ސައްހަ ލިޔެކިއުންތައް ނެތި ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމަށް ޓަކައި އެމީހުން އަލުން ރާއްޖޭގެ ކަމާ ބެހޭ ނިޒާމުގައި ރަޖިސްޓްރީވާން ނަންނޯޓްކުރުމުގެ ކަންތައް 2019 ވަނަ އަހަރު ގަލޮޅު ދަނޑުގައި ކުރިއަށް ގެންދިޔައީ ބިދޭސީންގެ މައްސަލަ އޮތް ހިސާބު ރައްޔިތުންނަށް ދައްކައިލަން ކަމަށް އިކޮނޮމިކް މިނިސްޓަރު ފައްޔާޒް އިސްމާއީލް މިރޭ ވިދާޅުވެއްޖެ އެވެ.
ބިދޭސީން އަލުން ރަޖިސްޓްރީ ވުމުގެ ފުރުސަތެއް ދޭން 2019 ވަނަ އަަހަރު ހިންގި ޕްރޮގްރާމް ފުރަތަމަ ކުރިއަށް ގެންދިޔައީ އިކޮނޮމިކް މިނިސްޓްރީގަ އެވެ. އެކަމަކު އެކަމަށް އެދި އައިމީހުންގެ ކިއު ދިގުވުމުން ދެން އެ މަސައްކަތް ކުރީ ގަލޮޅު ރަސްމީ ބޯޅަދަނޑުގަ އެވެ. އެތަނަށް އެތައް ހާސް ބަޔަކު އެއްވެ ފޯމްތައް ފުރި އެވެ.
އަދަދު ނޫހުން މިހާރު ކުރިއަށް ގެންދާ "ކުޅިކޮށް" ޝޯގައި ކުރި ސުވާލަކަށް ޖަވާބު ދެއްވަމުން މިނިސްޓަރު ފައްޔާޒް މިރޭ ވިދާޅުވީ "ގަލޮޅު ދަނޑަށް [މީހުން އެއްކޮށްގެން] ޝޯއެއް ދެއްކީ ހަމަ ގަސްދުގައި" ކަމަށެވެ.
"އަޅުގަނޑުމެން ޝޯއެއް، ބޮޑު ޝޯއެއް ދެއްކީ ހަމަ ގަސްދުގައި ގަލޮޅު ދަނޑަށް [މީހުން އެއްކޮށްގެން] އެހާލަތު ރައްޔިތުންނަށް ސިފަކޮށްދޭން. މިގައުމު އޮތް ހާލަތު އެކަމުގައި [ ސައްހަ ލިޔެކިއުން ނެތް ބިދޭސީން ގިނަވުމުގެ މައްސަލާގައި]،" ފައްޔާޒް ވިދާޅުވި އެވެ.
އޭނާ ވިދާޅުވި ގޮތުގައި އޭރު ކުރިއަށް ގެންދިޔަ އަލުން ރަޖިސްޓްރީކުރުމުގެ މަސައްކަތް ހުއްޓުނީ ކޮވިޑް-19 ގެ ބަލިމަޑުކަން ކުރިމަތިވުމުން ކަމަށެވެ، އެހެން ނަމަވެސް އޭނާ ސިފަކުރެއްވި ގޮތުގައި އެ ޕްރޮގްރާމުން ރަނގަޅު ނަތީޖާއެއް ހާސިލުވި އެވެ.
"25،000 މީހުން ފޮނުވައިލެވުނު، 9،000 މީހުން ރެގިއުލަރައިޒް ކުރެވުނު"
މިނިސްޓަރު ވިދާޅުވި ގޮތުގައި ބިދޭސީންގެ މައްސަލަ ހައްލުކުރުމަށް ޓަކައި ބަންގްލަދޭޝްމީހުންނަށް އަމާޒުކޮށް އޭރު ކުރިއަށް ގެންދިޔަ ޕްރޮގްރާމްގައި ރަޖިސްޓްރީ ވާން އައި ޖުމްލަ 43،000 މީހުންގެ ތެރެއިން 25،000 މީހުން ވަނީ ރާއްޖޭން ފޮނުވައިލައިފަ އެވެ. ރަޖިސްޓްރީ ވާން އައި މީހުންގެ ތެރެއިން 9،000 މީހުން މިހާރު ރެގިއުލަރައިޒްކުރެވިފައިވާ ކަމަށް ވެސް އޭނާ ވިދާޅުވި އެވެ.
އެ ހިސާބުތަކަށް ބަލާ އިރު ގޮތެއް ނުނިމި ވަނީ 9،000 މީހުންނާ މެދުގަ އެވެ.
"އެހެންވީމާ [ކާމިޔާބެއް] ނުވޭތޯ؟ އިތުރަަކަށް މީހުންނެއް އިތުރެއް ނުވޭ. ފަންސަވީސްހާސް މަދުކުރެވިއްޖެ. ނުވަހާސް ކޮންމެސް ވަރެއް ރެގިއުލަރައިޒްކުރެވިއްޖެ. ކޮވިޑްގެ ދެ އަހަރުވެސް އައިސްފައި އެ ދިޔައީ،" ފައްޔާޒް ވިދާޅުވި އެވެ.
އޭނާ ވިދާޅުވީ ސައްހަ ލިޔެކިއުން ނެތި ގިނަ އަދަދެއްގެ ބިދޭސީން އެތެރެކުރި މައްސަލައަކީ އެމްއެމްޕީއާރުސީގެ ބޮޑު ހިޔާނާތަށް ވުރެ ވެސް ބޮޑު މައްސަލައެއް ކަމަށެވެ. އެ މައްސަލައަކީ އެހާ ބޮޑު މައްސަލައެއް ކަމަށް އޭނާ މީގެ ކުރިން ވެސް އެކިފަހަރު ވިދާޅުވެފައި ވެ އެވެ.
