ފޮރިން ސާވިސްގެ އެކި މަގާމުތަކަށް އައްޔަނުކޮށްފައި ތިބި ޖުމުލަ މުވައްޒަފުންގެ އަދަދު ހާމަކޮށްދިނުމަށް ގަލޮޅު އުތުރު ދާއިރާގެ މެންބަރު، މުހައްމަދު އިބްރާހިމް ހުށަހަޅުއްވައިފި އެވެ.
ފޮރިން މިނިސްޓަރު، އިރުތިޝާމް އާދަމްއަށް ކުޑޫ ފޮނުއްވާފައިވާ ސުވާލުގައި ވަނީ އިއްޔެގެ ނިޔަލަށް ފޮރިން ސާވިސް ގާނޫނުގެ ދަށުން ފޮރިން ސާވިސްގެ ހުރިހާ ގިންތިއަކުން އައްޔަނުކޮށްފައިވާ ޖުމުލަ މުވައްޒަފުންގެ އަދަދު ސާފުކޮށްދިނުމަށް އެދިވަޑައިގެންފަ އެވެ.
އޭގެ އިތުރުން، ފޮރިން ސާވިސް ގާނޫނުގެ ދަށުން ވަކި ޒިންމާއެއް އަދާކުރުމަށްޓަކައި އައްޔަނުކޮށްފައިވާ މުވައްޒަފުންގެ ޖުމުލަ އަދަދާއި އެ މުވައްޒަފުން އައްޔަނުކޮށްފައި ވަނީ ކޮން ޒިންމާއެއް އަދާކުރުމަށްޓަކައިކަން ސާފުކޮށްދިނުމަށް ވެސް ކުޑޫ ސުވާލު ހުށަހަޅުއްވައިފައިވެ އެވެ.
އަދި، ކަނޑައެޅޭ ވަކި ޒިންމާއެއް އަދާކުރުމަށްޓަކައި މުވައްޒަފުން ނަގާއިރު، ފޮރިން މިނިސްޓްރީގައި ގިނަ ދުވަހު މަސައްކަތްކޮށްފައިވާ މުވައްޒަފުންގެ ބަދަލުގައި އެ މިނިސްޓްރީގެ ދަށުން ހިންގަމުންދާ މިޝަންތަކާއި އާންމު ކޮންސިއުލާ މަގާމުތަކަށް މިނިސްޓްރީން ބޭރުން މީހުން އައްޔަނުކޮށްފައިވާ ސަބަބުތައް ސާފުކޮށްދިނުމަށް ވެސް ކުޑޫ ސުވާލު ހުށަހަޅުއްވާފައިވެ އެވެ.
ފޮރިން ސާވިސްގެ އެކި މަގާމުތަކަށް އައްޔަނުކޮށްފައި ތިބި ޖުމުލަ މުވައްޒަފުންގެ އަދަދު ހޯދަން ކުޑޫ ހުށަހަޅުއްވާފައިވާއިރު، ވެރިކަމަށް ތިން އަހަރުވާން ގާތްވެފައިވާއިރު ސަރުކާރުގެ ސިޔާސީ މުވައްޒަފުންގެ އަދަދު ހާމަކުރަން ތަކުރާރުކޮށް އެކި ފަހަރުމަތިން ސަރުކާރުން ވަނީ ދެކޮޅު ހަދައިފަ އެވެ.
ސިޔާސީ މުވައްޒަފުންގެ އަދަދު 14 ދުވަސް ތެރޭގައި ހާމަކުރަން ރައީސް އޮފީހަށް އަންގައިފި
މި ސަރުކާރުން އައްޔަންކުރި ސިޔާސީ މުވައްޒަފުންގެ އަދަދާއި، މުސާރަ އަދި އިނާޔަތްތަކުގެ ތަފްސީލު 14 ދުވަސް ތެރޭގައި ހާމަކުރުމަށް އިންފޮމޭޝަން ކޮމިޝަނަރުގެ އޮފީހުން ރައީސް އޮފީހަށް އަންގައިފި. މިގޮތަށް އެންގީ "އަދަދު" ނޫހުން އެދިފައިވާ މައުލޫމާތުތައް ގާނޫނީ މުއްދަތުގައި ފޯރުކޮށްދީފައި ނުވާތީ، އެ މައުލޫމާތު ހިފޭއްޓޭނެ މަގުބޫލު ސަބަބެއް ނެތުމުން.
އެންމެފަހުން، މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން އެ މައުލޫމާތު ހޯދަން ހުށަހެޅުމުން ވެސް ރައީސް އޮފީހުން އެ މައުލޫމާތު ހާމަކޮށްފައެއް ނުވެ އެވެ. އަދި، ޖުލައި 5، އިން ފެށިގެން 14 ދުވަހުގެ ތެރޭގައި އެ މައުލޫމާތު ހާމަކުރަން އިންފޮމޭޝަން ކޮމިޝަނަރުގެ އޮފީހުން ރައީސް އޮފީހަށް އެންގުމުން ވެސް އެ އޮފީހުން އެ މައުލޫމާތު ހާމަކޮށްފައެއް ނުވެ އެވެ.
ފޮރިން މިނިސްޓްރީއަކީ އެންމެ ގިނަ އަދަދަކަށް ސިޔާސީ މުވައްޒަފުން އައްޔަނުކޮށްފައި ތިބި އެއް މިނިސްޓްރީއަށް ވާއިރު، އެ މިނިސްޓްރީގައި ތިބި ސިޔާސީ މުވައްޒަފުންގެ އަދަދު މިހައިތަނަށް ހާމަކޮށްފައެއް ނުވެ އެވެ.
