީމުގެ ކޯޗު، ކުރީގެ މިޑްފީލްޑަރު، ޖެނާރޯ ގަޓޫސޯ ވަނީ ބުނެފައި.
ޔޫރަޕްގެ ކޮލިފައިން ޕްލޭއޮފްގައި ޕެނަލްޓީ ޖަހައިގެން ބޮސްނިއާ އަތުން 4-1 އިން ބަލިވެ، އިޓަލީ އަށް ޖެހިޖެހިގެން ތިން ވަނަ ފީފާ ވޯލްޑް ކަޕުން ފުރުސަތު ގެއްލިއްޖެ އެވެ. ހަތަރު ފަހަރު ވޯލްޑް ކަޕްގެ ޗެމްޕިއަންކަން ހޯދާފައިވާ އިޓަލީ އަކީ ވޯލްޑް ކަޕް ކާމިޔާބުކުރި ގައުމުތަކުގެ ތެރެއިން ޖެހިޖެހިގެން ތިން ވޯލްޑް ކަޕަށް ކޮލިފައިނުވި ފުރަތަމަ ގައުމެވެ.
ގަޓޫސޯ ބުނީ، ކުރިން ވެސް އެއްބަސްވެވިފައި އޮތް ގޮތަށް އިޓަލީ އަށް ވޯލްްޑް ކަޕަށް ނުދެވުމުން، އެ ކަމުގެ ޒިންމާ ނަގައި، އެ ޓީމުގެ ކޯޗުގެ ގޮތުގައި ހުރި ކޮންޓްރެކްޓް އުވާލައި މަގާމު ދޫކޮށްލާފައިވާ ކަމަށެވެ.
"ވަރަށް ހިތަށް އުނދަގޫ ނިންމުމެއް، އެކަމަކު މިއީ އެންމެ ރަނގަޅު ނިންމުން ކަމުގައި ދެކެނީ،" ގަޓޫސޯ ބުންޏެވެ.
އެންމެ ފަހުން ބޭއްވި ތިން ވޯލްޑް ކަަޕަށް ވެސް އިޓަލީ ކޮލިފައިނުވީ ޕްލޭއޮފުން ކުރިއަށް ނުދެވިގެންނެވެ. މި ފަހަރުގެ ކުރިން، ރަޝިއާގައި 2018 ވަނަ އަހަރު ބޭއްވި ވޯލްޑް ކަޕްގެ ކޮލިފައިން ޕްލޭއޮފުން އިޓަލީ ކެޓީ ސްވިޑެން އަތުން 1-0 އިން ބަލިވެގެންނެވެ. އަދި، ގަތަރުގައި، 2022 ގައި ބޭއްވި ވޯލްޑް ކަޕުން ވެސް އިޓަލީ އަށް ފުރުސަތު ގެއްލުނީ ކޮލިފައިން ޕްލޭއޮފްގައި ބަލިވުމުންނެވެ. ނޯތު މެސެޑޯނިއާ އިން، 1-0 އިން އިޓަލީ ބަލިކުރި ގޯލު ޖެހީ އިތުރު ވަގުތުގައި އަލެކްސަންޑަ ޓްރަޖޯވްސްކީ އެވެ. ކުރިން ފަހަރުތަކާ ހިލާފަށް އިޓަލީން މި ފަހަރުގެ ޕްލޭއޮފް ފުރަތަމަ މެޗުން ވަނީ މޮޅުވެފަ އެވެ. އެކަމަކު، ޕްލޭއޮފް ފައިނަލުން ބޮސްނިއާ އަތްދަށުވެ ކެޓީ އެވެ.
ވޯލްޑް ކަޕަށް އިޓަލީ ކޮލިފައިނުވުމުން އިޓަލީ ފުޓްބޯޅަ ފެޑެރޭޝަންގެ ރައީސް، ގަބްރިއެލް ގްރަވީނާ ވަނީ މަގާމުން އިސްތިއުފާ ދީފަ އެވެ. އަދި، އިޓަލީގެ ކޯޗިން ސްޓާފުންގެ ގޮތުގައި މަސައްކަތްކުރި، ކުރީގެ އެއް ވަނަ ގޯލްކީޕަރު، ޖިއަންލުއިޖީ ބުފޮން ވަނީ ޓީމު ދޫކޮށްލައިފަ އެވެ.
