އަންނަ ރިޔާސީ އިންތިހާބުގައި ވާދަ ކުރާނެ ކެންޑިޑޭޓަކު ކަނޑައަޅަން އިދިކޮޅު މޯލްޑިވިއަން ޑިމޮކްރެޓިކް ޕާޓީ އިން ބާއްވާ ރިޔާސީ ޕްރައިމަރީގައި ވާދަ ކުރައްވަން ކުރީގެ ރައީސް އިބްރާހިމް މުހައްމަދު ސޯލިހު ނިންމަވައިފި އެވެ.
ރިޔާސީ ޕްރައިމަރީގައި ވާދަ ކުރައްވަން ނިންމަވައި، އިއްޔެ އާއި މިއަދު ކުރިއަށްގެންދިޔަ ބައެއް ބައްދަލުވުންތަކުގައި ސޯލިހު ވަނީ އެމަނިކުފާނުގެ ނިންމެވުން ބައެއް ބޭފުޅުންނާ ހިއްސާ ކުރައްވާފައިކަން އަދަދު އަށް ވަނީ ޔަގީންވެފަ އެވެ.
"ރަސްމީކޮށް ވާދަ ކުރައްވަން ނިންމަވައި އެ ހުށަހެޅުން މިހާރު އެކި ބޭފުޅުންނަށް އެ ހުށަހަޅުއްވަނީ،" ނަން ނުޖެހުމަށް ޝަރުތުކޮށް މި ނޫހާ ވާހަކަ ދެއްކި މަސްދަރަކުން ބުންޏެވެ.
ރިޔާސީ ޕްރައިމަރީގައި ސޯލިހު ވާދަ ކުރައްވަން ނިންމެވި ވާހަކަ، އެ ޕްރައިމަރީގައި ވާދަ ކުރަން ޝައުގުވެރިކަން ފާޅު ކުރައްވާފައިވާ ބައެއް އެހެން ބޭފުޅުންނާ ވަނީ ހިއްސާ ކުރައްވާފަ އެވެ. އޭގެ ތެރޭގައި ޕާޓީގެ ރައީސް އަބްދުﷲ ޝާހިދު ހިމެނިވަޑައިގަންނަވާ ކަން އެނގިފައިވެ އެވެ.
އެމްޑީޕީގެ ރިޔާސީ ޕްރައިމަރީގައި ވާދަ ކުރައްވާނެކަން ކުރީގެ އިގްތިސާދީ މިނިސްޓަރު ފައްޔާޒް އިސްމާއިލް ވެސް ވަނީ އިއުލާނު ކުރައްވާފަ އެވެ. ފައްޔާޒްއަށް ތާއީދު ކުރައްވަން ކުރީގެ ރައީސް މުހައްމަދު ނަޝީދު ވަނީ ނިންމަވައިފަ އެވެ.
ސޯލިހު ރާއްޖޭގައި ވެރިކަން ކުރެއްވީ ނޮވެމްބަރު، 2018، އިން ފެށިގެން ނޮވެމްބަރު، 2023، އަށެވެ. އެންމެ ފަހުން 2023 ގައި ބޭއްވި ރިޔާސީ އިންތިހާބުގައި ވެސް އެމަނިކުފާނު ބައިވެރިވެވަޑައިގެންނެވި އެވެ.
ސޯލިހަކީ އެމްޑީޕީގެ ކެންޑިޑޭޓެއްގެ ގޮތުގައި ރައީސުލްޖުމްހޫރިއްޔާ ފުރުއްވި ދެވަނަ ބޭފުޅާ އެވެ. ދިވެހިރާއްޖޭގައި ބޭއްވި އެންމެ ފުރަތަމަ ގިނަ ޕާޓީ އެކުލެވޭ އިންތިހާބު ވެސް ކާމިޔާބު ކުރީ އެމްޑީޕީ އެވެ. 2008 ގައި ބޭއްވި އެ އިންތިހާބު ކާމިޔާބު ކުރެއްވީ ނަޝީދެވެ.
