ދިވެހި ރައްޔިތުންނަށް ރީތި މިސާލު ދައްކަވައި އިސްލާމިކް މިނިސްޓަރު ޑރ. މުހައްމަދު ޝަހީމް ސަރުކާރާ ދުރަށް ވަޑައިގަތުމަށް ކުރީގެ ރައީސް އަބްދުﷲ ޔާމީން ރޭ އެދިވަޑައިގެންފި އެވެ.
ޕީއެންއެފް އިން ބޭއްވި ޖަލްސާގައި ޔާމީން ވިދާޅުވީ ޝަހީމަކީ އިސްލާމީ ކަންކަމުގައި ވަރުގަދައަށް ހިފަހައްޓާ ބޭފުޅެއް ކަމަށް ގިނަ ބަޔަކު ގަބޫލުކުރާއިރު، ސަމޯއާ އެގްރީމެންޓާއި ރަސްމާލެ ޑީލު ހުއްޖަތަކަށް ދައްކަވައި ޝަހީމް ސަރުކާރާ ދުރަށް ވަޑައިގަންނަވަން ޖެހޭ ކަމަށެވެ. އެމަނިކުފާނު ވިދާޅުވީ އެއަށްވުރެ ބޮޑަށް ޝަހީމްގެ ކިބައިން ދިވެހިން މިވަގުތު އެދޭނެ ކަމެއް ނޯންނާނެ ކަމަށެވެ.
"ސަމޯއާ އެގްރީމެންޓް ތަސްދީގުކޮށް އަދި ބަލައިގަނެ، އެއީ ދިވެހިރާއްޖޭގައި ޕްރެކްޓިސް ކުރެވޭނެ އެއްޗެއް ކަމުގެ ސީލް ޖަހައިދީފައި އޮތީ މުއިއްޒު ސަރުކާރުގައި އެނގޭތޯ. ދެވަނަ ކަމަކަށް މި އޮތީ ޔަހޫދީ މާލޭގެ މައްސަލަ. މި ދެ މައްސަލައާ ގުޅިގެން ހަމަގައިމުވެސް އަޅުގަނޑު ވަރަށް އިހްތިރާމްކުރާ ބޭފުޅެއް އިސްލާމިކް މިނިސްޓަރު ޑޮކްޓާ ޝަހީމަކީ،" ޔާމީން ވިދާޅުވި އެވެ.
"އަދި ޑޮކްޓާ ޝަހީމަކީވެސް އިސްލާމީ ކަންތައްތަކުގައި ވަރުގަދައަށް ހިފަހައްޓަވާ ބޭފުޅެއް ކަމަށް ގިނަ ބަޔަކު ގަބޫލުކުރޭ. އެހެންވީމާ މި ދެ މައްސަލައިގައި އިނގޭތޯ، މި ދެ މައްސަލައިގައި ހައްގުގައި އަޅުގަނޑު ވަރަށް އުފާވާނެ، ވަރަށް މަރުހަބާކިޔަން މި ދެ މައްސަލައިގައި ހަމަ ހުއްޖަތަކަށް ދައްކަވާފައި ޑޮކްޓާ ޝަހީމް ދެން މި ސަރުކާރާ ދުރަށް ވަޑައިގަންނަވާ. އެއަށްވުރެން ބޮޑަކަށް ދިވެހިން އެދޭނެ ކަމެއް ނޯންނާނެ އިނގޭތޯ."
ޝަހީމަށް ނަސޭހަތްތެރިވަމުން ޔާމީން ވިދާޅުވީ ޝަހީމް މިހާތަނަށްވެސް ދައްކަވާފައިވަނީ ރީތި މިސާލު ކަމަށެވެ. ނަމަވެސް ރައީސް މުހައްމަދު މުއިއްޒާ މިކަމާ ގުޅިގެން ވާހަކަ ދައްކަވައިފީމޭ ވިދާޅުވިޔަސް އެކަން ގަބޫލުނުކުރައްވާނެ ކަމަށް ޔާމީން ވިދާޅުވި އެވެ.
"އެހެންވީމަ އަޅުގަނޑުމެން ޑޮކްޓާ ޝަހީމަށް މި ނަސޭހަތްތެރިވަނީ އިނގޭތޯ. ޑޮކްޓާ ޝަހީމް އަޅުގަނޑުމެންނަށް މިހާތަނަށް ދައްކުވައިދެއްވީ ހަމަ ރީތި މިސާލު އިނގޭތޯ. މި ކަމުގައި ދައްކަވަންޖެހޭ. އަޅުގަނޑެއް ގަބޫލެއް ނުކުރާނަން ވަކިވަކިން ރައީސުލްޖުމްހޫރިއްޔާއާ ތިމަންނަމެން މި ވާހަކަ ދައްކައިފީމޭ މި ބުނުމަކުންނެއް އިނގޭތޯ،" ޔާމީން ވިދާޅުވި އެވެ.
އިލްމުވެރިންގެ ގުޅުމުން ވަކިވެވަޑައިގެންނެވި ޝެއިހުން އަނެއްކާވެސް އިލްމުވެރިންގެ ގުޅުމާ ގުޅިވަޑައިގަނެ، ސަލަފް ޖަމިއްޔާއިންވެސް ސަރުކާރާ ދުރަށް ވަޑައިގަތުމަށް ޔާމީން އެދިވަޑައިގެންނެވި އެވެ.
"އަޅުގަނޑު މިއަދު ސަލަފަށް ވެސް ދަންނަވާލަން ބޭނުންވަނީ ތި ވަކިވެވަޑައިގެންނެވި ހަތަރު ޝެއިހުން ވެސް އަނބުރާ އިލްމުވެރިންގެ ގުޅުމާ ގުޅިވަޑައިގެންފައި، ތި ބޭފުޅުން މި ސަރުކާރާ ވަކިވެވަޑައިގަންނަވާ. ސަރުކާރުގެ އުސޫލުތަކަށް ތާއީދުކުރައްވާ ޖެހިވަޑައެއް ނުގަންނަވާ،" ޔާމީން ވިދާޅުވި އެވެ.
ރަސްމާލެ ޑީލާ ގުޅިގެން ޝަހީމް މިހާތަނަށް އެއްވެސް ޕްލެޓްފޯމެއްގައި އެއްޗެއް ވިދާޅުވެފައެއް ނުވެ އެވެ. އެގޮތުން އޭނާ މި ޑީލާމެދު ދެކިވަޑައިގަންނަވާ ގޮތެއް މިހާތަނަށް ސާފެއް ނޫނެވެ.
ރަސްމާލެ ދޫކޮށްލަން ސަރުކާރުން އެއްބަސްވީ އެކުއިޒިޝަން ފީއެއް އަދި ބިމު ކުއްޔެއް ވެސް ނުނަގާ ގޮތަށެވެ. ސަރުކާރަށް ލިބޭ ހަމައެކަނި އެއްޗަކީ ރަސްމާލޭގައި އަޅާ ކޮމާޝަލް ޕްރޮޕަޓީސް ވިއްކައިގެން ލިބޭ ރެވެނިއުގެ 10 ޕަސެންޓާއި އެޕާޓްމަންޓުތައް ވިއްކައިގެން ލިބޭ ރެވެނިއުގެ ހަތަރު ޕަސެންޓެވެ.
