މިސްރުގައި ފަށާ އދ.ގެ ތިމާވެއްޓާއި މޫސުމީ ބަދަލުތަކާބެހޭ ކޮންފަރެންސް، ކޮންފެރެންސް އޮފް ދަ ޕާޓީޒް ނުވަތަ "ކޮޕް 27" ގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު، ސްރީ ލަންކާގެ ވަފުދުގެ މެމްބަރެއްގެ ގޮތުގައި އެ ގައުމު ތަމްސީލު ކުރެއްވުމަކީ ގާނޫނު އަސާސީއާ ހިލާފު އަމަލެއް ކަމަށް ކުރީގެ ބަންޑާރަ ނައިބު ޑރ. މުހައްމަދު މުނައްވަރު ވިދާޅުވެއްޖެ އެވެ.
އެ ކަންބޮޑުވުން ހިއްސާ ކުރައްވައި މުނައްވަރު މިއަދު ވަނީ ޓްވީޓް ވެސް ކުރައްވައިފަ އެވެ.
އެ ޓްވީޓަށް ދެއްވި ރައްދެއްގައި ކުރީގެ ރައީސް މައުމޫން އަބްދުލް ގައްޔޫމް ވެސް ވިދާޅުވެފައި ވަނީ "[މުނައްވަރު އެ ވިދާޅުވީ] ވަރަށް ރަނގަޅު ވާހަކަފުޅެއް" ކަމަށެވެ.
މައުމޫނުގެ 30 އަހަރުގެ ވެރިކަމުގައި ގިނަ އަހަރުތަކެއް ވަންދެން ބަންޑާރަ ނައިބުކަން ކުރެއްވި މުނައްވަރު "އަދަދު" ނޫހަށް ވިދާޅުވީ މަޖިލީހުގެ ރައީސްގެ ހައިސިއްޔަތުން އަދި މަޖިލީހުގެ މެމްބަރެއްގެ ހައިސިއްޔަތުން އިހްލާސްތެރިވާން ވާނީ ދިވެހި ގައުމަށާއި ރައްޔިތުންނަށް ކަމަށް ގާނޫނު އަސާސީގައި ބުނެފައިވާ ކަމަށެވެ.
ގާނޫނު އަސާސީގައި އެހެން ބަޔާންކޮށްފައި ވާއިރު، ބައިނަލްއަގުވާމީ ސަމިޓެއްގައި އެހެން ގައުމެއް ތަމްސީލު ކުރެއްވުމަށް ނަޝީދު ބައިވެރިވެވަޑައިގަތުމަކީ މުނައްވަރު ގަބޫލުކުރައްވާ ގޮތުގައި، ގާނޫނު އަސާސީގެ 75 ވަނަ މާއްދާ އަދި މަޖިލީހުގެ މެމްބަރުގެ ހުވައާ ހިލާފު އަމަލެކެވެ.
އެއީ ދައުލަތުގެ އެއް ބާރުގެ ވެރިޔާ. ދައުލަތުން ބާރު ދީފައި، މުޅި ރައްޔިތުން ތަމްސީލު ކުރައްވާން ހުންނެވި ބޭފުޅެއް. އެހެން ގައުމެއްގެ ފަހަތު ސީޓުގައި އިންނެވުމަށް ވަޑައިނުގެންނެވޭނެ. އެއީ ގާނޫނު އަސާސީއާ ހިލާފު ކަމެއް. ލަދުވެތި ކަމެއް،" މުނައްވަރު ވިދާޅުވި އެވެ.
މުނައްވަރުގެ އެ ވާހަކައާ ގުޅޭ ގޮތުން ރައްޔިތުންގެ މަޖިލީހުގެ އިދާރާއިން ސީދާ ޖަވާބެއް ނުދެއްވި އެވެ.
"މަޖިލިސް ރައީސް މުހައްމަދު ނަޝީދު [ކޮޕް 27 އަށް] ވަޑައިގަތީ ސީވީއެފްގެ އިންވިޓޭޝަނަކަށް، ސީއެފްސީއިން ހުރިހާ ހަރަދެއް ކުރާ ދަތުރުފުޅެއްގަ. ރާއްޖެ އަކީ ސީވީއެފްގެ މެމްބަރު ގައުމެއް. އަދި ރައީސް ނަޝީދު އަކީ ސީވީއެފްގެ ތެމެޓިކް އެމްބެސަޑަރެއް،" ރައްޔިތުންގެ މަޖިލީހުގެ މީޑިއާ އެންޑް ކޮމިއުނިކޭޝަންގެ ޑިރެކްޓަރު ހަސަން ޒިޔާއު ފޮނުއްވި މެސެޖުގައިވެ އެވެ.
ކްލައިމެޓް ވަނަރަބަލް ފޯރަމް (ސީވީއެފް) އަކީ ނަޝީދު އިސްވެ ހުންނަވައި އުފައްދާފައިވާ ބައިނަލްއަގުވާމީ ޖަމިއްޔާ އެކެވެ.
ޑިސެންބަރު 2018 ގައި ބޭއްވި ކޮޕް 24 ސަމިޓްގައި، ރައީސް އިބްރާހިމް މުހައްމަދު ސޯލިހުގެ މަންދޫބެެއްގެ ހައިސިއްޔަތުން ރާއްޖޭ ތަމްސީލު ކުރެއްވީ ނަޝީދެވެ.
އެއަށް ފަހު މިދިޔަ އަހަރު ބޭއްވި ކޮޕް 26 ސަމިޓްގައި ރާއްޖޭގެ ވަފުދުގައި އިސްކޮށް ހުންނެވީ ރައީސް އިބްރާހިމް މުހައްމަދު ސޯލިހެވެ. މިފަހަރުގެ ސަމިޓުގައި ރާއްޖޭގެ ވަފުދުގެ އިސް ބޭފުޅަކީ ނައިބު ރައީސް ފައިސަލް ނަސީމެވެ.
ސަމިޓްގައި ބައިވެރިވެވަޑައިގަތުމަށް ފައިސަލް ނަސީމް އާއި ނަޝީދު ފުރައިވަޑައިގަތީ އިއްޔެ އެވެ.
މި ފަހަރުގެ ސަމިޓްގެ މައިގަނޑު މައުލޫއަކީ "ޓުގެދާ ފޯ އިމްޕްލިމެންޓޭޝަން" ނުވަތަ ތަންފީޒު ކުރުމަށް އެއްބައިވުމެވެ.
