މޯލްޑިވްސް އިސްލާމިކް ބޭންކް (އެމްއައިބީ) އިން ޝަރީއާ ހަމަތަކަށް ފުރިހަމައަށް ފެތޭ ގޮތަށް އަމިއްލަ ފަރުދުންނާއި ވިޔަފާރިތަކުގެ މާލީ ބޭނުންތަކަށް ހާއްސަކޮށްގެން އައު ކްރެޑިޓް ކާޑު ޕޯޓްފޯލިއޯއެއް މިއަދު ރަސްމީކޮށް ތައާރަފުކޮށްފި އެވެ.
މިއީ ރާއްޖޭގައި އިސްލާމިކް ބޭންކިން އާއި ފައިސާ ދެއްކުމުގެ ހިދުމަތްތައް ފުޅާކުރުމަށް އެ ބޭންކުން ކުރަމުންދާ މަސައްކަތުގެ ދަށުން ނެރުނު މުހިންމު ކާޑުތަކެކެވެ. މި ކާޑު ޕޯޓްފޯލިއޯ ބަހާލެވިފައިވަނީ ހަތަރު ކެޓަގަރީއަކަށެވެ. އެއީ ގޯލްޑް، ޕްލެޓިނަމް، ސިގްނަޗާ އަދި ބިޒްނަސް ކާޑެވެ.
މިއިން ކޮންމެ ކާޑަކަށްވެސް ކްރެޑިޓް ލިމިޓް ކަނޑައެޅިފައިވަނީ 12,000ރ. އިން ފެށިގެން 300,000ރ. އާ ހަމައަށެވެ. ކާޑު ދޫކުރުމުގައި ބަލާނީ އެދޭ ފަރާތުގެ އާމްދަނީއާއި މާލީ ޝަރުތުތަކަށް ކަމަށް އެމްއައިބީން މައުލޫމާތުދެ އެވެ.
ރުފިޔާ ކާޑުތަކަށް ކޮންމެ މަހަކަށް ކަނޑައަޅާފައިވާ ލިމިޓްތައް:
- ގޯލްޑް ކާޑަށް 12,000ރ. އާއި 50,000ރ. ދެމެދުގެ ލިމިޓެއް.
- ޕްލެޓިނަމް ކާޑަށް 50,000ރ. އާއި 100,000ރ. އާ ދެމެދުގެ ލިމިޓެއް.
- ސިގްނަޗާ ކާޑަށް 100,000ރ. އިން ފެށިގެން 300,000ރ. އާ ދެމެދުގެ ލިމިޓެއް.
- ވިޔަފާރިތަކަށް ހާއްސަ ބިޒްނަސް ކާޑަށް 100,000ރ. އާއި 300,000ރ. އާ ދެމެދުގެ ލިމިޓެއް.
ޑޮލަރު ކާޑުތަކަށް ކޮންމެ މަހަކަށް ކަނޑައަޅާފައިވާ ލިމިޓްތައް:
- ގޯލްޑް ކާޑަށް 300 އެމެރިކާ ޑޮލަރު.
- ޕްލެޓިނަމް ކާޑަށް 400 އެމެރިކާ ޑޮލަރު.
- ސިގްނަޗާ ކާޑަށް 500 އެމެރިކާ ޑޮލަރު.
- ބިޒްނަސް ކާޑަށް ވަކި ޑޮލަރު ލިމިޓެއް ކަނޑައަޅާފައެއް ނުވޭ.
މި ކާޑުތަކުން ކުރާ ހަރަދުތަކަށް ފައިސާ ދެއްކުމުގައި ކަސްޓަމަރުންނަށް ލުއިގޮތްތަކެއް ވަނީ ހަމަޖައްސައިދީފަ އެވެ. އެގޮތުން މަހުން މަހަށް ދައްކަންޖެހޭ އަދަދުގެ މަދުވެގެން 5 ޕަސަންޓު ނުވަތަ މުޅި އަދަދު އެއްކޮށް ދެއްކުމުގެ އިހްތިޔާރު ކަސްޓަމަރުންނަށް ލިބެ އެވެ.
ކާޑުގެ މަންތުލީ ސްޓޭޓްމަންޓް ކޮންމެ މަހެއްގެ 10 ވަނަ ދުވަހު ދޫކުރާއިރު، ފައިސާ ދެއްކުމުގެ ސުންގަޑިއަކީ އެ މަހެއްގެ 30 ވަނަ ދުވަހެވެ. ކަސްޓަމަރުންނަށް އެ ފައިސާ އެމްއައިބީ އޭޓީއެމް ނުވަތަ ޑައިރެކްޓް ޑެބިޓް، ފައިސާ ފައިސާނެޓް، ފައިސާ މޮބައިލް މެދުވެރިކޮށް ދެއްކޭނެ އެވެ.
އެމްއައިބީން ބުނީ މި އައު ކްރެޑިޓް ކާޑުތައް ތައާރަފުކުރުމަކީ އިސްލާމީ ބޭންކިންގގެ އުޞޫލުތަކާ އެއްގޮތްވާ ގޮތުގެ މަތިން، ކަސްޓަމަރުންގެ ބަދަލުވަމުންދާ މާލީ ބޭނުންތަކަށް އެކަށީގެންވާ ޒަމާނީ ހައްލުތަކެއް ފޯރުކޮށްދިނުމަށް އެ ބޭންކުން ކުރާ މަސައްކަތުގެ މުހިންމު ފިޔަވަޅެކެވެ.
