މީގެ ދެ އަހަރު ފަހުން 2028 ގައި ބާއްވާ ރިޔާސީ އިންތިހާބުގައި އިދިކޮޅު އެމްޑީޕީގެ ޗެއާޕާސަން މުހައްމަދު ނަޝީދު ވާދަނުކުރައްވާނެ ކަމަށް، ކުރީގެ ޔޫތު މިނިސްޓަރު ހަސަން ލަތީފް ވިދާޅުވެއްޖެ އެވެ.
ނަޝީދާއެކު ވަރަށް ގާތްކޮށް މަސައްކަތް ކުރައްވާ ހަސަން، އަދަދު އިން ގެނެސްދޭ "އެތެރެފުށް" ޕްރޮގްރާމުގައި ވާހަކަ ދައްކަވަމުން ވިދާޅުވީ، 2028 ގެ އިންތިހާބުގައި ނަޝީދު ވާދަ ނުކުރައްވާނެކަމުގެ ޔަގީންކަން އޭނާއަށް އެބަ އޮތް ކަމަށެވެ.
"އަޅުގަނޑު ދަންނަ ރައީސް ނަޝީދެއް މިފަހަރު ރިޔާސީ އިންތިހާބުގައި ވާދަކުރައްވާކަށް ޕްރައިމަރީއަކަށް ނުނިކުންނަވާނެ،" ހަސަން ވިދާޅުވި އެވެ.
ހަސަން ވިދާޅުވީ، ސިޔާސީ ގޮތުން ބަލާއިރު ވެސް، ރިޔާސީ އިންތިހާބުގައި ނަޝީދު ވާދަ ކުރައްވާނެ ކަމަށް ނުބެލެވޭ ކަމަށެވެ.
"ސިޔާސީ ނިންމުމެއްގައި އެވަގުތަށް އެންމެ ރަނގަޅު ގޮތްގޮތް ނިންމާފާނެ. އަޅުގަނޑު މި ދަންނަވާ ވާހަކައަކީ އެހެންވީމައޭ [ސިޔާސީ ނިންމުމެއް ވީމައޭ] އަޅުގަނޑަށް ގަބޫލު ނުކުރެވެނީ މިފަހަރު ރައީސް ނަޝީދު ނުކުމެވަޑައިގެންފާނެ ކަމަށް،" އޭނާ ވިދާޅުވި އެވެ.
މީގެ ކުރިން ނަޝީދު ވަނީ އެމަނިކުފާނު ރިޔާސީ އިންތިހާބަށް ނުކުމެވަޑައިގަތުމުގެ ބަދަލުގައި، އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލަށް ތާއީދު ކުރައްވާނެކަން އިއުލާނު ކުރައްވާފަ އެވެ. ނަމަވެސް އެގޮތަށް އިއުލާނު ކުރެއްވި ނަމަވެސް ނަޝީދު އިންތިހާބުގައި ވާދަ ކުރައްވާނެ ކަމަށް ސިޔާސީ ވާދަވެރިން ދަނީ ބުނަމުންނެވެ.
އެކަމަށް ރައްދު ދެއްވަމުން ހަސަން ލަތީފް ވިދާޅުވީ، ރައީސް ނަޝީދަކީ އެއްވެސް މީހަކަށް ލަނޑުދެއްވަމުން ވަޑައިގަންނަވާ ބޭފުޅެއް ނޫން ކަމަށެވެ.
"އަޅުގަނޑަކަށް ހިޔެއް ނުވޭ ރައީސް ނަޝީދަކީ އެކަހަލަ ބޭފުޅެއް ކަމަށް... އަޅުގަނޑަކަށް ނުފެނޭ އެގޮތަކަށް ބޭބޭފުޅުންނަށް ލަނޑުދެއްވަމުން ވަޑައިގަންނަވާ ބޭފުޅެއް ގޮތަކަށް،" އޭނާ ވިދާޅުވި އެވެ.
ރިޔާސީ އިންތިހާބުގައި އެމަނިކުފާނު ވާދަ ނުކުރައްވައި، ފައްޔާޒަށް ތާއީދު ކުރައްވަން ނިންމެވީ ރާއްޖެ ހިންގާ ގޮތަށް ބަދަލުތަކެއް ގެނައުމުގެ ބޭނުމުގައި އުފަންކޮށްފައިވާ "ބޮޑު ބަދަލު" ޑޮކިއުމެންޓު ފާސްކުރުމަށެވެ.
"މި ބަދަލުތައް، ބޮޑު ބަދަލު ގެނައުމަށްޓަކައި، އަޅުގަނޑު ތާއީދު ކުރަން ފައްޔާޒް އިސްމާއިލް އެއީ ސަރުކާރުގެ އެންމެ މަތީ ވެރިޔާގެ ގޮތުގައި ކުރިމަތިލުމަށް،" ނަޝީދު ވިދާޅުވެފައިވެ އެވެ.
