ބައިނަލްއަގްވާމީ އަންހެނުންގެ ދުވަހާ ގުޅުވައިގެން 2014 ވަނަ އަހަރުން ފެށިގެން ދިވެހި ސަރުކާރުން ދެމުން އަންނަ ރެހެންދި އެވޯޑް ދިނުމުގެ، މިދިޔަ އަހަރާއި މި އަހަރުގެ ހަފުލާ މިރޭ ބާއްވައި 13 މީހަކަށް އިނާމު ދީފި އެވެ.
އާއްމުކޮށް އަންހެނުންގެ ދުވަހު ބާއްވާ އެކަމަކު ކޮވިޑުގެ ސަބަބުން މި ދެ އަހަރު އެ ދުވަހު ނުބޭއްވުނު ހަފުލާ މިރޭ ޝަރަފްވެރިކޮށްދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހެވެ.
މިދިޔަ އަހަރުގެ ރެހެންދި އެވޯޑްތަކުގެ ތެރެއިން އިޖްތިމާއީ ދާއިރާ އިން އިނާމު ހާސިލްކުރީ ފާތިމަތު އިބްރާހިމް އާއި އަލްއުސްތާޒާ މަރިޔަމް ޝުނާނާ އެވެ. އަދާކުރާ ވަޒީފާގެ ގޮތުން އޮފީހަށް ނުވަތަ ދާއިރާއަށް ކޮށްދީފައިވާ ހިދުމަތުގެ ދާއިރާ އިން އިނާމު ލިބުނީ ޅެންވެރިޔާ އާއިޝަތު ހުސެއިން މަނިކު އާއި ބްރޯޑްކާސްޓިން ކޮމިޝަނުގެ މެމްބަރު އަދި ކުރީގެ ނޫސްވެރިޔާ އައިމިނަތު އަމީނާ (އަނާ) އާއި އަލްއުސްތާޒާ ހައްވާ ލަތީފް އާއި މިންހާ ފާއިޒް އަދި ނޫސްވެރިޔާ ޝިފްޒާ މުސްތަފާ އަށެވެ.
މި އަހަރުގެ އިނާމުތަކުގެ ތެރެއިން ތައުލީމީ ދާއިރާ އިން އިނާމް ލިބުނީ އަހްމީމާ ލުތުފީ އަށެވެ. ސައިންސް، ޓެކްނޮލޮޖީ، އިންޖިނިއަރިން އަދި މެތެމެޓިކްސް (ސްޓެމް) ދާއިރާ އިން އިނާމް ހާސިލްކުރީ ޒީނިޔާ އަހުމަދު ހަމީދު އާއި އާއިމިނަތު ޝަހާ ހާޝިމެވެ. ހިލޭ ސާބަހަށް މަސައްކަތްކުރުމުން ނާދިޔާ އަބްދުލްޣަފޫރު އިނާމް ހޯދިއިރު ކުޅިވަރުގެ ދާއިރާ އިން ލިބުނީ ހައްވާ ރާމިޒާ އަށެވެ. އަދާކުރާ ވަޒީފާގެ ގޮތުން އޮފީހަށް ނުވަތަ ދާއިރާއަށް ކޮށްދީފައިވާ ހިދުމަތުގެ ދާއިރާ އިން އިނާމު ލިބުނީ އެމްއެންޑީއެފްގެ ސާޖަންޓް ފަސްޓް ކްލާސް ނަސްރީނާ ހަސަން އަށެވެ. އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުން އިނާމް ހޯދީ ލ. ފޮނަދޫ ކޮމިޓީ އެވެ. އާއްމު ފަރުދުންގެ ތެރެއިން އަންހެނުންގެ ތަރައްގީއަށް މަސައްކަތްކުރާ ފިރިހެނުންނާއި އަންހެނުންގެ ކެޓަގަރީން އިނާމު ހޯދީ ޝިޔާމާ އަހުމަދެވެ.
ޖެންޑާ މިނިސްޓްރީން ދޭ ރެހެދިން އެވޯޑުގެ މަގުސަދަކީ އަންހެނުން ކުރާ މަސައްކަތްތަކާއި ހާސިލުކޮށްފައިވާ ކާމިޔާބީތަކުގެ އަގުވަޒަންކޮށް، ގައުމީ ތަރައްގީގައި އަންހެނުންގެ ބައިވެރިވުން އިތުރުކުރުމެވެ. އަދި މިންތީ ތަފާތުތައް ނައްތާލައި ދެޖިންސުގެ ދެމެދުގައި ހަމަހަމަކަން ގާއިމު ކުރުމަށް މަސައްކަތްކުރާ، ވަކިވަކި ފަރުދުންނާއި އަމިއްލަ ޖަމްއިއްޔާ ޖަމާއަތްތަކުގެ މަސައްކަތްތައް ބަލައިގަނެ، ގައުމީ ފެންވަރެއްގައި އަގު ވަޒަން ކުރުމަކީ ވެސް، ރެހެންދި އެވޯޑް ދިނުމުގެ ބޭނުމެއް ކަމަށް އެ ފަރާތުން ބުނެ އެވެ.
