އިދިކޮޅު މޯލްޑިވިއަން ޑިމޮކްރެޓިކް ޕާޓީ އިން ބާއްވާ ރިޔާސީ ޕްރައިމަރީގައި ވާދަ ކުރައްވާނެކަން އެ ޕާޓީގެ ރައީސް އަބްދުﷲ ޝާހިދު މިރޭ އިއުލާން ކުރައްވާނެ އެވެ.
ރިޔާސީ ޕްރައިމަރީގައި ވާދަ ކުރައްވަން ނިންމައި އެކަން މިރޭ އިއުލާނު ކުރައްވާނެ ކަމަށް އިތުބާރު ހުރި މަސްދަރަކުން އަދަދު އަށް ވަނީ ޔަގީންވެފަ އެވެ.
ޝާހިދު މިހާރު ހުންނެވީ އައްޑޫ ސިޓީގަ އެވެ. ރިޔާސީ ޕްރައިމަރީގައި ވާދަ ކުރައްވާނެކަން އިއުލާން ކުރައްވާނީ މިރޭ އައްޑޫގައި ބާއްވާ ޖަލްސާއެއްގައިކަން މި ނޫހަށް އެނގިފައިވެ އެވެ.
އެމްޑީޕީގެ ރިޔާސީ ޕްރައިމަރީގައި ވާދަ ކުރައްވަން ނިންމައި ކުރީގެ ރައީސް އިބްރާހިމް މުހައްމަދު ސޯލިހު ވަނީ ބައެއް ބޭފުޅުން ކައިރީ އެ ވާހަކަ ދައްކަވައިފަ އެވެ. ނަމަވެސް ސޯލިހުގެ ނިންމުން ރަސްމީކޮށް އިއުލާނެއް ނުކުރައްވަ އެވެ.
އޭގެ އިތުރުން ރިޔާސީ ޕްރައިމަރީގައި ވާދަ ކުރައްވާނެކަން ކުރީގެ އިގްތިސާދީ މިނިސްޓަރު ފައްޔާޒް އިސްމާއިލް ވެސް ވަނީ އިއުލާނު ކުރައްވައިފަ އެވެ. ޕާޓީގެ ޗެއާޕާސަން އަދި ކުރީގެ ރައީސް މުހައްމަދު ނަޝީދު ނިންމެވީ ރިޔާސީ ޕްރައިމަރީގައި ވާދަ ނުކުރައްވައި ފައްޔާޒަށް ތާއީދު ކުރައްވާށެވެ.
ދިވެހިރާއްޖޭގައި ބޭއްވި އެންމެ ފުރަތަމަ ގިނަ ޕާޓީ އެކުލެވޭ އިންތިހާބު 2008 ކާމިޔާބު ކުރެއްވީ އެމްޑީޕީގެ ކެންޑިޑޭޓު ނަޝީދެވެ. ނަމަވެސް ފުލުހުންނާއި ސިފައިން ހިންގި މިއުޓިނީއެއްގެ ތެރެއިން ނަޝީދު ވަނީ ދައުރު ހަމަނުވަނީސް އިސްތިއުފާ ދެއްވައިފަ އެވެ.
އޭގެ ފަހުން 2018 ވަނަ އަހަރު އެމްޑީޕީގެ ޓިކެޓުގައި ވާދަ ކުރައްވައި ރައީސް ސޯލިހު ވަނީ އިންތިހާބު ކާމިޔާބު ކުރައްވައިފަ އެވެ. އެންމެ ފަހުން 2023 ވަނަ އަހަރު ބޭއްވި އިންތިހާބުގައި ވެސް ސޯލިހު ވާދަ ކުރެއްވި އެވެ.
