ރާއްޖޭގެ އެކި ސަރަހައްދުތަކުގައި ވަގުފްތަކާއި މިސްކިތްތައް ބިނާކުރުމަށާއި މިސްކިތްތައް މަރާމާތުކުރުމަށް ކަމަށް ބުނެ ސަރުކާރުގެ ސަތޭކަ ޕަސެންޓު ހިއްސާވާ ގޮތަށް އުފެއްދި "މޯލްޑިވްސް އައުގާފް އިންވެސްޓްމަންޓު" ކުންފުނީގެ ބޯޑު އެކުލަވާލައިފި އެވެ.
ދައުލަތުގެ ކުންފުނިތަކުގެ ބެލެނިވެރި އިދާރާ، ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އާންމުކޮށްފައިވާ މައުލޫމާތުގައިވާ ގޮތުގައި މި ކުންފުނީގެ ބޯޑުގެ ޗެއާޕާސަންއަކަށް އައްޔަންކުރީ ޒަކާތު ހައުސްގެ ޑިރެކްޓާ ޖެނެރަލް، އިއްޒުއްދީން އަދުނާނެވެ.
މި ކުންފުނި ހިންގުން ހަވާލުކޮށްފައި ވަނީ ހައްޖު ކޯޕަރޭޝަންގެ ކުރީގެ މެނޭޖިން ޑިރެކްޓަރު އަދި ޕެންޝަން ބޯޑަށް މި ފަހުން އައްޔަންކުރި ޔާމީން އިދްރީސްއާ އެވެ.
އައުގާފު ކުންފުނީގެ ބޯޑުން ފާހަގަކޮށްލެވޭ މެންބަރުންގެ ތެރޭގައި ފިނޭންސް މިނިސްޓްރީގެ ސްޓޭޓް މިނިސްޓަރު ހުސެއިން ޝާމް އާދަމް އާއި އިސްލާމިކް ޔުނިވާސިޓީ (އައިޔޫއެމް) ގެ ކުއްލިއްޔާ އޮފް އަރަބިކް ލެންގުއޭޖުގެ ޑީން މުހައްމަދު ޝުޖާއު ހިމެނިވަޑައިގަންނަވަ އެވެ.
އައުގާފު އިންވެސްޓްމަންޓުގެ ބޯޑު
- ޗެއާޕާސަން - އިއްޒުއްދީން އަދުނާން، ދަފްތަރު ނަންބަރު ރސ 12132
- މެނޭޖިން ޑިރެކްޓަރު - ޔާމީން އިދްރީސް، ދ. ކުޑަހުވަދޫ / މަތަރަސްމާގެ
- ބޯޑު މެންބަރު - ހުސެއިން ޝާމް އާދަމް، ނ، ފޮއްދޫ / ޔާގޫތުގު
- ބޯޑު މެންބަރު - މުހައްމަދު ޟުޖާއު، މއ. ބަރަކަ
- ބޯޑު މެންބަރު - މަރްޔަމް ނިހާޔަތު، ގދ. ތިނަދޫ / ވެލަގަލާ
- ބޯޑު މެންބަރު - އަބްދުالله އަލީ، ރ. ކަނދޮޅުދޫ / މީނާޒު
- ބޯޑު މެންބަރު - މުހައްމަދު ހިލްމީ، ހދ ވައިކަރަދޫ / ސައިމާގެ
މި ކުންފުނި އުފައްދަން ރައީސް މުހައްމަދު މުއިއްޒު ނެރުއްވި ގަރާރުގައި ވަނީ މިއީ ވަގުފްތަކާއި މިސްކިތްތައް ބިނާކޮށް މަރާމާތުކުރުމުގެ އިތުރުން އިސްލާމީ ޝަރީއަތް ހުއްދަކުރާ ވިޔަފާރީގެ ހަރަކާތްތައް ދެމެހެއްޓިނިވި ގޮތެއްގައި ހިންގުމަށް ކުރަންޖެހޭ އެންމެހާ މަސައްކަތް ކުރުމަށްޓަކައި އުފެއްދި ކުންފުންޏެއް ކަމަށެވެ.
މި ކުންފުނީގެ ދަށުން ވަގުފް އިމާރާތްތައް އެޅުމާއި މަރާމާތުކުރުން ހިމެނޭއިރު، އެ މަސައްކަތް މީގެ ކުރިން ކުރަމުންދިޔައީ އިސްލާމިކް މިނިސްޓްރީންނެވެ. އެގޮތުން ދުރު ރާސްތާ ޕްލޭންތަކެއް ހަދައިގެން އެކަމަށް މިނިސްޓްރީން ދިޔައީ މަސައްކަތް ކުރަމުންނެވެ.
އެހެން އޮއްވާ، އެއްވެސް ސަަބަބެއް ދިނުމެއް ނެތި ދައުލަތުގެ ކުންފުންޏެއް އުފައްދައިގެން މި މަސައްކަތް ކުރަން ފަށާފައި މިވަނީ ކީއްވެގެން ކަމެއް ސާފެއް ނުވެ އެވެ. އަދި، މިއީ މި ކުންފުނިތަކުގެ މާލީ ބުރަ ސަރުކާރުން އުފުލަން ޖެހޭ މައްސަލަ ބޮޑު ވެގެން، ކުންފުނިތައް މަދުކުރަން ސަަރުކާރުން ގެންގުޅޭ ސިޔާސަތާ ވެސް ނުގުޅޭ ކަމެއްގެ ގޮތުގައި ފާހަގަކުރެވެ އެވެ.
އައުގާފު އިންވެސްޓްމަންޓް ކުންފުނީގެ ރައުސްމާލަކީ 100ރ. ގެ އެއް މިލިއަން ހިއްސާގެ މައްޗަށް ބަހާލެވިފައިވާ 100 މިލިއަން ރުފިޔާ އެވެ.
