މެލޭޝިޔާގެ ކުރީގެ ބޮޑުވަޒީރު ނަޖީބު ރައްޒާގު ކޮރަޕްޝަނުގެ ކުށުގައި ތަންފީޒު ކުރައްވަމުން ގެންދެވި ޖަލު ހުކުމުގެ ބާކީ އޮތް ބައި ގޭބަންދުގައި ފުރިހަމަކުރެއްވުމަށްޓަކައި ގެއަށް ބަދަލުކޮށްފި އެވެ.
އުމުރުން 73 އަހަރުގެ ނަޖީބު ރައްޒާގު ޖަލުން ދޫކޮށްލުމާއެކު، އަންގާރަ ދުވަހުގެ ރޭ ދަންވަރުގެ ވަގުތެއްގައި ފުލުހުންގެ ވަރުގަދަ ސަލާމަތީ ފައުޖަކާއެކު އޭނާ ވަނީ ކުއާލަލަމްޕޫރުގައި ހުންނަ އޭނާގެ އަމިއްލަ ގެއަށް ގެންގޮސްފައެވެ.
މެލޭޝިޔާގެ ދައުލަތުގެ އިންވެސްޓްމަންޓް ފަންޑު ކަމަށްވާ ވަން އެމްޑީބީން އެތައް ބިލިއަން ޑޮލަރަކަށް ހިޔާނާތްތެރިވި މައްސަލައިގައި ކުށް ސާބިތުވެ، ނަޖީބު ވަނީ ހަތަރު އަހަރު ދުވަހު ޖަލުގައި ހޭދަކުރައްވާފަ އެވެ. މި ބޮޑު ހިޔާނާތުގެ މައްސަލައަކީ މީގެ ދިހަ އަހަރު ކުރިން ފަޅާ އަރައި، މެލޭޝިޔާގެ ސަރުކާރު ވެއްޓުމަށް މެދުވެރިވި އަދި މުޅި ދުނިޔޭގެ ސަމާލުކަން ހުއްޓުނު މައްސަލައެކެވެ. މި މައްސަލައިގައި ދުނިޔޭގެ މަޝްހޫރު ބޭންކެއް ކަމަށްވާ ގޯލްޑްމަން ސެކްސް އާއި ހޮލީވުޑްގެ ބައެއް ފަރާތްތަކުގެ ނަންވެސް ވަނީ ހިމެނިފަ އެވެ.
ތަހުގީގީ އިދާރާތަކުން އަންދާޒާކުރާ ގޮތުގައި، ނަޖީބު އިސްވެ ހުންނަވައި އުފެއްދެވި މި ފަންޑުން 4.5 ބިލިއަން ޑޮލަރު ވަނީ އަމިއްލަ ފަރާތްތަކުގެ އެކައުންޓްތަކަށް ޖަމާކޮށްފަ އެވެ. މީގެ ތެރެއިން އެއް ބިލިއަނަށްވުރެ ގިނަ ޑޮލަރު ސީދާ ނަޖީބާ ގުޅުންހުރި އެކައުންޓްތަކަށް ވަދެފައިވާ ކަމަށް ޕްރޮސެކިއުޓަރުން ބުނެ އެވެ. ނަމަވެސް ނަޖީބުގެ ވަކީލުން ވިދާޅުވަމުން ގެންދަވަނީ އޭނާއަށް އޮޅުވާލާފައިވަނީ މާލީ މުޝީރުން ކަމަށެވެ. ހާއްސަކޮށް މިހާރުވެސް ފިލައިގެން އުޅޭ ޖޯ ލޯގެ މައްޗަށް ވަކީލުން އިނގިލި ދިއްކުރެ އެވެ.
ނަޖީބު ރައްޒާގު ދިރިއުޅުއްވާ ގަނޑުވަރެއް ފަދަ ބޮޑު ގެއަށް އޭނާ ގެންދިޔަ ވަގުތު، އެ ސަރަހައްދަށް ގިނަ އަދަދެއްގެ ނޫސްވެރިން އެއްވެފައިވެ އެވެ. ސަރުކާރުން ވަނީ އޭނާގެ ގެއަކީ ފެޑަރަލް ޖަލެއްގެ ގޮތުގައި ރަސްމީކޮށް ކަނޑައަޅާފަ އެވެ. ނަމަވެސް ކޮރަޕްޝަނާ ދެކޮޅަށް މަސައްކަތްކުރާ ފަރާތްތަކުން ވަނީ މި ނިންމުމަށް ވަރަށް ބޮޑަށް ފާޑުކިޔާފަ އެވެ. އެ ފަރާތްތަކުން ބުނާ ގޮތުގައި މިއީ ކޮރަޕްޝަނާ ދެކޮޅަށް ކުރާ މަސައްކަތަށް އެޅުނު ހުރަހެކެވެ. އަދި މެލޭޝިޔާގެ ގާނޫނުތަކުގައި ގޭބަންދުގައި ހުކުމް ތަންފީޒު ކުރުމުގެ އެއްވެސް އުސޫލެއް ނެތް ކަމަށްވެސް އެ ފަރާތްތަކުން ފާހަގަކުރެ އެވެ.
2009 އިން 2018 އަށް ބޮޑުވަޒީރުކަން ކުރެއްވި ނަޖީބު ވަނީ އޭނާގެ މައްޗަށް ކުރެވުނު ހުރިހާ ތުހުމަތުތަކަކަށް އިންކާރު ކުރައްވާފަ އެވެ. ނަމަވެސް ދެ މައްސަލައެއްގައި އޭނާގެ މައްޗަށް ކުށް ސާބިތުވި އެވެ. ފުރަތަމަ މައްސަލައިގައި 2020 ވަނަ އަހަރު 12 އަހަރުގެ ޖަލު ހުކުމެއް އިއްވައި، 2022 ވަނަ އަހަރު އޭނާ ޖަލަށް ލެވުނެވެ. ފަހުން އިސްތިއުނާފު މަރުހަލާގައި އެ ހުކުމް ވަނީ ދެބައިކުޅަ އެއްބަޔަށް ކުޑަކޮށްދީފައެވެ.
މިދިޔަ ސެޕްޓެމްބަރު މަހު މެލޭޝިޔާގެ ރަސްގެފާނު ވަނީ ނަޖީބަށް ލުއި މާފެއް ދެއްވައި، ހުކުމުގެ ބާކީ އޮތް ދެ އަހަރު ގޭގައި ހުރެގެން ފުރިހަމަކުރުމުގެ ހުއްދަ ދެއްވާފަ އެވެ. މި ނިންމުމުގެ ދަށުން ނަޖީބުގެ ސިޔާސީ ޕާޓީން ވަނީ 12 މިލިއަން ޑޮލަރުގެ ޖޫރިމަނާއެއްވެސް ދައްކާފަ އެވެ. ނަޖީބު މިހާރު ގޭބަންދަށް ބަދަލުކުރެވުނު ނަމަވެސް، 2025 ވަނަ އަހަރުގެ ޑިސެމްބަރު މަހު އިއްވާފައިވާ 15 އަހަރުގެ އެހެން ޖަލު ހުކުމެއް އޭނާ ގެންދަވަނީ އިސްތިއުނާފު ކުރައްވަމުންނެވެ. އެއީ ވަން އެމްޑީބީ ފަންޑުން ގާތްގަނޑަކަށް 569 މިލިއަން ޑޮލަރަށް ހިޔާނާތްތެރިވި މައްސަލައިގައި އިއްވާފައިވާ ހުކުމެކެވެ.
