ރައީސް މުހައްމަދު މުއިއްޒުގެ ވެރިކަން ދެބައިވެގެންދިޔައިރު ވެސް ރައްޔިތުންނަށް ބޭސް ނުލިބުމުގެ މައްސަލަ ހައްލު ކުރެވިފައިނުވާކަން އެމަނިކުފާނު ގަބޫލު ކުރައްވައިފި އެވެ.
ރައްޔިތުންނަށް ބޭސް ނުލިބޭކަން ގަބޫލު ކުރައްވާ މުއިއްޒު ވާހަކަ ދެއްކެވީ، ރައީސް އޮފީހުން ރޭ ގެނެސްދިން "ރައްޔިތުންގެ އަޑު" ވީޑިއޯ ޕްރޮގްރާމުގަ އެވެ. އެ ޕްރޮގްރާމަށް އައި އާންމު ރައްޔިތަކު ވަނީ އޭނާ ދިރިއުޅޭ ހާލާއި ކޮންމެހެން ބޭނުންވާ ޒަރޫރީ ބޭސްތައް ނުލިބޭ ވާހަކަ ރައީސް ކައިރީ ބުނެފަ އެވެ.
"ދެން މި އޮތީ ބުނެލަން ބޭހުގެ ވާހަކަ. ވަރަށް ދަތި، ވަރަށް ދަތި. އަޅުގަނޑު އަންހެނުންނަކީ ހަކުރު މައްޗަށްދާ މީހެއް. ޕްރެޝަރު އެބަހުރި. މައިބަދައިގެ ދެ ޑިސްކު ހަލާކުވެފަ. ޑރ. ނިޔާފްމެންނަށް ދައްކައިގެން ފިޒިއޯ ހަދައިގެން ނާރުގެ ބޭހެއް ކަމުން އެ ދަނީ އަންހެނުން. މި ދޭތެރެއިން ހަމަ ތިން މަސް ހަމަވެގެން ދައްކައިގެން ދިން ނާރުގެ ބޭހެއް ނުލިބިގެން އެންމެފަހުން ރަހުމަތްތެރިއަކު އިންޑިއާ ކޮޅުން އައިއިރު އޭނައަށް ފޮނުވައިގެން މި ގެންނަން ޖެހުނީ،" އޭނާ ބުންޏެވެ.
"އަދިވެސް ހަމަ ބޭހުގެ ކަންތަކުގައި ކުރިއަށް އަހަރުމެން ދިވެހި ރައްޔިތުންނަކަށް ނުލިބޭ. ވަރަށް ދަތިކޮށް މި ދަނީ ބޭހުގެ ކަންތައް."
އޭނާ އެ ވާހަކަ އެގޮތަށް ދެއްކުމުން ގަނޑެއްގައި އެއްޗެއް ނޯޓު ކޮށްލެއްވުމަށްފަހު މުއިއްޒު ވިދާޅުވީ "ގަބޫލު ކުރަން" ކަމަށެވެ. ނަމަވެސް އިތުރު އެއްޗެއް ވިދާޅެއް ނުވެ އެވެ. ނަމަވެސް އާންމު މީހާގެ ހުރިހާ ޝަކުވާތަކެއް ބަންޑުން ޖަހާލުމުން "އިރާދަކުރެއްވިއްޔާ ތި ހުރިހާ ކަމެއް ވެސް ހައްލުކޮށްދެއްވަން މަސައްކަތް ކުރާނަން" ކަމަށް މުއިއްޒު ވިދާޅުވި އެވެ.
ރާއްޖޭގައި ބޭސް ލިބުން މިހާ ބޮޑަށް ދަތިވެފައި ވަނީ ރައީސް މުއިއްޒުގެ ވެރިކަމުގަ އެވެ. އެކަން ފެށުނީ ވެރިކަމުގެ ފުރަތަމަ ކޮޅު ޗައިނާއަށް ކުރެއްވި ދަތުރަށްފަހު އިއުލާނު ކުރެއްވި އިންޑިއާއާ ދުރުވުމުގެ މަގުޗާޓަށްފަހު އެވެ. މުއިއްޒު ބޭނުންވެވަޑައިގަތީ އިންޑިއާއިން ބޭސް ގެނައުން ހުއްޓާލުމަށެވެ.
"އާދައިގެ ބޭސް ގެނައުން ނިމުމަކަށް ގެނެސް ސީދާ އުފައްދާ ތަނުން، ޔޫރަޕާއި އެމެރިކާއިން އަޅުގަނޑުމެން އިރާދަކުރެއްވިއްޔާ އަޅުގަނޑުމެން ބޭސް އެތެރެ ކުރާ ގޮތަށް އަޅުގަނޑުމެން ބަދަލު ކުރާނަން،" ޖެނުއަރީ 13، 2024، ގައި މުއިއްޒު ވިދާޅުވި އެވެ.
އޭގެ ފަހުން ބޭހުގެ މައްސަލަ ބޮޑުވުމުން އެމަނިކުފާނު ވިދާޅުވީ އެ މައްސަލަ ދިމާވަނީ ބޭހުގެ ވިޔަފާރި ކުރާ މީހުން ގަސްދުގައި ބޭސް އެތެރެނުކޮށް ދަތި ކުރާތީ ކަމަށެވެ.
"އެހެންވީމާ، އެކަން [ބޭހުގެ އަގުތައް] ރަނގަޅުކުރަން، އަޅުގަނޑުމެން އަގުތައް ކެޕްކޮށްލީ. ކުޑަކޮށްލީ. ކުޑަކޮށްލީމާ، މީގެ ރިޕަކަޝަނެއް ގޮތުގައި، ބައެއް ވިޔަފާރިވެރިން، ބޭހުގެ ވިޔަފާރިވެރިން، އަޅުގަނޑު އެދެން އެބޭފުޅުން އަޅުގަނޑަށް މާފުކުރައްވާނެ ކަމަށް. އެކަމަކު ހަގީގަތް ދަންނަވާލަން. ހަމަ ގަސްދުގައި ގެނައުން ހުއްޓާލީ ބައެއް ބޭސް. ހަމަ ޗޯކް ކޮށްލަންވެގެން. ހުއްޓާލީމާ ތާށިތަކެއް ދިމާވީ،" މެއި 3، 2025، ގައި މުއިއްޒު ވިދާޅުވި އެވެ.
އެ މައްސަލަ ހައްލު ކުރަން ކަމަށް ބުނެ ސަރުކާރުން ވަނީ ސެޕްޓެމްބަރު 9، 2025، ގައި ސްޓޭޓް ފާމާގެ ނަމުގައި ދައުލަތުގެ ބޭސް ކުންފުންޏެއް އުފައްދައިފަ އެވެ. އޭގެ ފަހުން ވެސް މިހާރު އަހަރަކަށްވުރެ ގިނަ ދުވަސް ފާއިތުވެއްޖެ އެވެ.
