'ދައުރު' ނޫހުގެ ސީނިއާ އެޑިޓަރަކާާއި ނޫސްވެރިއަކަށް މަރުގެ އިންޒާރު ދިން މައްސަލަ މޯލްޑިވްސް ޖާނަލިސްޓު އެސޯސިއޭޝަން (އެމްޖޭއޭ)އިން ކުށްވެރި ކޮށްފި އެވެ.

އެމްޖޭއޭއިން މިކަން ކުއްވެރިކޮށް ނެރުނު ބަޔާނެއްގައި ބުނެފައި ވަނީ ދައުރު ނޫހުގެ ނޫސްވެރިއަކާއި ސީނިއާ އެޑިޓަރަކަށް މަރުގެ އިންޒާރު ދީފައި ވަނީ އެ ނޫހުގައި ޝާއިއުކޮށްފައިވާ "ސިޔާމާއި ހިލްޓަންގެ މައްސަލަ؛ ރާއްޖެއިން އިންވެސްޓަރުންނަށް ރަތުގެ އިންޒާރެއް" މި އާޓިކަލްއާ ގުޅިގެން ކަމަށެވެ.

މި މައްސަލާގައި އެ އާޓިކަލް ލިޔުނު ދައުރު ނޫޙުގެ ނޫސްވެރިޔާ އަދި އެމްޖޭއޭގެ ސެކްރެޓަރީ ޖެނެރަލް، އަހުމަދު ނާއިފަށާއި، ސީނިއާ އެޑިޓަރަކަށް އެކި ނަންބަރުތަކުން ގުޅައި އިންޒާރު ދެމުން އަންނަ ކަމަށްް އެމްޖޭއޭއިން ބުނެފައި ވެއެވެ.

ހިލްޓަން އަދި ސަންއާ ގުޅޭގޮތުން ސިންގަޕޫރު އާބިޓްރޭޝަނުން ނިންމާފައިވާ ނިންމުމެއް ތަންފީޒު ނުވެ ގިނަ އަހަރުތަކެއް ވެފައިވާ މައްސަލައިގެ މައްޗަށް ދައުރު ނޫހުގައި މިދިޔަ ބުރާސްފަތި ދުވަހު ޝާއިއުކޮށްފައިވާ މި ލިޔުމާއި ގުޅިގެން ސަން ކުންފުނީގެ ވެރިޔާ އަދި ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަހުމަދު ސިޔާމް ވެސް ވަނީ ދައުރު ނޫހުގެ ސީނިއާ އެޑިޓަރަކަށް ގުޅައި އިންޒާރު ދީފައި ކަމަށް އެ ބަޔާނުގައި ބުނެފައި ވެއެވެ.

ނާއިފާއި ސީނިއާ އެޑިޓަރަށް ފޮނުވި މެސެޖުގައި އެ ދެމީހުންނާ "މަގުމަތިން ދިމާކޮށްލާނެ" ކަމަށާއި "ފުރާނަ ދުއްވާލަން ވެސް ފަސްނުޖެހޭނެ" ކަމަށް ބުނެފައި ވެއެވެ. މި މައްސަލަ މިހާރު ނާއިފް އަދި ދައުރު ނޫހުގެ ފަރާތުން ވަނީ ފުލުހުންނަށް ހުށަހަޅާފަ އެވެ.

"މި ޖަމިއްޔާއިން ގޮވާލަނީ މި މައްސަލަ ވީ އެންމެ އަވަސް މިނެއްގައި ތަހުގީގުކޮށް، އިންސާރު ދިން މީހުން އިންސާފުގެ ކުރިމައްޗަށް ގެނެސް، ނޫސްވެރިންނަށް ދޭން ޖެހޭ ރައްކާތެރިކަން ފުލުހުންގެ ފަރާތުން ފޯރުކޮށްދިނުމަށެވެ." ދައުރު ނޫހުގެ ނޫސްވެރިންނަށް އިންޒާރުދިން މައްސަލަ ކުށްވެރިކޮށް އެމްޖޭއޭއިން ނެރުނު ބަޔާނުގައި ބުނެފައި ވެއެވެ.

އޭގެ އިތުރުން ނޫސްވެރިންނަށްދޭ މިފަދަ އިންޒާރުތަކުގެ މައްސަލަ ފުލުހުންނަށް ހުށަހެޅި ނަމަވެސް އެ މައްސަލަތަކާއި ގުޅިގެން ކާމިޔާބު ތަހުގީގެއް ހިންގާ، އެފަދަ އިންޒާރުދޭ މީހުންނަށް ފިޔަވަޅު އެޅިފައި ނުވާތީ އެ ޖަމިއްޔާއިން ވަނީ ކަންބޮޑުވުން ފާޅުކޮށްފަ އެވެ.

ނޫސްތަކުގައި ޝާއިއުކުރާ އެކި ލިޔުންތަކާއި ގުޅިގެން ނޫސްވެރިންނަށް އިންޒާރު ދޭ މައްސަލަތައް ދޭތެރެ ދޭތެރެއިން ފެންމަތިވެ އެވެ. އެހެންނަަމަވެސް، ނޫސްވެރިންނަށް ރައްކާތެރިކަން ފޯރުކޮށްދިނުމާއި މި މައްސަލަތައް ތަހުގީގުކު ރުމުުގައި ފުލުހުންގެ ފަރާތުން އެއްބާރުލުން ނުލިބޭކަން އަަބަދުވެސް އެމްޖޭއޭއިން ފާހަގަކުރެ އެވެ.