ފުލުހުންގެ ވާޖިބަށް ހުރަސްއަޅައި، ފުލުހުންނާ މާރާމާރީ ހިންގިކަމަށް ތުހުމަތުކުރާ ހަ މީހެއްގެ މައްޗަށް ދައުވާކޮށްދިނުމަށް އެދި ޕްރޮސެކިއުޓާ ޖެނެރަލްގެ އޮފީހަށް ފޮނުވައިފި އެވެ.
ފުލުހުންގެ މުއައްސަސާއިން ބުނީ އެ ހަ މީހުންގެ މައްޗަށް ދައުވާކޮށްދިނުމަށް އެދި ޕީޖީ އޮފީހަށް ފޮނުވީ ކ. މާފުށީގައި މަސްތުވާތަކެތި ގެންގުޅެ އޭގެ ވިޔަފާރިކުރާ ކަމުގެ ތުހުމަތުގައި އޯގަސްޓު 11، 2026 ގެ މެންދުރުފަހު މީހަކު ބަލައިފާސްކުރަނިކޮށް ފުލުހުންނަށް ހަމަލާދީ މާރާމާރީ ހިންގިކަމުގެ ތުހުމަތުގައި ކަމަށެވެ.
އެ މައްސަލައިގައި ދައުވާކޮށްދިނުމަށް ފުލުހުން އެދިފައި ވަނީ އަބްދުﷲ ނިހާދު، ސްޓާލައިން، އިބްރާހިމް ސުނީޒް، ގްރީންޕާކް، އަހުމަދު އަހުނަފު އަސްފާގު، ހަސަން ނަބީލު އަދި މުހައްމަދު ޝައިހާންގެ މައްޗަށެވެ. އެ ހުރިހާ އެންމެންނަކީ ވެސް މާފުށީ ރައްޔިތުންނެވެ.
ފުލުހުން ބުނީ އެ ހުރިހާ އެންމެން ވެސް ހައްޔަރުކުރީ ކޯޓު އަމުރުގެ ދަށުން ކަމަށެވެ. އޭގެ ތެރެއިން ހަސަން ނަބީލުގެ ބަންދާމެދު ގޮތެއް ނިންމުމަށް ސެޕްޓެމްބަރު 21، ގައި ކޯޓަށް ހާޒިރުކުރުމުން އޭނާ ދޫކޮށްލާފައިވާ ކަމަށް ފުލުހުން ބުންޏެވެ. ދެން އެ މައްސަލައިގައި ދައުވާ އުފުލަށް ފުލުހުން ބޭނުންވާ ފަސް މީހުން މިހާރު ވެސް ތިބީ ފުލުހުންގެ ބަންދުގަ އެވެ.
ފުލުހުން ބުނީ އެ މާރާމާރީ ހިންގި ސަރަހައްދުން ވެސް އެ ދުވަހު މުހައްމަދު ޝާބިން ޝުޖާއު ނަމަކަށް ކިޔާ މާފުށީ ޒުވާނަކު ހައްޔަރުކުރި ކަމަށެވެ. ނަމަވެސް، އޭނާގެ ބަންދާމެދު ގޮތެއް ނިންމުމަށް މާފުށި މެޖިސްޓްރޭޓު ކޯޓަށް ގެންދިޔުމުން ޝަރުތުކުރުމަށްފަހު، އޭނާ ދޫކޮށްލި ކަމަށް ފުލުހުން ބުންޏެވެ. އެ މައްސަލަ ހައިކޯޓުގައި އިސްތިއުނާފުކޮށްފައިވާ ކަމަށް ވެސް ފުލުހުން ބުންޏެވެ،
