ހަފްލާތަކަށް ލައްކައިން ފައިސާ ހަރަދުނުކޮށް، ރައްޔިތުންނަށް އަސާސީ ބޭސް ހޯދައިދިނުމަށް ސޯޝަލް މީޑިއާގައި މަގްބޫލު ޝަހުސިއްޔަތެއް ކަމަށްވާ އަލީ ރަމީޒް މިއަދު ގޮވާލައިފި އެވެ.
އަލީ ރަމީޒް އެކްސް ގައި ބުނީ އަސާސީ އެތައް ބޭހެއް ނުލިބިގެން މީހުން ތެޅިފޮޅެމުންދާއިރު، ސަރުކާރުން ބޮޑެތި ހަފްލާތައް ބާއްވައި ލައްކައިން ފައިސާ ހަރަދުކުރަމުންދާ ކަމަށެވެ.
"ބޮޑެތި ހަފްލާތައް ބާއްވަން ލައްކައިން ފައިސާ އިސްރާފުނުކޮށް، އެކި އެކި ބަލިތަކަށް ކާން ޖެހޭ އަސާސީ ބޭސްކޮޅު ލިބޭވަރު ކޮށްލަދީ. ވަﷲ، އެތައް ބައިވަރު ބޭހެއް ނުލިބިގެން މީހުންތައް ތެޅިފޮޅެނީ. ހިތްފަޅައިގެންދާވަރުވޭ،" އޭނާ ބުންޏެވެ.
އަލީ ރަމީޒް އަންނަނީ ފަހަކަށް އައިސް ސަރުކާރުގެ ސިޔާސަތުތަކަށް ފާޅުގައި ފާޑުކިޔަމުންނެވެ. އެގޮތުން އިޒްރޭލާއި ޒަޔަނިސްޓުންނަށް ވާގިވެރިވާ ޔޫއޭއީގެ އީގަލް ހިލްސްއަށް ރަސްމާލެއިން އެއްބައި ދޫކޮށްލުމުގެ ތެރެއިން ހުރިހާ ދީނެއް ރާއްޖޭގައި ހިމާޔަތްކުރުމަށް ހުށަހެޅި ބިލަށް އޭނާ ފާޑުކިޔެވެ.
"ޔަހޫދީންގެ ނުބައި ވާހަކަ ދެއްކުން މުސްލިމުންގެ ދޫތަކުން ހުއްޓުވޭނެ އޮތީ އެންމެ ގޮތެއް. އެއީ އެމީހުންގެ [މުސްލިމުންގެ] ބޯތައް ކަނދުރާއިން ވަކި ކުރުން،" އަލީ ރަމީޒް ބުނެފައިވެ އެވެ.
ރައީސް މުހައްމަދު މުއިއްޒުގެ ވެރިކަން ދެބައިވެގެންދިޔައިރު ވެސް ރައްޔިތުންނަށް ބޭސް ނުލިބުމުގެ މައްސަލަ ހައްލު ކުރެވިފައިނުވާކަން އެމަނިކުފާނު މިދިޔަ ސެޕްޓެމްބަރުގައި ގަބޫލު ކުރެއްވި އެވެ.
ރާއްޖޭގައި ބޭސް ލިބުން މިހާ ބޮޑަށް ދަތިވީ މުއިއްޒުގެ ވެރިކަމުގަ އެވެ. އެކަން ފެށުނީ ވެރިކަމުގެ ފުރަތަމަ ކޮޅު ޗައިނާއަށް ކުރެއްވި ދަތުރަށްފަހު އިއުލާނު ކުރެއްވި އިންޑިއާއާ ދުރުވުމުގެ މަގުޗާޓަށްފަހު އެވެ. މުއިއްޒު ބޭނުންވެވަޑައިގަތީ އިންޑިއާއިން ބޭސް ގެނައުން ހުއްޓާލުމަށެވެ.
އޭގެ ފަހުން ބޭހުގެ މައްސަލަ ބޮޑުވުމުން އެމަނިކުފާނު ވިދާޅުވީ އެ މައްސަލަ ދިމާވަނީ ބޭހުގެ ވިޔަފާރި ކުރާ މީހުން ގަސްދުގައި ބޭސް އެތެރެނުކޮށް ދަތި ކުރާތީ ކަމަށެވެ. އެ މައްސަލަ ހައްލު ކުރަން ކަމަށް ބުނެ ސަރުކާރުން ވަނީ ސެޕްޓެމްބަރު 9، 2025، ގައި ސްޓޭޓް ފާމާގެ ނަމުގައި ދައުލަތުގެ ބޭސް ކުންފުންޏެއް އުފައްދައިފަ އެވެ. އޭގެ ފަހުން ވެސް މިހާރު އަހަރަކަށްވުރެ ގިނަ ދުވަސް ފާއިތުވެއްޖެ އެވެ.








