ދީނީ ގޮތުން ހައްދުފަހަނައަޅާފައިވާ ފިކުރުގެ ހަނގުރާމަވެރި ޖަމާއަތެއްކަމަށްވާ އިސްލާމިކް ސްޓޭޓް (އައިއެސް)ގައި އިސްކޮށް ހަރަކާތްތެރިވަމުން އަންނަ ދިވެއްސަކު ހައްޔަރުކޮށްފައިވާކަމަށް ފުލުހުން މިރޭ ބުނެފި އެވެ.

ޕޮލިސް ކޮމިޝަނަރު މުހައްމަދު ހަމީދު މިރޭ ކުރެއްވި ޓްވީޓެއްގައި ވިދާޅުވީ މިދިޔަ މަހުގެ ހަ ވަނަ ދުވަހު އެމެރިކާގެ އެފްބީއައިގެ އިތުރުން ޔޫރަޕިއަން ޔޫނިއަން (އީޔޫ)ގެ ދެ ގައުމެއްގެ އިދާރާތަކާ ގުޅިގެން ހައްޔަރުކޮށްފައިވަނީ 30 އަހަރުގެ ދިވެހި ފިރިހެނެއް ކަމަށެވެ.

އޭނާއަކީ އެ ޖަމާއަތުގެ ދީނީ ހަރުކަށި ފިކުރު ފެތުރުމަށް މީޑިއާ ކެމްޕޭނުތައް ހިންގުމާއި ޔޫރަޕުގެ ގައުމުތަކަށް ހަމަލާދޭން ގޮވާލަމުންދާ މީހެއް ކަމަށް ހަމީދު ވިދާޅުވި އެވެ.

ރާއްޖޭގައި ހުރެގެން އޭނާ އެ ހަރަކާތްތައް 2015 ވަނަ އަހަރުން ފެށިގެން ހިންގަމުން އަންނަ ކަމަށް ވެސް ކޮމިޝަނަރު ވިދާޅުވި އެވެ.

ހަމީދު އިތުރަށް ވިދާޅުވީ މި މައްސަލާގައި ޓެރަރިޒަމްގެ ސީރިއަސް ތަހުގީގެއް ހިނގަމުންދާ ކަމަށާއި އެކަމުގެ މައުލޫމާތު ތަފްސީލީ ނޫސްބަޔާނެއް މެދުވެރިކޮށް ހާމަކުރެވިގެންދާނެ ކަމަށެވެ.