ހައްޖަށް ދިއުމަށް ފައިސާ ދައްކައި ކިޔޫގައި ތިބި ބައެއް މީހުން ފަހަތަށް ޖައްސާލައި، ކިޔޫގައި ތިބޭތާ ތިން އަހަރުވެފައިވާ 70 އަހަރުން މަތީގެ އެންމެންނަށް އަންނަ އަހަރު ހައްޖުވުމުގެ ފުރުސަތު ދޭން ސަރުކާރުން ނިންމައިފި އެވެ.
މި އުސޫލުގެ ދަށުން ހައްޖު ކިޔޫގައި ތިބޭތާ ތިން އަހަރު ވެފައިވާ ފަރާތްތައް ކަމުގައި ބަލާނީ، ޑިސެމްބަރު 31، 2023، ގެ ނިޔަލަށް ހައްޖަށް ދިއުމަށް ފައިސާ ދައްކާފައިވާ، ޑިސެމްބަރު 31، 2026، ގެ ނިޔަލަށް އުމުރުން 70 އަހަރުވެފައިވާ މީހުންނެވެ.
އެގޮތުން 70 އަހަރުން މަތީގެ 324 މީހުންނަށް މި އުސޫލުގެ ދަށުން 1448 ވަނަ އަހަރުގެ ހައްޖުން ފުރުސަތު ލިބިދެވޭނެ އެވެ. އޭގެ ތެރޭގައި ހިމެނޭ 75 އަހަރުން މަތީގެ 86 މީހުންނަށް ވެސް މި ފުރުސަތު ލިބެ އެވެ.
އިސްލާމިކް މިނިސްޓްރީން ބުނީ ކިޔޫގައި ތިބި 65 އަހަރުން ދަށުގެ ބައެއް މީހުންނަށް އަހަރެއްހާ ދުވަހުގެ ލަސަވުމެއް މީގެ ސަބަބުން މެދުވެރިވި ނަމަވެސް، މިއީ ހައްޖުގެ މަތިވެރި އަޅުކަން އަދާކުރުމަށް އެތައް އަހަރެއް ވަންދެން އިންތިޒާރުކުރަމުން އަންނަ ދޮށީ އުމުރުގެ އެތައް ރައްޔިތުންނަކަށް ލިބިގެންދިޔަ ވަރަށް ބޮޑު އުންމީދެއް ކަމަށެވެ.
އަންނަ އަހަރު ހައްޖަށް ދެވޭނެ ކަމަށް އަންދާޒާކޮށްފައިވާ އުމުރުން 65 އަހަރާއި 69 އަހަރާ ދެމެދުގެ މީހުންނަށް މިހާރު އަންދާޒާކޮށްފައިވާ ފުރުސަތަށް ލަސްވުމެއް ނާންނަހެން، 65 އަހަރުން މަތީގެ މީހުންނަށް ވެސް މި އަހަރު ކިޔޫގައި އިސްކަންދޭން ވަނީ ނިންމާފަ އެވެ.
މި އުސޫލާއެކު އަންނަ އަހަރު ހައްޖަށް ދެވޭނެ ކަމަށް އަންދާޒާކޮށްފައިވާ އުމުރުން 65 އަހަރާއި 69 މީހުންނަށް ހައްޖަށް ދިއުމުގައި ލަސްވުމެއް ކުރިމައްޗެއް ނުވާނެ ކަމަށް މިނިސްޓްރީން ބުންޏެވެ.
އެފަދަ މީހުން އެކުގައި ދިއުމަށް ފައިސާ ދައްކާފައިވާ އަދި އަންނަ އަހަރު ހައްޖުވެވޭނެ ކަމަށް އަންދާޒާކޮށްފައިވާ އާއިލީ މީހުންގެ ތެރެއިން ހައްޖު ކިޔޫގައި ތިބި އާއިލާގެ އެއް މެންބަރަކަށް އެކުގައި ދިޔުމަށް ފުރުސަތު ނުގެއްލޭނެހެން އިސްކަންދޭން ވެސް ވަނީ ހަމަޖެހިފަ އެވެ.
މި އުސޫލުތަކުގެ ދަށުން ފުރުސަތު ދެވޭ ހުރިހާ ފަރާތްތަކަކީ ވެސް، މީގެ ކުރިން ހައްޖުގެ އަޅުކަން އަދާކޮށްފައިނުވާ، ހަމައެކަނި ފަރުލު ހައްޖު އަދާކުރުމަށް ދާ މީހުންނަށް ވާން ޖެހޭނެ ކަމަށް ވަނީ ކަނޑައަޅާފަ އެވެ.
މިކަމުގެ ސަބަބުން ރާއްޖެއަށް ލިބޭ ކޯޓާގެ ބޭނުން އެންމެ ފުރިހަމަ ގޮތުގައި ހިފައި، ދުވަސްވީ މީހުންނަށް ވީހާވެސް އަވަހަށް ފުރުސަތު ލިބި، ހައްޖު ކިއުގައި ތިބި އުމުރުން ދުވަސްވީ މީހުންގެ އަދަދު މަދުވެގެން ދާނެކަމަށް ހައްޖު ކޯޕަރޭޝަނުން ބުންޏެވެ.
ރާއްޖެއިން މި އަހަރު 1000 މީހުން ހައްޖުގެ މަތިވެރި އަޅުކަން އަދާކުރުމަށް ގޮސްފައިވެ އެވެ. ތަފާސްހިސާބުތަކުން ދައްކާ ގޮތުގައި ސައުދީ އަރަބިއްޔާ ފިޔަވައި އެހެން ގައުމުތަކުން 1.5 މިލިއަނަށް ވުރެ ގިނަ މީހުން މި އަހަރު ހައްޖަށް ދިޔަ އެވެ.
