މެލޭޝިއާގައި ހިނގި ނުރައްކާތެރި ކާރު އެކްސިޑެންޓެއްގައި އެ ގައުމުގައި ކިޔަވަމުން ދިޔަ ސ. ހިތަދޫ، މާރިޝް، އާމިނާ އިމީލީ ނާޒިމް، 22، މަރުވި މައްސަލައިގައި ކާރު ޑްރައިވަރަށް ޖުމްލަ 26 އަހަރުގެ ޖަލު ހުކުމެއް އައިސްދާނެ ތިން ދައުވާއެއްކޮށްފި މިއަދު އެވެ.
ޝާހް އާލަމްގެ މެޖިސްޓްރޭޓް ކޯޓުގައި ކުރިއަށްދިޔަ އަޑުއެހުމުގައި މި މައްސަލައިގައި ދައުވާ އުފުލާފައިވަނީ މެލޭޝިއާއަށް ނިސްބަތްވާ މުހައްމަދު ޝަފީގު އިބްރާހީމް، 37، ގެ މައްޗަށެވެ. ބުރާސްފަތި ދުވަހު މެޖިސްޓްރޭޓް ކޯޓުގައި ބޭއްވި އަޑުއެހުމުގައި އޭނާ ވަނީ އޭނާގެ މައްޗަށް ކުރި ތިން ދައުވާއަށްވެސް އިންކާރުކޮށްފަ އެވެ.
މެތައެމްފަޓަމިން (މެތު) ބޭނުންކޮށްގެން މަސްތުގެ ހާލަތުގައި ހުރެ ކާރު ދުއްވުމުގެ ތެރޭގައި ހިނގި އެކްސިޑެންޓުގެ މައްސަލައިގައި ޑްރައިވަރަށް ދައުވާކޮށްފައިވަނީ އިމީލީ މަރުވި މައްސަލައިގައި އާއި އިމީލީއާއެކު ދެން ކާރުގައި އިން ފަސިންޖަރު އައިޝަތު ސާރާ ނިޒާމަށް ލިބުނު އަނިޔާތަކުގެ އިތުރުން ފަރުވާކުޑަކޮށް ދުއްވުމުގެ ސަބަބުން އެހެން އުޅަނދެއްގައި ޖެހި އެކްސިޑެންޓްވި މައްސަލައިގަ އެވެ.
ޝަފީގެ މައްޗަށް ފަރުވާ ކުޑަކޮށް ދުއްވުމުގެ ސަބަބުން އިމީލީ މަރުވުމުގެ ދައުވާ ސާބިތުވެއްޖެނަމަ 15 އަހަރުގެ ޖަލު ހުކުމަކާއެކު ބައި ލައްކަ ރިންގިޓާއި އެއް ލައްކަ ރިންގިޓާ ދެމެދުގެ އަދަދަކުން ޖޫރިމަނާއެއް ކުރެވޭނެ އެވެ. ސާރާ ނިޒާމަށް އަނިޔާވި މައްސަލަ ސާބިތުވެއްޖެނަމަ ޝަފީގަށް 10 އަހަރުގެ ޖަލު ހުކުމަކާއެކު 30،000 ރިންގިޓާއި ބައި ލައްކަ ރިންގިޓާ ދެމެދުގެ އަދަދަކުން ޖުރިމަނާ ކުރެވޭނެ އެވެ.
މީގެއިތުރުން ފަރުވާކުޑަކޮށް ދުއްވުމުގެ ސަބަބުން އެހެން އުޅަނދެއްގައި ޖެހި އެކްސިޑެންޓްވުމުގެ ދައުވާ ޝަފީގުގެ މައްޗަށް ސާބިތުވެއްޖެނަމަ އެއް އަހަރުގެ ޖަލު ހުކުމަކާއެކު 5،000 ރިންގިޓާއި އެއްލައްކަ ރިންގިޓާ ދެމެދުގެ އަދަދަކުން ޖޫރިމަނާ ކުރެވޭނެ އެވެ.
ކޯޓުގައި ދައުލަތުން އެދުނީ ކޮންމެ ދައުވާއަކަށް ވަކިން ކަފާލާތުގެ ފައިސާ ބެހެއްޓުމަށެވެ. އެގޮތުން ކޮންމެ ދައުވާއަކަށް 10،000 ރިންގިޓް ބެހެއްޓުމަށް ދައުލަތުން އެދުނެވެ. ނަމަވެސް ޝަފީގުގެ ވަކީލު ކޯޓުގައި އެ އަދަދު ކުޑަކޮށްދޭން އެދި ބުނީ ޝަފީގަކީ އޭނާގެ އަންހެނުންނާއި ތިން އަހަރާއި ހަތަރު އަހަރުގެ ދެ ދަރިންގެ އިތުރުން އޭނާގެ ބަލި މަންމަ ބަލަމުންދާ މީހެއް ކަމަށެވެ.
މީގެއިތުރުން ޝަފީގަށް ލިބެނީ މަހަކު ގާތްގަނޑަކަށް 2،000 ރިންގިޓް ކަމަށްވެސް ވަކީލު ބުންޏެވެ. މިއާއެކު މައްސަލަ ބެއްލެވި ގާޒީ ނިންމެވީ 9،000 ރިންގިޓުގެ އިތުރުން އެކަކު ޖާމިނުވާ ގޮތަށް ކަފާލާތެއްގެ ދަށުން ޝަފީގް ދޫކޮށްލުމަށެވެ.
ނަމަވެސް މައްސަލަ ނިމެންދެން ޝަފީގްގެ ލައިސަންސް ހިފެހެއްޓުމަށްވެސް ކޯޓުން ވަނީ އަމުރުކޮށްފަ އެވެ. މި މައްސަލައިގެ އިތުރު އަޑުއެހުމެއް ޑިސެމްބަރު 4، ވަނަ ދުވަހަށް ވަނީ ތާވަލުކޮށްފަ އެވެ.
މި އެކްސިޑެންޓު ހިނގަން މެދުވެރިވީ ޝަފީގު ދުއްވަން އިން ކާރު ހައިވޭ ޓޯލްއެއް ކައިރިން ކޮންޓްރޯލުން ނެއްޓި އިތުރު ކާރެއްގައި ޖެހިގެންނެވެ. އެކްސިޑެންޓުގައި ޝަފީގު ދުއްވަން އިން ކާރު ފުރޮޅާލައި ދެން އިން ކާރަށްވެސް ގެއްލުން ލިބުނެވެ. އެކްސިޑެންޓު ހިނގި ސީންގައި އިމީލީ މަރުވެފައިވާއިރު، ދެން އިން ދިވެހި ދަރިވަރަށް މާ ބޮޑު އަނިޔާއެއް ނުލިބެ އެވެ.
