މޯލްޑިވްސް އިސްލާމިކް ބޭންކް (އެމްއައިބީ) ގެ ޑިރެކްޓަރުންގެ ބޯޑުގައި ހުސްވެފައިވާ މަގާމުތަކަށް މެންބަރުން އައްޔަންކުރުމަށް، އެ ބޭންކުގެ މިއަހަރުގެ ހާއްސަ އާންމު ޖަލްސާ މިއަދު ބާއްވައިފި އެވެ.
"ފަހިވޯޓު" ޕްލެޓްފޯމް މެދުވެރިކޮށް މިއަދު ބޭއްވި މި ޖަލްސާގައި ބޭންކުގެ 71.73 ޕަސެންޓު ހިއްސާ ތަމްސީލުކުރާ ހިއްސާދާރުން ބައިވެރިވެފައިވާ ކަމަށް އެމްއައިބީން ބުންޏެވެ. މި ބައްދަލުވުމުގައި ބޯޑަށް އައްޔަން ކުރީ ނޮން-އެކްޒެކެޓިވް ޑިރެކްޓަރެއްގެ ގޮތުގައި ހަސަން މަހޫދު އާއި އާންމު ހިއްސާދާރުންގެ ފަރާތުން އިޔާޒު ވަހީދު އެވެ.
ބޯޑަށް އަލަށް އައްޔަންކުރެވުނު ހަމޫދަކީ އިންވެސްޓްމަންޓް އަދި އިކޮނޮމިކް ރިސާޗްގެ ދާއިރާއިން ގިނަ ތަޖުރިބާތަކެއް ހޯއްދަވާފައިވާ ބޭފުޅެކެވެ. އިނގިރޭސިވިލާތުގެ ޔުނިވަރސިޓީ އޮފް އެޑިންބަރާއިން އިކޮނޮމިކްސް އެންޑް ލޯ އިން މާސްޓާސް (އޮނަރސް) ހާސިލުކުރައްވާފައިވާ ހަމޫދު ވަނީ ސީއެފްއޭ ޕްރޮގްރާމްގެ ލެވެލް 1 ވެސް ފުރިހަމަކުރައްވާފަ އެވެ. ހަމޫދު މިހާރު ހުންނެވީ ޕެންޝަން އޮފީހުގެ ސީނިއަރ މެނޭޖަރ، އިންވެސްޓްމަންޓް އެންޑް އެޑްވައިޒަރީ ސަރވިސަސްގެ މަޤާމުގަ އެވެ.
މީގެ އިތުރުން ޕެންޝަން އޮފީހާއި، ޓްރާންސްޕޭރެންސީ މޯލްޑިވްސް އަދި މޯލްޑިވްސް މަނިޓަރީ އޮތޯރިޓީ (އެމްއެމްއޭ) ފަދަ އިދާރާތަކުގައިވެސް އޭނާ ވަނީ މުހިންމު މަޤާމުތަކެއް އަދާކުރައްވާފައެވެ.
