ރައީސް މުހައްމަދު މުއިއްޒުގެ ސަރުކާރުގައި އިސްލާމިކް މިނިސްޓްރީގެ ސިވިލް ސާވިސް މުވައްޒަފުންގެ އަދަދަށް ބޮޑު ބަދަލެއް ނައި ނަމަވެސް، އެ މިނިސްޓްރީގެ ސިޔާސީ މުވައްޒަފުންގެ އަދަދު ތިން ގުނައަށް ވުރެ އިތުރުވެފައިވާކަން ރަސްމީ ހިސާބުތަކުން ހާމަވެއްޖެ އެވެ.
މައުލޫމާތު ހޯދައި ލިބިގަތުމުގެ ހައްގުގެ ދަށުން އަދަދު ނޫހުން ހޯދާފައިވާ ތަފާސްހިސާބުތަކުން ދައްކާ ގޮތުގައި، އިސްލާމިކް މިނިސްޓްރީގައި، ޖެނުއަރީ 2023، ގައި ތިބީ 15 ސިޔާސީ މުވައްޒަފުންނެވެ. ނަމަވެސް އޮކްޓޫބަރު 2026، އާ ހަމައަށް އައިއިރު މި އަދަދު ވަނީ 54 އަށް އަރާފަ އެވެ.
މިއީ ގާތްގަނޑަކަށް 260 ޕަސެންޓުގެ އިތުރުވުމެކެވެ. ޖެނުއަރީ 2023، އިން އޮކްޓޯބަރު 2026، ގެ ނިޔަލަށް ސިވިލް ސާވިސް މުވައްޒަފުންގެ އަދަދު 708 އިން 720 އަށް ބަދަލުވެފައިވާއިރު، މިއީ އެންމެ ދެ ޕަސެންޓުގެ ކުރިއެރުމެކެވެ.
ސިޔާސީ މުވައްޒަފުންގެ މުސާރައަށް އިސްލާމިކް މިނިސްޓްރީން ޖެނުއަރީ 2023 ގައި 414،923 ރުފިޔާ ހޭދަކުރިއިރު، އޮކްޓޫބަރު 2026 ގައި މި އަދަދު ވަނީ 1.33 މިލިއަން ރުފިޔާއަށް އުފުލިފަ އެވެ. މިއީ 221 ޕަސެންޓު އިތުރުވުމެކެވެ.
ތަފާސްހިސާބުތަކުން ދައްކާ ގޮތުގައި ޖެނުއަރީ 2023 އިން އޮކްޓޫބަރު 2026، އާ ހަމައަށް ސިޔާސީ މުވައްޒަފުންގެ މުސާރައަށް ހަރަދުކުރީ 43.05 މިލިއަން ރުފިޔާ އެވެ. ހަމަ މި މުއްދަތުގައި ސިވިލް ސާވިސް މުވައްޒަފުންނަށް ހޭދަކުރީ 431.74 މިލިއަން ރުފިޔާ އެވެ.
ހިސާބުތަކަށް ބަލާއިރު 2026 ވަނަ އަހަރަކީ ސިޔާސީ މުވައްޒަފުންނަށް އެންމެ ބޮޑު ހޭދައެއް ކުރާ އަހަރަށް ވުމުގެ ފުރުސަތު ބޮޑެވެ. އެގޮތުން 2026 ގެ ފުރަތަމަ 10 މަސްދުވަހުގެ ތެރޭގައި އެކަނިވެސް 12.54 މިލިއަން ރުފިޔާ ސިޔާސީ މުވައްޒަފުންނަށް ވަނީ ދީފަ އެވެ. މިއީ 2025 ވަނަ އަހަރުގެ މުޅި އަހަރު ދުވަހު ހޭދަކުރި 12.61 މިލިއަން ރުފިޔާއާ ގާތްކުރާ އަދަދެކެވެ.
ސިވިލް ސާވިސް މުވައްޒަފުންގެ އަދަދަށް ބޮޑު ބަދަލެއް ނައި ނަމަވެސް، އެ މުވައްޒަފުންނަށް ކުރާ ހޭދަ ވެސް ވަނީ އިތުރުވެފަ އެވެ. ޖެނުއަރީ 2023، ގައި ސިވިލް މުވައްޒަފުންނަށް 7.6 މިލިއަން ރުފިޔާ ހޭދަކުރިއިރު، އޮކްޓޫބަރު 2026، ގައި އެ އަދަދު ވަނީ 13.0 މިލިއަން ރުފިޔާއަށް އަރާފަ އެވެ.








